काठमाडौं । मौद्रिक नीति सार्वजनिक भएपछिका दुई कारोबार दिननै नेप्से उच्च अंकले बढेको छ । लगातार दुई दिन बढेको नेप्से २१३२.९६ विन्दुमा पुगेको छ । पछिल्लो दुई दिनमा नेप्से परिसूचक ११५.५० अंक वृद्धि भएको छ ।

आइतबार ६१ अंक बढेको नेप्से सोमबार साढे ५४ अंक बढेको छ । मौद्रिक नीतिमा कुनै एक बैंकबाट सेयर धितो कर्जा चार करोड र समग्र वित्तीय प्रणालीबाट १२ करोड लिन पाउने व्यवस्थालाई केही संशोधन गरिएसँगै त्यसको प्रभाव सेयर बजारमा देखिएको हो । राष्ट्र बैंकले अब एकै बैंक वा समग्र बैंकिङ प्रणालीबाट १२ करोड रुपयाँसम्म सेयर धितो कार्जा लिन पाउने व्यवस्था गरेको छ ।

यो व्यवस्थाले पनि साना लगानीकर्तालाई राहत मिलेको कतिपय लगानीकर्ताको भनाइ छ । सोमबार नेप्सेसँगै कारोबार रकम पनि वृद्धि भएको छ । गत कारोबार दिनको तुलनामा कारोबार रकम १ अर्ब ३७ करोड रुपैयाँ वृद्धि भएको छ । आज ४ अर्ब १० करोड रुपयाँको सेयर कारोबार भएकोमा गत कारोबार दिन २ अर्ब ७३ करोड रुपैयाँको सेयर कारोबार भएको थियो ।

आज २१४ धितोपत्रको ९९ लाख ४४ हजार ४८ कित्ता सेयर खरिद–बिक्री भएको छ । कारोबारमा आएका धितोपत्रमध्ये सातवटाको मूल्य १० प्रतिशतले वृद्धि भएको छ । त्यसैगरी ११ वटाको मूल्य ९ प्रतिशतभन्दा बढीले वृद्धि भएको छ ।

शिवम् सिमेन्टको सर्वाधिक रकमको रेयर खरिद–बिक्री भएको छ । यो कम्पनीको १५ करोड २९ लाख रुपैयाँको सेयर खरिद–बिक्री भएको हो । अरुण कावेली पावरको १४ करोड ५१ लाख रुपैयाँको सेयर खरिद–बिक्री भएको छ ।

वित्त समूहका कम्पनीमा लगानीकर्ताको आकर्षण

सोमबार कारोबारमा आएका १३ समूहकै उपसूचक वृद्धि भएको छ । जसमा वित्त समूहको उपसूचक सर्वाधिक वृद्धि भएको छ । यो समूहको उपसूचक ७.९ प्रतिशतले वृद्धि भएको छ । यो समूहमा लगानीकर्ताको आकर्षण सर्वाधिक देखिएको छ । यो समूहमा पर्ने कम्पनीको सेयर मूल्य बढेसँगै उपसूचकमा वृद्धि भएको हो । 

गत कारोबार दिन पनि यो समूहको उपसूचकमा सर्वाधिक वृद्धि थियो । त्यस्तै विकास बेंक समूहको उपसूचक ५.८४ प्रतिशत वृद्धि भएको छ भने जतविद्युत् समूहको ४.५ प्रतिशत, लघुवित्त समूहको ३.९९ प्रतिशत र उत्पादन तथा प्रशोधन समूहको उपसूचक ३.२२ प्रतिशतले वृद्धि भएको छ । बाँकी समूहको उपसूचक ३ प्रतिशतभन्दा कम वृद्धि भएको छ ।