गौशाला । अपराह्नको ४ बजेको छ । पशुपतिक्षेत्रमा धार्मिक पर्यटकहरुमात्र होइन, विदेशिन लागेका र विदेशबाट आइपुगेका मानिसहरु पनि भेटिन्छन् ।

फुटपाथमा भीडभाड छ । सबैलाई आ–आफ्नै हतारोले छोपेको छ । सबैको व्यस्तता फरक छ । राजनीतिक दलका नेता कार्यकर्तालाई भने चुनावी चटारोले भ्याइनसक्नु छ । 

पिङ्गलास्थान काठमाडौं महानगरपालिका वडा नम्बर ८ मा पर्छ । यो काठमाडौं निर्वाचन क्षेत्र नम्बर ४ हो ।

‘सैँ पनि एमाले, मै पनि एमाले’ गीत बजाउँदै एक हुल नेता कार्यकर्ता अघिअघि छन् ।
 
मंगलबार अपराह्न बाह्रखरी टोली यहाँ पुग्दा नेकपा (एमाले)बाट उमेदवार बनेका राजन भट्टराई हात जोडेर रफ्तारमा अघि बढिरहेका थिए । 

अघिअघि बद्री पंगेनी र प्रिया भण्डारीको स्वरमा रहेको गीत बजिरहँदा चुनावी प्रचारमा होमिएका केही कार्यकर्ता नाचेको पनि देखियो ।
 
भट्टराईको चुनावी घरदैलोलाई बाह्रखरीले दुईघण्टा पच्छ्यायो । निर्वाचन प्रचारक रामकुमार डंगोलले ‘ए हजुर, नेकपा (एमाले) घरदैलोमा आएका छौँ है । उहाँ राजन भट्टरार्ईलाई भोट हाल्नु’ भन्दै पिङ्गलास्थानमा चर्को स्वरमा बोल्दै गए । राजन भने ‘नमस्कार भोट सूर्यमा’ भन्दै आफ्नै रफ्तारमा लम्किरहे ।
 
“काकी चिन्नुहुन्छ नि उहाँलाई ? राजन भट्टराई, भोट चाहिँ सूर्यमा है,” डंगोलले भनिरहँदा राजन पनि ‘नमस्कार, भोट सूर्यमा’ भन्दै पछिपछि लागे । पुनः अलि अघि लागेपछि ‘आमा बुबा दाजुभाइ, भोट हालौं सूर्यलाई’ चर्को नारा लाग्यो ।
 
“भोट मलाईं है बैनी,” राजनले भनिरहँदा उनकै टिममा रहेकी महिला कार्यकर्ताले ‘उसलाई भन्नै पर्दैन, परिवारकै भोट हामीलाई आउँछ’ भन्दै अघि बढाइन् । 

“ए राधेश्याम दाइ, ए भाउजू, राजन आउनुभएको छ, झर्नु त तल,” डंगोल पुनः कराए । केही मिनटमै अब यहाँ हामीले प्रचार ग¥यौँ, अघि लागौँ भन्दै राजनको टोली अघि लाग्यो ।

२०३७ सालमा पद्मोदय माध्यमिक विद्यालयबाट वाम विद्यार्थी राजनीतिमा होमिएका राजन २०३८ सालमा सोही विद्यालयको अनेरास्ववियुको प्रारम्भिक कमिटी सदस्य बनेका थिए । २०४६ सालमा अनेरास्ववियूको केन्द्रीय कमिटी सचिव भएका उनले २०४१ सालमै जेल जीवन बिताएका थिए । 

२०५३ सालमा नेकपा (एमाले)को विदेश विभागको सचिव बनेका उनी एमालेको नवौँ महाधिवेशनबाट पार्टी केन्द्रीय सदस्य र दशौँ महाधिवेशनबाट स्थायी कमिटी सदस्यसँगै विदेश विभाग प्रमुखको जिम्मेवारीमा छन् । 

