काठमाडौं । झापाको चिया बगानस्थित रुखमा झुन्डिएको अवस्थामा मृत फेलापरेका तीन किशोरीले आत्महत्या गरेको पुष्टि भएको छ । जिल्ला प्रहरी कार्यालय झापाका डीएसपी वसन्त पाठकका अनुसार पोस्टमार्टम रिपोर्टले आत्महत्या पुष्टि गरेको हो ।
उनले आत्महत्याको कारणबारे केही नखुलेको बताए । “पोस्टमार्टम भइसकेको छ । अनौपचारिक रूपमा बुझ्दा आत्महत्या नै देखियो । पोस्टमार्टमको औपचारिक पत्र आउन भने बाँकी छ,” उनले बाह्रखरीसित भने ।
गएको शनिबार मध्याह्न करिब १२ बजे कचनकवल गाउँपालिका–५ का पुवालु गणेशकी १७ वर्षीया छोरी अञ्जली, सोही स्थान बस्ने पंचम गणेशकी १६ वर्षीया छोरी करिना र वीरबल गणेशकी १७ वर्षीया छोरी कल्पनाकुमारी घुम्न जाने भन्दै परिवारलाई जानकारी गराएर घरबाट निस्किएका थिए ।
आइतबार बिहान कचनकवल–५, बेल्लेगाउँस्थित सुनकोसी चिया बगानको जिङखोला किनारमा बयरको रुखमा झुन्डिएको अवस्थामा तीनैजनाको शव फेलापरेको थियो ।
घटनाबारे थप अनुसन्धान भइरहेको डीएसपी पाठकले बताए ।
