काठमाडौं । सरकारले संघ र प्रदेशको निर्वाचनको मिति तोक्न आलटाल गरेको छ । निर्वाचन आयोगको परामर्शमा सरकारले निर्वाचनको मिति घोषणा गर्ने कानुनी व्यवस्था छ । 

सोही व्यवस्थाअनुसार आयोगले असार २२ गते आगामी मंसिर २ गते निर्वाचन गर्दा उपयुक्त हुने सुझाव दिएको थियो । आयोगले निर्वाचनका लागि १२० दिन लाग्ने भएकाले सोहीअनुसार मिति तोक्न सरकारसमक्ष  प्रस्ताव गरेको थियो ।

तर, आयोगले दिएको मिति घर्किइसकेको छ ।  आयोगले दिएको समयअनुसार अब ११७ दिन मात्रै बाँकी छ । 

सरकारका मन्त्रीहरुले छिट्टै नै निर्वाचन मिति तोक्ने बताउँदै आएका छन् । संस्कृति पर्यटन तथा नागरिक उड्ययनमन्त्री जीवनराम श्रेष्ठले छिट्टै नै मिति तोकिने बताए । 

“छलफल भइरहेको छ । छिट्टै नि निर्वाचन मिति घोषणा हुन्छ,” उनले बाह्रखरीसँग भने । 

अर्का एक मन्त्रीका अनुसार सरकारले अघि सारको केही विधेयक संसदबाट टुंगो लगाएपछि मात्रै मिति तोकिनेछ । चुनाव घोषणा हुनासाथ चुनाव केन्द्रित हुनुपर्ने भएकाले विधेयक पारित गर्न कठिनाइ हुने उनको भनाइ छ । 

“केही महत्वपूर्ण विधेयकहरु संसदमा पुगेका छन् । त्यसलाई अघि बढाउने कुरा त भइरहन्छ । तर, सामान्यतयाः चुनाव घोषणा भएपछि त्यता नै केन्द्रित भइन्छ,” ती मन्त्रीले भने,“विधेयक अघि बढाउन प्राविधिक कठिनाइ हुन्छ । यी सबै कुरालाई मध्यनजर गर्र्र्र्दै निर्वाचनको मिति चाँडै घोषणा हुन्छ ।”

नागरिकता विधेयक संसदमा पुगेको छ भने संक्रमणकालीन न्यायसम्बन्धी विधेयक संसदमा दर्ताको अवस्थामा छ । त्यसलाई अघि बढाउन सत्तारुढ दलबीच सहमति भइसकेको छ ।  

त्यसैगरी सत्ता गठबन्धनबीच सहमति हुन पनि बाँकी रहेको ती मन्त्रीले बताए । सत्ता गठबन्धनमा मंसिरमा निर्वाचन गर्ने भन्ने लगभग सहमति जुटेको छ । नेताहरुले पनि मंसिरमा चुनाव हुने भन्दै तयारी थाल्न निर्देशन दिइरहेका छन् । 

“गठबन्धनबीचको पनि सहमति हुनुपर्छ । गठबन्धनमा एकखालको छलफल त भएको छ  । तर, मितिका बारेमा ठ्याक्कै निर्णय भइसकेको छैन,” ती मन्त्रीले भने । 

निर्वाचन आयोगले मंसिर २२ गते संसदको कार्यकाल सकिने भन्दै त्यसअगावै निर्वाचन गर्नुपर्ने ध्यानाकर्षण सरकारलाई गराइसकेको छ । 

निर्वाचन मिति नतोकिँदा निर्वाचनका तयारीका कामहरु गर्न आयोगलाई अप्ठेरो भएको पदाधिकारीहरु बताउँछन् । औपचारिक रुपमा नभए पनि साउन १५ भित्रै मिति घोषणा हुने जानकारी आयोगमा पुगेको छ । 

“ठ्याक्कै कहिले भन्ने त भएको छैन । तर, साउन १५ भित्रै मिति घोषणा हुने अनौपचारिक कुराकानी सुनिन्छ,” आयोगका एक पदाधिकारीले भने । 

निर्वाचनको मिति घोषणा गर्न प्रमुख प्रतिपक्षी दल नेकपा एमालेले आवाज उठाउन थालेको छ । 

एमालेका जनप्रतिनिधिहरुलाई प्रशिक्षण दिन केहीदिन अघि आयोजित कार्यक्रममा एमाले अध्यक्ष केपी शर्मा ओलीले सरकारले मंसिरको चुनाव सार्ने खतरा रहेको आरोप लगाएका थिए । 

आइतबारको प्रतिनिधिसभा बैठकमा एमालेका सांसद लालबाबु पण्डितले निर्वाचनको मिति तोक्न गठबन्धनको गाँठो नफुकेर चुनाव नभएको हो भन्दै कटाक्ष गरेका थिए । 

“गठबन्धन सरकारले निर्वाचनको मिति घोषणा गर्न किन ढिलाइ गरिरहेको छ ? गठबन्धनको गाँठागुठी नमिलेर हो कि ? आशीर्वाद लिन गएको ठाउँबाट आशीर्वाद नपाएर हो कि ?, उनले सोधे, “या चुनाव नगराउने मनसायले गठबन्धन लामो समयदेखि टिकाउनको निम्ति हो ? जनता जान्न चाहन्छन् ।”