जनकपुरधाम । इलाका प्रहरी कार्यालय महेन्द्रनगरको थुनुवा कक्ष फोडेर फरार भएका ६ मध्ये एकजना पक्राउ परेका छन् । हातहतियार तथा खरखजाना मुद्दाका आरोपित २८ वर्षीय रोशन महतो सोमबार नै पक्राउ परेका छन् । प्रहरीले उनलाई फरार भएको १२ घण्टा नपुग्दै पक्राउ गरेको हो ।

आइतबार राति महतोसहित विभिन्न अभियोग लागेका ६ जना थुनुवा कक्ष फोडेर फरार भएका थिए । 

धनुषाको मिथिला नगरपालिका–५ घर भएका रोशन यही माघ १२ गते नक्टाझिजबाट पेस्तोलसहित पक्राउ परेका थिए । उनी चार दिन थुनामा बसेका थिए । उनलाई प्रहरीले हतियार खरिदबिक्री गर्ने गरेको आरोपमा पक्राउ गरेको थियो ।।

यही मुद्दामा फरार भएका उनका साथी शंकर महतो भने अझै फरार छन् । शंकर रोशनकै बयानपछि पक्राउ परेका थिए । 

उनीहरूलाई प्रहरीले गत शनिबार पत्रकार सम्मेलन गरी सार्वजनिक गरेका थिए । त्यसको भोलिपल्ट आइतबार उनीहरूमाथि पाँच दिन म्याद थपी प्रहरीले अनुसन्धान थालेको थियो ।

यस्तै, अभद्र व्यवहार मुद्दामा यही माघ १० गते पक्राउ परेका मिथिला नगरपालिका–२ का २५ वर्षीय हरिदीप सिंह पनि फरार छन् । उनीमाथि सात दिन म्याद थप गरी प्रहरीले अनुसन्धान गरिरहेको थियो । हरदिप पाँच दिन थुनामा बसेर उनीहरूसँगै फरार भएका छन् । 

लागुऔषध मुद्दामा पुस २८ गते पक्राउ परेका क्षिरेश्वरनाथ नगरपालिका–५ का ३० वर्षीय विनोद कुमार शर्मा पनि फरार छन् । उनी १८ दिनदेखि थुनामा थिए । उनीबारे अनुसन्धानका लागि दुईपटक म्याद थप भएको थियो । तर, प्रहरीको अनुसन्धान पूरा नभएकाले उनलाई थुनामै राखिएको थियो ।

यस्तै, राष्ट्र सेवामा बाधा विरोध गर्दा पक्राउ परेका क्षिरेश्वरनाथ नगरपालिका–२ का २५ वर्षीय अमित मण्डल र रोशन यादव पनि फरार छन् । यी दुवै जना १२ दिनदेखि थुनामा थिए । 

उनीहरू थुनुवा कक्षको भित्ता फुटाएर आइतबार राति २ देखि ४ बजेको बिचमा फरार भएको प्रहरीको अनुमान छ । घटनामा प्रहरीमाथि पनि शंका गरिएको छ । इलाका प्रहरी कार्यालयको नेतृत्व गरिरहेको प्रहरी निरीक्षक (इन्सपेक्टर)बेचन यादवमाथि छानबिन गर्न दुईवटा समिति गठन भएको छ ।

वरिष्ठ प्रहरी उपरीक्षक (एसएसपी) मनोज यादवको नेतृत्वमा मधेस प्रदेश प्रहरी कार्यालयले छानबिन समिति गठन गरेको हो ।

यस्तै, जिल्ला प्रहरी कार्यालय धनुषाले पनि प्रहरी नायव उपरीक्षक (डीएसपी) प्रदीपबहादुर क्षेत्रीको संयोजकत्वमा पाँच सदस्य छानबिन समिति गठन गरेको छ । दुवै समितिले सुक्ष्म रूपमा छानबिन गरिरहेको बताएका छन् ।