काठमाडौं । कृत्रिम बुद्धिमता अर्थात् आर्टिफिसियल इन्टेलिजेन्स (एआई)को व्यापक विकाससँगै हजारौँको संख्यामा रोजगारी कटौती गर्न सक्ने चिन्ता बढाएको छ । अर्कोतिर, एआईकै विकासले कम्प्युटर इन्जिनियरिङ पृष्ठभूमि नभएका र कोडिङ नजान्नेहरूका लागि समेत बजारमा आर्कषक रोजगारी सिर्जना गरिरहेको छ ।
जेनेरेटिभ आर्टिफिसियल इन्टेलिजेन्सको विकाससँगै धेरै कम्पनीले अहिले ‘प्रम्प्ट इन्जिनियर’हरू खोज्न थालेका छन् । यी प्रम्प्ट इन्जिनियरको काम एआई टुललाई अझै सटीक र सान्दर्भिक जवाफ दिने किसिमका प्रश्न सोध्ने रहेको छ ।
प्रम्प्ट इन्जिनियरले के गर्छ ?
ओपन एआईको एआई टुल च्याटजीपीटीभन्दा पहिले नै कपीडटएआईमा काम गर्ने प्रम्प्ट इन्जिनियरले यसको ब्याकइन्डमा अक्षरमा आधारित प्रम्प्ट अथवा निर्देशन दिने काम गर्ने गरेको बताउँछन् । यसरी प्रम्पटका आधारमा एआई प्रशिक्षित हुँदा यसले थप सटीक र सान्दर्भिक जवाफ दिन्छ ।
प्रम्प्ट इन्जिनियरले कुनै कोड गर्ने काम नभई एआईले दिने जवाफ थप राम्रो होस् भनेर प्रशिक्षण गराउनका लागि ब्याकइन्डमा अक्षरमा लेखेर छोटोछोटो प्रश्नजस्ता निर्देशनहरू दिन्छन् ।
च्याटजीपीटी ‘भाइरल’ हुनुअघि नै कपीडटएआईमा सन् २०२१ को सेप्टेम्बरदेखि काम थालेकी २९ वर्षीया प्रम्प्ट इन्जिनियर अन्ना बर्नस्टेनले अहिले धेरै प्रम्प्ट इन्जिनियर नभएको र लामो समयसम्म आफू मात्र एक्लै छु जस्तो लागेको बताइन् । कलेजमा अंग्रेजी पढेकी उनी प्रम्प्ट इन्जिनियर हुनुअघि कन्टेन्ट लेख्ने काम गर्थिन् ।
एआई रोजगारीमा वृद्धि
लिङ्क्डइनमा गत वर्षको तुलनामा जेनेरेटिभ एआईका पोस्टहरूको संख्या ३६ गुणा र जीपीटीसम्बन्धी रोजगारीको संख्या ५१ प्रतिशत बढेको बताइएको छ ।
प्रम्प्ट इन्जिनियरको रोजगारीले कति ठूलो बजार लिन्छ भन्ने अहिल्यै भन्न सकिन्न । तर, गुगल समर्थित एआई स्टार्टअप एन्थ्रोपिक प्रम्प्ट इन्जिनियर र लाइब्रेरियनका लागि तीन लाख ३५ हजार अमेरिकी डलर (करिब दुई करोड ७४ लाख नेपाली रुपैयाँ)बराबरको विज्ञापन खुलाइएको छ ।
अटोमेटेड रूपमा कागजात विश्लेषण गर्ने क्लारिटी इन्टेलिजेन्स कम्पनीले प्रम्प्ट दिएर एआईबाट उत्कृष्ट प्रतिक्रिया निकाल्न सक्ने व्यक्तिका लागि दुई लाख ३० हजार अमेरिकी डलरको रोजगारी खुलाएको छ । अहिले बजारमा प्रम्प्ट इन्जिनियरिङको कोर्स समेत उपलब्ध छ । कतिपयले कसरी प्रम्प्ट इन्जिनियर बन्ने भन्ने निःशुल्क सिकाइका भिडियोहरू पनि बनाएका छन् ।
तर, एआई उपकरण दिन प्रतिदिन निकै परिष्कृत बन्दै गइरहेकाले यस किसिमको रोजगारी कति दिगो हुन्छ भन्न सकिने अवस्था छैन । तर, यसले एकातिर रोजगारी कटौती गर्दा अर्काेतिर रोजगारी सिर्जना गर्ने सम्भावना उत्तिकै देखिन्छ । टाइम्सबाट ।
