बुटवल । आउँदो मंसिर ४ गते हुने प्रतिनिधिसभा र प्रदेशसभा सदस्य निर्वाचनको चहलपहल सुरु भएको छ । एउटा मात्र निर्वाचन क्षेत्र रहेको अर्घाखाँचीमा चुनावी रौनक बढेको छ ।
नेता टोपबहादुर रायमाझीले नेकपा (माओवादी केन्द्र)बाट प्रतिनिधिसभा सदस्यमा ‘ह्याट्रिक’ गरेका थिए । अब उनलाई कसले टक्कर दिनेछ भन्ने यति बेला चर्चाको विषय बनेको छ । यो विषय यस कारण पनि चर्चामा छ कि रायमाझी अहिले नेकपा (एमाले)का सचिव हुन् । सर्वोच्च अदालतको आदेशबाट तत्कालीन नेकपा विभाजन भएपछि उनी एमालेतिर लागेका हुन् ।
अर्घाखाँचीमा सत्ता गठबन्धनबाट नेपाली कांग्रेसका नेता उमेदवार बन्ने प्रबल सम्भावना छ । रायमाझीलाई रोक्नका लागि उपसभामुख एवं कांग्रेस केन्द्रीय सदस्य पुष्पा भुसाल, नेता डा. रामबहादुर बीसी, पूर्वराज्यमन्त्री रेवती भुसाल, कांग्रेस लुम्बिनी प्रदेशका सहमहामन्त्री विष्णु मुस्कान र कांग्रेस महाधिवेशन प्रतिनिधि लेखनाथ पोखरेलमध्ये एक उमेदवार बन्ने चर्चा छ ।
रायमाझीले ०६४ देखि अर्घाखाँचीबाट लगातार निर्वाचन जितेका छन् । विगतमा माओवादीबाट प्रतिस्पर्धा गरेका उनी अहिले एमालेबाट मत माग्ने तयारीमा छन् ।
गएको स्थानीय तह निर्वाचनमा गठबन्धनविरुद्ध एक्लै भिडेर यहाँ पार्टीका उमेदवारलाई जिताएका रायमाझी आसन्न निर्वाचनमा उमेदवार बन्ने निश्चित रहेको एमाले अर्घाखाँचीका अध्यक्ष पीताम्बर भुसालले बताए ।
कांग्रेसबाट आकांक्षी
०७४ मा रायमाझीसँग पराजित भएका डा. रामबहादुर बीसीसँगै नेपाली कांग्रेसभित्र उपसभामुख एवं केन्द्रीय सदस्य पुष्पा भुसाल, पूर्वराज्यमन्त्री रेवती भुसाल, प्रदेशका सहमहामन्त्री विष्णु मुस्कान र महाधिवेशन प्रतिनिधि लेखनाथ पोखरेलले टिकटका लागि ‘लबिङ’ सुरु गरेका छन् ।
प्रतिनिधिसभातर्फ कांग्रेसमा आकांक्षी धेरै हुँदा टिकट वितरणमा समस्या हुने देखिएको छ । तर, पार्टी सभापति शेरबहादुर देउवासँग राम्रो सम्बन्ध भएका कारण भुसालले टिकट पाउन सक्ने सम्भावना छ । भुसाल ०६४ को निर्वाचनमा अर्घाखाँची–२ बाट निर्वाचित भएकी थिइन् । ०७४ मा समानुपातिकतर्फबाट सांसद बनेकी हुन् ।
उता, रायमाझीप्रति केही व्यक्ति असन्तुष्ट छन् । तेस्रोपटक विजयी भएर मन्त्री बने पनि उनले जिल्लामा कुनै ठूलो काम नगरेको माओवादी केन्द्रका नेताहरूको आरोप छ । त्यसो त रायमाझीले जिल्लामा धेरै विकास गरेको, संगठनका हिसाबले राम्रो पकड रहेको मान्नेहरू पनि धेरैजना छन् ।
