काठमाडौं । कतारमा जारी फिफा विश्वकपमा बुधबार खलिफा अन्तर्राष्ट्रिय रंगशालामा जापानले आफ्नो पहिलो खेलमा चारपटकको विश्वविजेता जर्मनीलाई २–१ ले पराजित गर्यो । यो जित जापानी फुटबल टिमले विश्वकप जितिसकेको टिमविरुद्ध निकालेको अहिलेसम्मकै उत्कृष्ट नतिजा थियो ।
विश्वकपको चारपटकको च्याम्पियनलाई हराउनु जापानी समर्थकका लागि सानो कुुरा थिएन । तर, उनीहरुले यो खुसीलाई बिल्कुलै फरक अन्दाजमा मनाए । आदर्शताका लागि विश्वमै परिचित जापानी समर्थकले जितपछि पूरा खलिफा रंगशाला सफा गरे । उनीहरुको यो कार्यले अहिले विश्वभरका फुटबल समर्थकको ध्यान खिचेको छ ।
त्यसो त जापानी समर्थकले खेलपछि रंगशाला सफा गरेर स्वच्छताको सन्देश दिएको यो पहिलो घटना भने होइन । यसअघि रुसमा भएको २०१८ को विश्वकपमा पनि जापानी समर्थकले खेलपछि रंगशाला सफा गर्ने गरेका थिए ।
जापानीहरुको संस्कृतिअनुसार उनीहरुलाई सानैदेखि स्वच्छताबारे सिकाइने गरिन्छ । २०१८ मा ओसाका विश्वविद्यालयका प्राध्यापक स्कट नर्थले जापानीहरुको यो कार्य ‘आफ्नो जीवनशैली गौरव गर्नु’ भन्ने सन्देशको भएको बताएका थिए ।
“रंगशाला सफा गर्नु उनीहरुलाई विद्यालयमा सिकाइएको आधारभूत ज्ञानको विस्तार हो । जहाँ उनीहरुलाई विद्यालयका कक्षाकोठा र हलहरु आफै सफा गर्नुपर्ने कुरा सिकाइन्छ,” प्राध्यापक नर्थले भनेका थिए ।
विश्वकपको समूह ‘ई’ रहेको जापानले अब आइतबार कोस्टारिका र बिहीबार स्पेनसँग खेल्नेछ ।