जनकपुरधाम । धनुषाको मिथिला नगरपालिका–५ श्रीपुरका ओमप्रकाश महतो (दिलीप) हत्या मुद्दामा अदालतले प्रतिवेदन तयार पार्ने व्यक्तिलाई झिकाउन आदेश दिएको छ । जिल्ला अदालत धनुषाका न्यायाधीश चित्रबहादुर गुरुङको इजलासले प्रतिवेदन तयार पार्ने व्यक्ति बुझ्ने आदेश दिएको हो ।
०७६ पुस २५ गते चुरियामाई बालुवा प्रशोधन क्रसर उद्योगमा आबद्ध व्यक्तिहरूले औरही खोलामा दिलीपको हत्या गरेको आरोप उनको परिवारले लगाएको छ । घटनास्थलमा पुगेर तत्कालीन प्रहरी निरीक्षक राम लेखी यादव, रामकुमार भण्डारी र कुलान्नद अमातको टोलीले प्रतिवेदन तयार पारेको थियो ।
अदालतले उनीहरू तीनैजनालाई अदालतमा हाजिर हुन आदेश दिएको हो ।
यसअघि गत मंसिर २९ गते हत्यामा प्रयोग भएको भनिएको टिपर धनीलाई बुझ्ने आदेश दिइएको थियो । गएको पुस २८ गते अदालतमा उनको बकपत्र भएको थियो ।
यो मुद्दामा हालसम्म २० वटा पेसी चढिसकेको छ । तर, मुद्दा किनारा लागेको छैन । न्यायका लागि दिलीपको परिवारले तीन वर्षदेखि अदालत धाइरहेको छ ।
हत्या आरोपमा धनुषा प्रहरीले क्रसर सञ्चालक विपीन महतोसहित सातजनालाई पक्राउ गरेको थियो । पक्राउ परेकामध्ये धरौटी रकम बुझाएर चारजना रिहा भइसकेका छन् । उनीहरू अहिले तारेखमा छन् । दिलीप हत्या आरोपमा पक्राउ परेका रोसन कुमार यादव, विनादे महतो, सत्यनारायण महतो र सत्रुधन महतो रिहा भइसकेका छन् । मुनिन्द्र महतो, विपीन महतो र जितेन्द्र महतो पुर्पक्षका लागि थुनामा छन् ।
जाहेरीवाला पक्षका वकिलले आरोपितलाई जन्मकैद हुनुपर्ने र पीडित परिवारलाई क्षतिपूर्ति दिनुपर्ने माग गरेका छन् ।