काठमाडौं । स्वास्थ्य सेवा विभागको व्यवस्थापन महाशाखाअन्तर्गत आपूर्ति व्यवस्थापन शाखा प्रमुख डा. सुरेन्द्र चौरासियामाथि पाँच करोड रुपैयाँ घुस लिएको आरोप लागेको छ ।
स्वास्थ्य राज्यमन्त्री हिराचन्द्र केसीको निजी सचिवालयले औषधि उपकरण खरिदमा पाँच करोड बढी घुस लिएको, ५० लाख रुपैयाँको लेनदेनमा सरुवा गरेकोलगायतका आरोप सञ्चार माध्यममा आएको भन्दै डा. चौरासियालाई पत्र काटेको छ ।
पत्रमा यसबारे 'भएको के हो ? वास्तविकता के हो ?' को जवाफ मंगलबार अपराह्न ५ बजेभित्र राज्यमन्त्रीसमक्ष उपस्थित भएर जवाफ दिन पत्र निर्देशन दिइएको छ ।
अनियमितताको आरोप लागेका डा. चौरासियाले भने आफूलाई अहिलेसम्म पत्र प्राप्त नभएको बताएका छन् ।
"मैले सञ्चारमाध्यमहरूमा मात्रै समाचार देखेको हो । पत्र नपाएर कसरी उपस्थित हुनु र ?," डा. चौरासियाले बाह्रखरीसँग भने ।
डा. चौरासियालाई यसअघि पनि हृद्येश त्रिपाठी स्वास्थ्यमन्त्री रहेका बेला अनियमितताको आरोपमा स्पष्टीकरण मागिएको व्यवस्थापन महाशाखाकै एक कर्मचारीले बताए ।
