काठमाडौं । घरेलु मैदानमा पोर्चुगलको क्लब बेनफिकासँग बुधबार राति ३–३ को रोमाञ्चक बराबरी खेले पनि इटालियन क्लब इन्टर मिलानले समग्रमा ५–३ को नतिजा निकाल्दै यूईएफए च्याम्पियन्स लिगको सेमिफाइनलमा स्थान पक्का गरेको छ । 

इन्टरले अब फाइनल प्रवेशका लागि इटालीकै अर्को क्लब एसी मिलानसँग प्रतिस्पर्धा गर्नेछ । यससँगै च्याम्पियन्स लिगमा ६ वर्षपछि इटालियन क्लबले फाइनल खेल्ने पक्का भएको छ । इन्टर २०१० मा उपाधि जितेपछि च्याम्पियन्स लिगको सेमिफाइनलमा स्थान बनाएको यो पहिलोपटक हो । युभेन्टस २०१५ र २०१७ को फाइनलमा पराजित भएयता कुनै पनि इटालियन क्लबले यो प्रतियोगिताको फाइनलमा स्थान बनाउन सकेका थिएनन् । 

‘‘यो विशेष डर्बी खेल हुने पक्का छ,’’ इन्टरका स्ट्राइकर लाउटारो मार्टिनेजले भने, ‘‘च्याम्पियन्स लिगको सेमिफाइनलमा मिलान डर्बी खेलको महत्व कस्तो हुन्छ भनेर हामी सबैलाई थाहा छ । यस क्लबको प्रतिनिधित्व गर्न पाउँदा म धेरै खुसी छु ।’’

गएराति इन्टरले निकोला बरेलाको गोलबाट १४औँ मिनेटमा अग्रता लिएको थियो । ३८औँ मिनेटमा बेनफिकाका फ्रेड्रिक औसनेसले बराबरी गोल फर्काए । ६५औँ मिनेटमा मार्टिनेजले गरेको गोलबाट इन्टर पुनः अग्रता लियो । ७८औँ मिनेटमा जेक्विन कोरेराले इन्टरको अग्रता बढाए । 

८६औँ मिनेटमा एन्टोनियो सिल्भाको गोलबाट बेनफिकाले पुनरागमन गर्यो । इन्जुरी समयमा पेटर मुसाले बराबरी गोल फर्काए । बेनफिकाले बराबरी गरे पनि घरेलु मैदानमा २–० को हार महंगो सावित भयो । त्यही जितले इन्टर अन्तिम चारमा स्थान बनाउन सफल भयो । 

अन्तिम चारमा इन्टरले शहरी प्रतिद्वन्द्वी एसी मिलानविरुद्ध प्रतिस्पर्धा गर्नेछ । मिलानका दुई क्लब च्याम्पियन्स लिगको नकआउट चरणमा प्रतिस्पर्धा गर्न लागेको यो तेस्रो पटक हो । यसअघि २००२/०३ को सेमिफाइनल र २००४/०५ को क्वार्टरफाइनलमा प्रतिस्पर्धा गरेका थिए । दुवै भेटमा सात पटकको विजेता मिलान विजयी भएको थियो । 

दुई क्लबबीच पहिलो लेग १० मेमा सान सिरो र दोस्रो लेग १६ मेमा हुनेछ । दुई टिमबीचको विजेताले म्यानचेस्टर सिटी र रियाल मड्रिडबीचको विजेतासँग प्रतिस्पर्धा गर्नेछ । सिटीले गएराति जर्मन बुन्डेसलिगाको क्लब बायर्न म्युनिखलाई समग्रमा ४–१ ले हराउँदै सेमिफाइनलमा स्थान बनाएको हो ।