बुटवल । मंसिर ४ का लागि तय गरिएको संसदीय निर्वाचन नजिकिँदै छ । राजनीतिक दलहरूले उमेदवारको अन्तिम टुंगो अझै लगाउन सकेका छैनन् । तर, नेताहरूले घरदैलो अभियान थालिसकेका छन् ।

यसै क्रममा गृहमन्त्रीसमेत रहेका कांग्रेस नेता बालकृष्ण खाँण र नेकपा (एमाले)का उपाध्यक्ष विष्णु पौडेल डेरा जमाएरै रूपन्देहीमा बस्न थालिसकेका छन् ।

बालकृष्ण खाँण

खाँण आजभोलि हप्तामा कम्तीमा पाँच दिन रूपन्देहीमा बिताउन थालेका छन् । रूपन्देहीमा हुने गरेका प्राय कार्यक्रममा उपस्थिति जनाइरहेका छन् । निर्वाचन आयोगले आचारसंहिता जारी गरेपछि भने उनी सार्वजनिक कार्यक्रममा सहभागी भएका छैनन् ।

रूपन्देही क्षेत्र नम्बर ३ बाट एकल रूपमा सिफारिस भएका खाँण क्षेत्र नम्बर २ बाट पनि सिफारिस भएका छन् । क्षेत्र नम्बर २ बाट उनीसहित चारजना सिफारिस भएका छन् । 

रूपन्देही ३ एमाले नेता घनश्याम भुसाल र राष्ट्रिय प्रजातन्त्र पार्टी (राप्रपा)का नेता दीपक बोहोराको पनि क्षेत्र हो । त्यस कारण उनी बढी सक्रिय बनेका छन् । खाँणले निर्वाचनलक्षित सम्पर्क कार्यालय नै सुरु गरिसकेका छन् । 

यसपटक रूपन्देहीमा खाँणलाई चुनाव जित्न सहज छैन । ०७४ मा समानुपातिक सांसद बनेका खाँणलाई यसपटक चुनौतीको सामना गर्नुपर्ने देखिन्छ । 

पाँच दलीय गठबन्धन भए पनि श्रीमतीको कारण उनलाई केही चुनौती हुने देखिन्छ । 

कांग्रेस केन्द्रीय सदस्यसमेत रहेका खाँणकी धर्मपत्नी मञ्जु खाँणलाई समानुपातिकतर्फको बन्दसूचीको ९ नम्बरमा राखिएको छ । समाचार तयार पार्दासम्म मञ्जुको नाम ९ नम्बरमै रहेको छ । जसलाई लिएर खाँणकै कार्यकर्ताहरू असन्तुष्ट बनेका छन् । ०७४ मा आफू समानुपातिक सांसद बनेको र यसपटक आफूसहित श्रीमतीलाई पनि अघि सारेपछि कार्यकर्ताहरू असन्तुष्ट बनेका हुन् । अर्थात् उनकी श्रीमती मञ्जुको नाम फिर्ता हुनुपर्ने कार्यकर्ताहरूको माग छ ।

अन्यथा आफ्नै कार्यकर्ताबाट असहयोग भएमा खाँणलाई संकट पर्ने देखिन्छ । 

अर्कोतिर एमाले र राप्रपाबिच तालमेलको सम्भावना छ । तालमेल भएमा उनीमाथि थप चुनौती बढ्ने नेताहरू बताउँछन् ।

तर, पाँच दलीय गठबन्धनमा तलमाथि नभएमा रूपन्देही ३ मा खाँण सुरक्षित देखिन्छन् । स्थानीय तहको निर्वाचनको मतलाई आधार मान्ने हो भने बुटवल, तिलोत्तमा, सिद्धार्थनगर, सुद्धोधनलगायतका पालिकामा कांग्रेस विजयी भएको छ । जसले गर्दा उनी सुरक्षित देखिन्छन् । 

बुटवल ३ मा एमाले नेता भुसाल र खाँणबिच प्रतिष्पर्धा हुने करिब निश्चितजस्तै छ ।

विष्णु पौडेल 

संसद् अन्त्य भएसँगै एमाले उपाध्यक्ष पौडेल दैनिकजसो रूपन्देहीका विभिन्न कार्यक्रममा सहभागी भइरहेका छन् । रूपन्देही २ बाट एकल सिफारिस भएका पौडेल चौथोपटक सांसद बन्ने दौडमा छन् । 

पौडेल ०६४ सालमा भएको पहिलो संविधानसभा निर्वाचनदेखि निरन्तर रूपन्देही २ बाट निर्वाचित हुँदै आएका छन् ।पौडेलले ०६४ मा माओवादीका भक्ति पाण्डे, ०७० मा डा. बाबुराम भट्टराई र ०७४ मा कांग्रेसका कांग्रेसका युवराज गिरीलाई हराएका थिए ।

एमालेका नेताहरू रूपन्देहीलाई विकासको 'रोलमोडल' जिल्ला बनाउने उद्घोष गरेका पौडेलले विकासप्रेमी नेताको रूपमा आफ्नो पहिचान बनाएको बताउँछन् । पौडेलको रूपन्देहीमा आफ्नो घर भने छैन । उनी निर्वाचनका लागि यस क्षेत्रमा आउँदा भाडामा घर लिएर सचिवालयदेखि सबै कामहरू गर्दै आएका छन् ।

यस वर्ष पनि पौडेलले बुटवल ११ कालिकानगरमा असोज ३ गते घर भाडामा लिएर निर्वाचनका गतिविधि थालिसकेका छन् । अघिल्लोपटक वाम गठबन्धनको सहयोगमा निकै सहज जित निकालेका पौडेललाई यसपटक भने पाँच दलीय गठबन्धनको सामना गर्नुपर्नेछ ।

नेता पौडेलका लागि यसपटक आफ्नै पूर्वसहकर्मीहरू नै बाधक हुने देखिएका छन् । ०७४ सालको जितमा पौडेलसँग विजयोत्सव मनाएकाहरू नै यसपटक तगारो बन्नेछन् । ०७४ मा एमाले र माओवादीबीच गठबन्धन बनेको थियो । अहिले एमालेसमेत विभाजन भएर नेकपा (एकीकृत समाजवादी) बनेको छ । जसकारण आफ्नै पूर्व नेता र कार्यकर्ताहरू यसपटक पौडेलका लागि पर्खाल बन्ने देखिन्छ ।

पौडेल अहिले चुनावलक्षित विभिन्न कार्यक्रममा सहभागी बनिरहेका छन् । उनी फरक राजनीतिक विचारधारा भएका व्यक्तिहरूसमक्ष पनि पुगिरहेका छन् ।

एमाले निकट मानिने एकजना विश्लेषक पौडेलमा यसपटक डर देखिएको बताउँछन् । "निवाचन हो । पाँच दलीय गठबन्धन पनि छ । पौडेलजीको क्षेत्र पर्ने स्थानीय तहमा कांग्रेससहितको गठबन्धनले जितेको छ । यसले डर त पक्कै लागेको छ । यही डरले त हो यति सहज बनेको," ती विश्लेषकले भने ।