काठमाडौं । स्याङ्जाको वालिङ नगरपालिका–६, आम्डालीमा ट्याक्टर दुर्घटना हुँदा दुईजनाको मृत्यु भएको छ । ट्याक्टर चालक स्याङ्जाकै चापाकोट नगरपालिका–२, धुर्कोटका ३२ वर्षीय नवीन सुनार र परिचालक वालिङ–८, मिर्दिका १४ वर्षीय सोविन विकको मृत्यु भएको हो ।

दुर्घटनापछि सुनारलाई उपचारका लागि प्राथमिक स्वास्थ्य केन्द्र वालिङ पुर्‍याउनासाथ चिकित्सकले मृत घोषणा गरेका थिए । परिचालक विकको उपचारका क्रममा पोखरास्थित गण्डकी मेडिकल कलेजमा मृत्यु भएको वडा प्रहरी कार्यालय वालिङले जनाएको छ ।

भञ्ज्याङबाट मिर्दितर्फ ढुंगा लिएर जाँदै गरेको ग१त ६८८६ नम्बरको ट्याक्टर हिजो बेलुका करिब ८ बजे सडकबाट अन्दाजी १५ मिटर तल खसेको थियो ।