काठमाडौं । नेकपा माओवादीका अध्यक्षसमेत रहेका प्रधानमन्त्री पुष्पकमल दाहाल प्रचण्डले नेकपा एमालेका नेपाली कांग्रेसलाई राष्ट्रपति दिऊँ भन्ने प्रस्ताव अस्वीकार भएपछि गठबन्धन तोडिएको खुलाएका छन् ।
बिहीबार आठ दलीय गठबन्धनको अभिमुखिकरण कार्यक्रममा उनले नेकपा एमालेका अध्यक्ष केपी शर्मा ओलीसँगको अन्तिम संवादमा कांग्रेसलाई राष्ट्रपति दिऊँ भन्ने प्रस्ताव राखेको र त्यो अस्वीकार भएको बताए ।
त्यस्तै प्रचण्डले बीचमा केही समय बरालिएको र अहिले एकै ठाउँ भएको बताए । चुनावमा जनताले दिएको मतको न्याय भएकोसमेत उनको भनाइ छ ।
प्रचण्डले आफूले विश्वासको मत लिँदा ओलीले संसद् विघटनको कुरा उठाएपछि आफूले पदका लागि विचार, मूल्यमान्यताको तिलान्जली नदिने बताएको सुनाए ।
“संसद् विघटन गर्नु सही थियो कि गलत थियो भन्ने विभेद आइसकेपछि यो गठबन्धन...। मलाई प्रधानमन्त्री त बनाउनुभयो, मैले केपीजीलाई त्यो पनि भन्ने गरेको थिएँ–तपाईंलाई धन्यवाद छ,” प्रचण्डले बैठकमा भने,“मलाई प्रधानमन्त्री बनाइदिनुभयो । तर म प्रधानमन्त्रीका निम्ति आफ्नो राजनीतिक विचार, मूल्य, मान्यतालाई तिलाञ्जली दिन सक्दिन । मेरा लागि विचार, राजनीति, संविधान र गणतन्त्र मूल कुरा हो भनेर प्रष्ट भनेको थिएँ ।”
यस्तो छ बैठकमा प्रचण्डले गरेको सम्बोधन
हामीले आठ दल भनेका छौं । वास्तवमा संसद्मा भएका र निर्वाचन आयोगमा दर्ता भएका १० दलभन्दा बढीको समर्थन रामचन्द्रजीलाई छ ।
प्रतिनिधि सभामा २ र प्रदेशसभमा २ सांसद रहेको नेपाल समाजवादी पार्टीको समर्थन रामचन्द्रजीलाई छ ।
तराई केन्द्रित आम पार्टीको पनि समर्थन छ । यसरी १० भन्दा बढी र स्वतन्त्र सांसदको समर्थन रहेको जानकारी गराउँछु ।
नेपालको राजनीतिक उतारचढाव र तरंगहरु आफ्नै मौलिक र विशेषतामा तरंगित हुने गरेको छ ।
मैले एउटा पार्टीको अध्यक्ष र प्रधानमन्त्रीको रुपमा जेजस्तो भूमिका खेले सबै मान्य सदस्य र नेता साथीहरुलाई राम्रोसँग थाहा छ ।
प्रतिनिधिसभामा विश्वासको मत प्राप्त गर्दैगर्दा नेपालका राजनीतिक दल र तमाम मान्य सदस्यहरुको विचार र भावना एउटा राष्ट्रिय सहमतिको रुपमा व्यक्त भयो । राष्ट्रिय एकताको नयाँ उचाइमा व्यक्त भयो ।
मैले त्यतिबेलमा नै भनेको थिएँ, आउने दिनमा राष्ट्रपति, उपराष्ट्रपति वा अन्य तटस्थ पदमा राष्ट्रिय सहमति गर्न उचित हुन्छ भनेर संकल्प त्यतिबेलै गरेको थिएँ ।
त्यसपछि मैले लगातार राष्ट्रिय समझदारीबाट अघि बढ्न आवश्यक छ भन्ने स्टेटमेन्ट दिँदै आएँ ।
त्यसका निम्ति संसद्मा भएका र प्रतिनिधिसभाको विश्वासको मत दिएका दलहरुको सर्वदलीय बैठक बालुवाटारमा बोलाएँ । त्यहा पनि मैले राष्ट्रिय सहमतिको आवश्यकता छ भनेको थिएँ ।
मेरो नेकपा एमालेका अध्यक्ष केपी शर्मा ओलीसँग बालुवाटारमा जुन अन्तिम संवाद गर्दै थियौं त्यो संवादमा मैले थोरै जोड, केपीजी देश अहिले अफ्ठ्यारोमा छ । अर्थतन्त्र, राजनीतिक स्थिति, राष्ट्र र भूराजनीतिक स्थितिले देखा परेका थुपै्र चुनौतीहरु राष्ट्रिय एकता, राष्ट्रिय स्वाधीनता, भौगोलिक अखण्डताका सन्दर्भमा देखा परेका समस्याहरु, सुशासनमा देखा परेका समस्याहरु सन्दर्भमा तपाईं र म जाऔं र नेपाली कांग्रेसलाई राष्ट्रपति तपाईंहरु उठाउनुस्, हाम्रो समर्थन हुन्छ भनौं भन्ने प्रस्ताव राखेको थिएँ ।
यसले देखा परेका चुनौती सामना गर्न राष्ट्रिय एकताको वातावरण बन्न सक्दछ ।