माओवादी केन्द्रबाट एमालेमा आएका उनीप्रति पार्टीभित्रकै असन्तुष्ट पक्षबाट अन्तरघात समेत हुन सक्ने कतिपय नेता–कार्यकर्ताको बुझाइ छ । अर्कोतर्फ, एमाले विभाजन भएर नेकपा (एकीकृत समाजवादी) बनेकाले त्यसको असर पर्ने आकलन पनि गरिएको छ ।
विगतको मत परिणाम
०७४ सालको निर्वाचनमा रायमाझीले ५० हजार ३८५ मत ल्याएर कांग्रेसका डा. बिसीलाई पराजित गरेका थिए । बिसीले ३१ हजार ९४१ मत पाएका थिए । उनीहरू दुई उमेदवारबीचको मतान्तर १८ हजार ४४४ थियो ।
०७४ अघि जिल्लामा दुई निर्वाचन क्षेत्र थिए । ०६४ मा अर्घाखाँची–१ बाट प्रतिस्पर्धा गरेका रायमाझीले कांग्रेसका मानबहादुर विश्वकर्मालाई पराजित गरेका थिए । त्यति बेला पुष्पा भुसाल अर्घाखाँची–२ बाट निर्वाचित भएकी थिइन् ।
०७० मा उनले अर्घाखाँची–१ बाटै प्रतिस्पर्धा गरे । त्यति बेला रायमाझीले कांग्रेसका रामबहादुर बिसीलाई पराजित गरेका थिए । ०७० मा अर्घाखाँची–२ बाट एमालेका डा. दुमन थापा निर्वाचित भएका थिए ।
आसन्न निर्वाचनमा बिसी या भुसालमध्ये एकले टिकट पाउने सम्भावना धेरै रहेको कांग्रेसका स्थानीय नेताको भनाइ छ ।
०७४ को निर्वाचनमा प्रदेशसभातर्फ क्षेत्र नम्बर–१ ‘क’बाट एमालेका चेतनारायण आचार्य र ‘ख’बाट एमालेकै रामजीप्रसाद घिमिरे निर्वाचित भएका थिए ।
अहिले गठबन्धनभित्र कांग्रेसले संघ र माओवादी केन्द्रले प्रदेशतर्फ टिकट पाउने गरी छलफल अघि बढेको जिल्लास्तरका नेताहरू बताउँछन् । यहाँ राष्ट्रिय जनमोर्चाले पनि प्रदेशतर्फ एक सिट मागेको छ ।
गएको वैशाख ३० गते सम्पन्न स्थानीय तह निर्वाचनबाट अर्घाखाँचीमा एमाले पहिलो शक्ति बनेको छ ।
कसको मतभार कति ?
स्थानीय तह निर्वाचनमा वडाध्यक्षहरूले पाएको मतका आधारमा अर्घाखाँचीमा एमाले अगाडि छ । एमालेका तर्फबाट निर्वाचित वडाध्यक्षहरूले ४८ हजार २६० मत पाएका छन् । कांग्रेसका तर्फबाट निर्वाचन वडाध्यक्षहरूले ३७ हजार ९२५, माओवादी केन्द्रका तर्फबाट निर्वाचित वडाध्यक्षहरूले सात हजार ७९०, जनमोर्चाका तर्फबाट निर्वाचित वडाध्यक्षहरूले चार हजार २९४ र नेकपा (एकीकृत समाजवादी)का तर्फबाट निर्वाचित वडाध्यक्षहरूले तीन हजार ७६३ मत पाएका छन् ।
कांग्रेस अर्घाखाँचीका महाधिवेशन प्रतिनिधि एवं प्रतिनिधिसभा सदस्यका आकांक्षी लेखनाथ पोखरेल यहाँ नयाँ अनुहारको खोजी गरिएको भन्दै गठबन्धन हुँदा जित्न सकिने जिकिर गर्छन् ।
६ पालिका रहेको जिल्लामा एमालेले प्रमुख/उपप्रमुखका सात सिट जितेको छ । जिल्ला समन्वय समिति एमालेको एकल पकडमा छ ।
कांग्रेस जिल्ला सभापति केशव श्रेष्ठले एमालेविरुद्ध गठबन्धन गर्ने पक्षमा गृहकार्य भइरहेको बताए । गठबन्धनबाट जसले टिकट पाए पनि जिताउने गरी काम हुने उनको भनाइ छ ।
