सुर्खेत । कर्णाली प्रदेशका कृषकलाई यति बेला धानबाली भित्र्याउन र जोतखनको चटारो छ । उमेदवार पनि खेतमै पुगेर भोट माग्न थालेका छन् ।

अहिले कर्णालीका विभिन्न जिल्लामा उमेदवार खेतबारीमा पुगेर कृषकसँग भोट माग्दै गरेका दृश्य देखिन्छ । धान भित्र्याउने कामले दिनभर खेतबारीमा रहने कृषकसँग भेटघाट, परिचय र भोट माग्न उमेदवार खेतबारीमै पुग्ने गरेका हुन् । उमेदवार खेतबारीमै पुगेर भोट माग्नुपर्ने बाध्यताजस्तै बनेको छ ।

प्रदेशसभातर्फ सुर्खेत क्षेत्र नम्बर–१ ‘ख’बाट उमेदवार रहेका खड्कबहादुर पोखरेल मतदाता खेतमै भेटिने भएकाले भोट माग्न आफू त्यहीँ पुगेको बताउँछन् । “खेतबारीमा काम गर्दै गरेका कृषक तथा मतदातासँगै काममा सहयोग गर्दै मत माग्ने क्रम जारी छ,” उनले भने ।

उमेदवारले नागरिकका साना–साना समस्यालाई उठान र पूरा गर्ने वाचा समेत गरेका छन् । टोलबस्तीका समस्यालाई उमेदवारले प्राथमिकतामा राख्ने गरेका छन् ।

प्रदेशसभा सदस्य पदकै उमेदवार रहेका मुगुका गोपाल बमले कृषकका खेतबारीमै पुगेर सडक, खानेपानी, शिक्षा, स्वास्थ्य र कृषि क्षेत्रको विकासका विषयमा छलफल हुने गरेको बताए । “आफू निर्वाचित भएर आए निर्वाचन क्षेत्रका ग्रामीण सडक कालोपत्र, सामुदायिक विद्यालयको शैक्षिक गुणस्तर वृद्धि, कृषि पेसातर्फ युवालाई आकर्षित गर्नेलगायत गाउँमै रोजगारी सिर्जना हुनेखालका कार्यक्रमहरू ल्याउन प्राथामिकता दिन्छु,” उनले भने ।

त्यहाँ उमेदवारले मत माग्ने र विकासका विषयमा छलफल मात्र गर्दैनन्, धान भित्र्याउन र खेतबारी जोत्नमा सहयोग समेत गर्छन् ।

नेता–कार्यकर्तालाई खेतबारीमा मत माग्न हतार र बाध्यता भए पनि कृषकलाई भने उमेदवारप्रति खासै चासो र रुचि देखिँदैन । कृषक हरेक निर्वाचनमा उमेदवारका आश्वासन र सपनाबाट दिक्क देखिन्छन् ।

प्रदेशसभा सदस्यकै अर्का उमेदवार जाजरकोटका राजीवविक्रम शाहले कृषकमा उमेदवारको जस्तो निर्वाचनको चहलपहल नदेखिएको बताए ।

कर्णालीका १० जिल्लामा अहिले खेतबारीमा धान पाकेको देखिन्छ । कतैकतै तोरी खेती गर्न सुरु गरिएको छ । आकाशेखेतीमा भर पर्ने कृषकलाई धान भित्र्याएपछि खेतको बाँझो जोत्ने हतार समेत सुरु हुन्छ ।