हामीले गएर नेपाली कांग्रेसलाई राष्ट्रपति तपाईंहरुको जिम्मा भनिदियौं भने त्यसले आम जनतामा संप्रेशित सन्देश आफैंमा शक्तिशाली हुनेछ ।
त्यो सन्देशले प्रतिगमनतिर जान चाहने शान्ति र संविधानमा विभिन्न खाले कसरत गर्न चाहने तत्वहरुलाई एउटा यस्तो खालको म्यासेज हुनेछ, उनीहरु त्यहाँबाट अघि बढ्न सक्ने अवस्था हुनेछैन भनेको थिएँ ।
दुर्भाग्य भनौं उहाँ त्यसमा सहमत हुनुभएन । उहाँले नेपाली कांग्रेसलाई कुनै हालतमा समर्थन गर्न नसक्ने भनेपछि त्यही बिन्दुबाट नै हामी औपचारिक ढंगले दुई ठाउँमा बन्यौं ।
यद्यपी, विश्वासको मत लिँदा नै संसद् विघटन सही कि गलत भन्ने प्रश्न उहाँले उठाइदिइसकेपछि हामी गठबन्धनमा थियौं ।
सैद्धान्तिक, राजनीतिक सांस्कृतिक, संवैधानिक धरालतमा टेकेर हामी गठबन्धनमा थियौं । हामी संघीय लोकतान्त्रिक गणतन्त्रको रक्षा, लोकतन्त्रको रक्षा, राष्ट्रिय एकताको रक्षा, शान्ति प्रक्रियाको समग्र हितको निम्ति एक भएको हो ।
त्यतिबेला चोचोमोचो मिलाएर सरकार बनाउन मात्रै गठबन्धन बनेको थिएन ।
पटक–पटक संविधान मिचेर लोकतान्त्रिक मूल्य मान्यतामाथि घात गरेर संसद् विघटनको दुष्प्रयासका विरुद्ध संघर्षको आवश्यकताबारे हामी एक ठाउँमा थियौं ।
आज फेरि त्यही स्थिति विश्वासको मतकै दिन देखा परेको हो ।
संसद् विघटन गर्नु सहि थियो कि गलत थियो भन्ने विभेद आइसकेपछि यो गठबन्धन...। मलाई प्रधानमन्त्री त बनाउनुभयो ,मैले केपीजीलाई त्यो पनि भन्ने गरेको थिएँ –तपाईंलाई धन्यवाद छ, मलाई प्रधानमन्त्री बनाइदिनुभयो । तर म प्रधानमन्त्रीका निम्ति आफ्नो राजनीतिक विचार, मूल्य,मान्यतालाई तिलाञ्जली दिन सक्दिन । मेरा लागि विचार, राजनीति, संविधान र गणतन्त्र मूल कुरा हो भनेर प्रष्ट भनेको थिएँ ।
पहिले पनि र अहिले पनि विचार, राजनीति देशको हित, संविधान, शान्तिको हित, शुसासन, विकास र समृद्धिप्रति समर्पित हुने नै हाम्रो प्राथमिकता हो ।
यस सन्दर्भमा तीतो अनुभव विगतमा भएका छन् ।
संविधानको संरक्षक, राष्ट्रिय एकताको प्रवद्र्धन गर्ने भनेर हाम्रो संविधानले राष्ट्रपतिलाई त्यो रुपमा परिभाषित गरेको छ । तर,पटक पटक त्यो पदको गरिमा, संविधानको मर्म र भावना गतिविधि गर्ने घटनाक्रम व्यहोर्यौंं ।
मलाई विश्वास छ अहिले १० दलका साझा उमेदवारको रुपमा (११ पनि हुन सक्छ) रामचन्द्र पौडेलजीलाई अघि सारेका छौं ।
राष्ट्रिय एकताको प्रवर्द्धनमा, राष्ट्रिय स्वाधीनता र भौगोलिक अखण्डताको संरक्षणमा, सुशासन र समृद्धिको यात्रामा रामचन्द्र पौडेलजीले आफ्नो भूमिकालाई...। हुन त उहाँले जेल नेलको सबै भोग्नुभएको छ ।
निर्वाचनअघि हामी सबै एकै ठाउँमा थियौं । मैले म भन्ने गरेको छु । कांग्रेसभित्र माओवादी छ । माओवादीभित्र कांग्रेस छ । कांग्रेसभित्र समाजवादी छ ।
सबै पार्टीभित्र एकअर्कामा हामी सबै छौं । हामीले पाएको मत सिंगै कसैको पनि होइन् । हामी सबैको साझा हो ।
बीचमा अलिकति बरालिएकै हौँ । अहिले त्यही ठाउँमा आएर बसेको छौं । मलाई लाग्छ अहिले जनता पनि खुसी छन् ।
आफूले हालेको भोट खेर गएन भनेर के होला के होला भन्ने थियो । ठिकै ठाउँमा हालिएको रहेछ भन्ने परेको छ ।
त्यतिबेला रामचन्द्रजी प्रधानमन्त्रीको उमेदवार भनेको थिएँ । आज राष्ट्रपतिको उमेदवार बनाउने भूमिका खेल्न पाएँ मलाई गर्व लागेको छ । उहाँले राम्रोसँग भूमिका निर्वाह गर्नुहुन्छ ।