अन्तर्राष्ट्रिय मामिला विज्ञ र प्रधानमन्त्री बन्दा केपी शर्मा ओलीको परराष्ट्र सल्लाहकार बनेर उनले काम गरिसकेका छन् ।
 
भट्टराईले ०७४ को निर्वाचन पनि यहीँबाट (क्षेत्र नम्बर ४ बाट) लडेका हुन् । 

तर, नेपाली कांग्रेसका तत्कालीन केन्द्रीय सदस्य तथा अहिलेका महामन्त्री गगनकुमार थापासँग पराजित भए । अहिले सोही हारको बदला लिने र संसद्को यात्रा गर्ने दाउमा उनी छन् । जसका लागि उनी चुनावी मैदानमा सक्रिय छन् । 

पिङ्गलास्थानमै भेटिएकी विना थापाले भट्टराईलाई अबिर र माला लगाइदिइन् । थापा आफू राप्रपा पूर्वकार्यकर्ता र विभिन्न संघसंस्थामा आवद्ध भएको बताउँछिन् । अहिले योग्य उमेदवारलाई भोट हाल्ने र त्यो राजन भट्टराईमा देखेकाले उनको समर्थनमा खुलेको उनले बताइन् । 

“देश बचाउने र देशको माया गर्ने, वृद्धवृद्धाको माया गर्ने र देश बनाउने अभियान चाहिएको छ । त्यो अभियान ‘केपी बा’मा छ । यहाँ त्यसको प्रतिनिधित्व गर्ने राजन सर नै हो,” भट्टराई हिँडेपछि बाह्रखरीसँग उनले भनिन् । 

पाँच बजेसम्म राजनले धेरै मतदाता भेट्न पाएनन् । तल बाटोबाट नमस्कार गर्दै उनी अघि बढिरहे । तर, पाँच बजेपश्चात् तिलगंगा पुगेपछि धेरै मतादातासँग उनको भेट भयो । 

तिलगंगगा आँखा अस्पतालपछिको बाक्लो नेवार टोलभित्र उनको उपस्थितिले माहोल गरम बनायो ।  भित्री गल्लीहरुमा भने उनको रफ्तारमा ब्रेक लाग्यो । साँझ पर्दा मतदाताहरुमा उत्साह पनि देखिन्थ्यो ।

पिङ्गलास्थानमा भेटिएका एक वृद्ध मतदाताले उनलाई जितको आर्शिवाद दिए ।  सोही स्थानका मतदाता मित्रलाल भट्टराईले ‘अबको पालो राजनको’ भएको बताए । 

“जित्नुस् । अब पालो तपाईंहरुको हो । तर, अरुले खुट्टा तानेर गर्नै दिँदैनन्,” भीडबाट आवाज सुनियो ।

वडा नम्बर ८ कै मतदातामाझ कार्यकर्ताले भत्ता दिने पार्टी भोट माग्न आएको भन्दै राजनको परिचय गराए ।  “भत्ता दिने पार्टी, बुढाबुढी पाल्ने पार्टी आयो,” ती कार्यकताले एमाले आएको जानकारी गराए । 

पशुपति नजिकै पुग्दा वृद्ध मतदाताले भट्टराईलाई विश्वास दिलाए, “चुनाव जितिन्छ । चिन्ता गर्नै पर्र्दैन । यता राम्रो भएको छ ।”

वडा नम्बर ८ को वडा कमिटी सदस्य सीता पोखरेलले भने मतदाताहरु माझ आफ्नो टोलमा सूर्यमा एकछाप भोट झर्ने बताउँदै थिइन् । 

तर, वडा नम्बर ८ गएको स्थानीय तह निर्वाचनबाट कांग्रेसले अध्यक्ष जितेको वडा हो ।
 
“पहिलाभन्दा माहोल राम्रो छ, जितिन्छ । राम्रो काम गरेर खुसी बनाउनु भएको छ उहाँले,” उनले भनिन्, “वडामा टिकट वितरण राम्ररी नहुँदा अस्ति चुनाव हारियो । अब चुनाव हारिँदैन ।” 

मत माग्न हिँडेको एमाले टोलीले दुई घण्टासम्म जितेर गएर के गर्छु भनेर चाहिँ भनेन ।  बरु आफ्नो प्रतिवद्धतापत्रसहितको कागजात भने मतदातालाई दिँदै हिँड्यो ।
 
के छ राजन भट्टराईको प्रतिवद्धतापत्रमा ?

