मतदानको दिन नजिकिँदै जाँदा फाटफुट झडप र बल प्रयोगका घटना पनि हुन थालेका छन् । यस्तो उद्दण्ड प्रवृत्ति तत्काल रोकिएन भने कुनै पनि समय अप्रिय घटना हुनसक्छ । 

चुनावमा जनशक्ति प्रदर्शन जति स्वाभाविक मानिन्छ बाहुबलको प्रयोग उत्तिकै आपत्तिजनक ठानिन्छ । यद्यपि, जनशक्ति प्रदर्शनको समेत सीमा निर्धारण गरिएको हुन्छ र त्यसको उल्लङ्घन गर्न पाइँदैन । 

परन्तु, सत्ताका व्यसनीहरू निर्वाचनजस्तो लोकतान्त्रिक अभ्यासमा पनि जालझेल र बल प्रयोग गर्न हिचकिचाउँदैनन् । नेपालका सत्ता व्यसनीहरू पनि चुनाव बल प्रयोगका मामिलामा अपवाद बन्न सकेका छैनन् । 

उमेदवार र तिनका समर्थकले चुनाव जित्न चाहनु स्वाभाविकै हो । तर, जसरी पनि चुनाव जित्न खोज्नु भने भने कानुनी र नैतिक दुवै दृष्टिबाट दण्डनीय अपराध हो । 

राजनीति गर्नेहरूले भने यस्ता हर्कतलाई अपराध ठान्ने गरेको देखिँएन । सम्भवतः अहिले देखिएको फाटफुट हिंसात्मक क्रियाकलाप यही जसरी पनि जित्न खोज्ने मानसिकताको उदाहरण हो । 

लोकतान्त्रिक अभ्यासमा विश्वास गर्ने हो भने कसैले पनि हिंसाको समर्थन वा ढाकछोप गर्नु हुँदैन । कुनै पनि आधारमा निर्वाचनमा हुने हिंसाको औचित्य सिद्ध गर्न सकिँदैन । 

यसैले राजनीतिक दलका नेताहरूले आफ्ना कार्यकर्ता र समर्थकलाई संयमित हुन निर्देशन दिनुपर्छ । दुर्भाग्य, ठूला भनिएका प्रायः सबै दलका नेताले कार्यकर्तालाई ‘जसरी पनि जित्न’ उत्प्रेरित गरेको देखिन्छ । 

नेताहरूबाट अपेक्षा नभएकाले लोकतन्त्रविरुद्ध हुने हुलदंगा रोक्न जनता स्वयं नै अगाडि सर्नुपर्ने देखिएको छ । लोकतन्त्रको रक्षाका लागि चुनावलाई स्वतन्त्र र निष्पक्ष बनाउने दायित्व जनताको पनि हो ।

निर्वाचनमा हुने हिंसा बढ्दै गए लोकतन्त्र नै बाहुबलीले अपहरण गर्न सक्छन् भने हिंसाको विरोध गर्दा लोकतन्त्रको संरक्षण र संवर्धन हुन्छ । यसैले सबै लोकतन्त्रवादी सजग होऊन् ।