बुटवल । स्थानीय तहमा प्रमुख र उपप्रमुखसहित सबै कार्यपालिका सदस्य मिलेर काम गर्नुपर्ने हुन्छ । तर, रूपन्देहीका तीन नगरपालिकामा फरकफरक राजनीतिक दलबाट निर्वाचित भएकाले कामकाज नै प्रभावित हुन थालेको छ । कार्यकाल सम्हालेको दुई महिनामा देखिएका विवादले जनतामा निराशा छाउन थालेको छ ।

नेपाली कांग्रेसबाट मेयर र नेकपा (एमाले)बाट उपमेयर जितेका तीन पालिकामा मेयरका निणर्यविरुद्ध उपमेयर विद्रोह नै गर्छन् । सार्वजनिक रूपमै आपत्ति जनाउँछन् । 

रूपन्देहीमा छवटा नगरपालिका छन् । तीमध्ये तीनवटा नगरपालिकाका उपमेयरले आफ्नो सहमतिविना नै मेयरले निणर्य गरेर 'पेल्न खोजेको' आरोप लगाउँदै आएका छन् । 

तिलोत्तमा नगरपालिकाकी उपमेयर जागेश्वरी चौधरीले त नगरसभा नै रोकेर आफूले अगाडि सारेका एजेन्डा पास गराएरै छाड‍ेकी छन् ।

तिलोत्तमा नगरपालिकाका मेयर रामकृष्ण खाँणले नगरसभा सञ्चालन गर्ने प्रयास गरेपनि कार्यपालिकामा बहुमतमा रहेकी एमालेबाट निर्वाचित उपमेयर चौधरीले आफ्नो असहमति राखिन् र आफ्ना एजेन्डा सार्वजनिक गरिन् । उनको विरोधका कारण निर्धारित समयमा बजेट पास हुन सकेन । पछि उनले सारेका एजेन्डा समावेश गरेपछि मात्र साउन ३ गते बजेट पास भएको थियो ।

मेयर खाँणले एमालेबाट निर्वाचित जनप्रतिनिधिलाई कमजोर बनाउन प्रशासनको समेत प्रयोग गरेको उनको आरोप छ।

त्यस्तै, रूपन्देहीको लुम्बिनी सांस्कृतिक नगरपालिकामा पहिलेका करारका कर्मचारीलाई हटाएर नयाँ भर्नाको विषयलाई लिएर विवाद भएको छ । मेयर सजरुद्दिन मुसलमान र प्रमुख प्रशासकीय अधिकृतको मिलेमतोमा नियमविपरीत कर्मचारीलाई हटाउने र नयाँ भर्ना गरेको आरोप लगाउँदै उपमेयरले सार्वजनिक रूपमै विरोध गरेकी छन् ।

हुनपनि नगर कार्यपालिका बैठकबाट कुनै पनि निणर्य नगराएर किर्ते गरी गोप्य रूपमा आफ्ना मान्छेलाई भर्ना गर्न मेयरले फर्जी निणर्य तयार पारेको भेटिएको छ । कार्यालयमा कार्यरत ९ जना करारका कर्मचारीलाई विनाकारण हटाएर ११ जना नयाँ कर्मचारी भर्ना गर्न लागेपछि उपमेयर कल्पना हरिजनले विरोध जनाइन् ।

गत असार ३० गतेको नगरसभामा यसबारे कुनै प्रस्ताव नलगेका मेयर मुसलमानले बैठकको निणर्य पुस्तिका आफैँले लुकाएर फर्जी निणर्यको प्रतिलिपि थमाउँदै निमित्त प्रमुख प्रशासकीय अधिकृतलाई निणर्य कार्यान्वयन गर्न लगाएपछि घटना बाहिर आएको हो ।

हाल निमित्त प्रमुख प्रशासकीय अधिकृत रहेकी रचना गौतमलाई निणर्य कार्यान्वयन गराउन आदेश दिँदै मेयर मुसलमान तथा विदामा रहेका प्रमुख प्रशासकीय अधिकृत भुपेन्द्र पाण्डेयले ९ जना कर्मचारीलाई हटाएर नयाँ ११ जनालाई यही साउन १ गतेदेखि हाजिर गराउन भनेका थिए ।

उक्त निणर्य वैधानिक नदेखिएपछि कार्यान्वयनको विषयमा आफूकहाँ जिज्ञासा आउँदा बल्ल रहस्य थाहा पाएको उपप्रमुख हरिजनले बताइन् । प्रमुख प्रशासकीय अधिकृत पाण्डेयलाई बैठकको निणर्य पुस्तिका माग्दा नगर प्रमुखको अनुमतिविना हेर्न नमिल्ने जवाफ पाएको उनले बताइन् ।

साउन २ गते नगर प्रमुखसँग बैठक पुस्तिका माग्दा सँगै बसेर हेर्ने जवाफ दिएका उनले ३ गतेमात्रै कार्यालयमा उपस्थित भएर आफ्नै झोलाबाट निणर्य पुस्तिका निकालेको हरिजनले बताइन् । निणर्य पुस्तिका हेर्दा कुनै निणर्य नभएको तर फर्जी निणर्यको प्रतिलिपि तयार पारेको भेटिएपछि सार्वजनिक रूपमै असन्तोष व्यक्त गरेको हरिजनको भनाइ छ । उनले उक्त निणर्य गलत भएको भन्दै सामाजिक सञ्जाल फेसबुकमा सार्वजनिक गरेकी थिइन् ।

तर, नगर प्रमुख मुसलमानले उक्त विषय उपमेयरसँग सम्बन्धित नरहेको र आफू एक्लैले निणर्य गर्नसक्ने बताएका थिए । कर्मचारी हेरफेरको विषयमा आफूहरूले टिप्पणी उठाएको बताउँदै उनले त्यसका लागि नगरसभामा समेत प्रस्ताव लगेको दाबी गरे ।

त्यसैगरी सैनामैना नगरपालिकाका मेयर फणेन्द्र शर्माले गरेका निणर्यप्रति उपमेयर बिना रानाले सामाजिक सञ्जालमै आपत्ति जनाएकी छन् । उनले आफूखुसी निर्णयहरू भइरहेको बताएकी छन् । यतिसम्मकि कतिपय निर्णयहरू कार्यपालिकामा नलगरै भएका उनको आरोप छ । 

"नगरपालिकाका निणर्य सहमतिविना आफूखुसी भएका छन् । यो मान्य हुने विषय होइन । कार्यपालिकामा नलगेका निणर्य मान्य हुने छैनन् । एकलौटी गर्ने अधिकार कसैलाई छैन," उपमेयर रानाले भनेकी छन् ।

सहमतिमा बजेट पास भएपनि नगरपालिकाका अन्य निर्णयमा मेयरले एकलौटी गर्न थालेको रानाको गुनासो छ ।

सैनामैनामा मेयरमा कांग्रेस र उपमेयरमा एमाले विजयी भएको थियो ।