भट्टराईले मतदातामाझ आफ्नो चुनावी बाचा पनि बाँडेका छन् ।  मुलुकको संविधानको संरक्षण र कार्यान्वयनको प्रतिबद्धता जनाएका छन् । 

प्रदेशसभा सदस्यहरु ४ ‘क’का उमेदवार तेजप्रसाद ढकाल र ‘ख’का उमेदवार जयराम थापासहितको प्रतिबद्धतामा जिते मूल रुपमा नीति निर्माणमा प्रभावकारी भूमिका हुने उल्लेख छ । 

संघीय सरकार, प्रदेश सरकार र स्थानीय तहमा गरिने विधि निर्माण, बजेट बाँडफाँट र समृद्धिका योजनको प्रभावकारी कार्यान्वयमा सहजीकरण गर्ने उनीहरुको प्रतिबद्धता छ । 

निर्वाचन क्षेत्रका समस्याहरु समाधान गर्ने प्रतिबद्धता पनि उनीहरुले जनाएका छन् । 

अबको ५ वर्षमा निर्वाचन क्षेत्रका कुनै पनि घर धाराविहीन नहुने र खानेपानीको समस्या पूर्णरुपमा सम्पन्न गर्ने प्रतिबद्धता पनि जनाएका छन् । 

त्यस्तै, निर्वाचन क्षेत्रभित्रका सुकुम्बासीहरुलाई लालपुर्जा प्रदान गरी समस्याको दीर्घकालीन समाधान गर्ने पनि प्रतिबद्धतापत्रमा उल्लेख छ । 

भट्टराईले विकास निर्माण तथा नीति निमार्णमा महिलाको सहभागिता र नेतृत्व विकासमा जोड दिने प्रतिबद्धता पनि व्यक्त गरेका छन् ।

उनले यो निर्वाचन क्षेत्रको विकासका लागि बजेट पार्न गरेको पहलको फेहरिस्त पनि जनतामाझ बाँडेका छन् । 

प्रधानमन्त्री ओलीको परराष्ट्र सल्लाहकार हुँदा उनले यो निर्वाचन क्षेत्रमा विकासका लागि बजेट ल्याउन भूमिका खेलेको मतदाताहरु बताउँछन् ।

भट्टराई पनि अघिल्लो निर्वाचनमा विवेकशील पार्टीले मत काटेका कारण पराजित हुनुपरेको भन्दै अहिले आफ्नो जित सहज भएको बताउँछन् ।

“यो क्षेत्रको अघिल्लो निर्वाचनमा समानुपातिक मत हेर्ने हो भने एमाले पहिलो पार्टी हो । समानुपातिक मत ल्याएको विवेकशील साझाले कांग्रेसमा भोट हाल्दा पराजित हामी भएका हौँ,” उनले बाह्रखरीसँग भने, “विवेकशीलको प्रत्यक्षमा भन्दा चार हजार कम मत परेको थियो । अहिले त्यो अवस्था छैन । जनताले स्पष्ट बुझिसकेका छन् ।”

उनले आफ्नो पहलमा धेरै विकासका काम भएको भन्दै जनताले अहिले सही मूल्यांकन गर्ने बताए ।

“मेरै पहलमा ठूलो बजेटको व्यवस्थापन भएर विकास निर्माणका कामहरु हामीले गरेका छौँ,” उनले भने, “त्यसले हामीले जनमत बढेको अनुभूति गरेका छौँ । बाटो, ढलको कुरामा हाम्रो पहल रहेको छ ।”
तस्बिर : हरिशजंग क्षेत्री/ बाह्रखरी