काठमाडौं । बैंक तथा वित्तीय संस्था परिसंघका अध्यक्ष पवन गोल्यानले आर्थिक वर्ष २०७९/०८० का लागि राष्ट्र बैंकले ल्याएको मौद्रिक नीतिले बैंकहरूको नाफा घटाउने बताएका छन् । अध्यक्ष गोल्यानले मौद्रिक नीतिले अनिवार्य नगद अनुपात (सीआरआर)लाई तीन प्रतिशतबाट एक प्रतिशत बढाउँदा बैंकहरूको अर्बौं रकम बिना प्रतिफल राष्ट्र बैंकमा थुप्रिँदा बैंकहरूको मुनाफा घटाउने अवस्था देखिएको बताएका छन् ।
उनले मौद्रिक नीतिको यो व्यवस्थाले बैंकहरूको लागत बढ्ने बताए । अध्यक्ष गोल्यानले बैंकहरूमा लागत नै १० प्रतिशत बढीले लाग्ने भन्दै यो भन्दा माथि गयो भने बैंकिङ क्षेत्र संकटमा पर्ने बताए । उनले बैंकको शेयरहोल्डर र लगानीकर्ताहरूलाई १० देखि १५ प्रतिशत मुनाफा दिनुपर्ने भए पनि आगामी दिनमा बैंकहरूले त्यो दिनसक्ने अवस्था नभएको गुनासो गरे ।
परिसंघले सोचेको जति अझ कसिलो मौद्रिक नीति नआएको उनको भनाइ छ । उनले मौद्रिक नीतिले निर्यातलाई अझ कडाइ गर्नुपर्ने बताए । अध्यक्ष गोल्यानले मौद्रिक नीतिका धेरै राम्रा पक्ष रहेको भन्दै बैंक कर्जा बिस्तारलाई कसिलो बनाउनुको विकल्प पनि नभएको बताए । उनले चालु आर्थिक वर्षमा रेमिट्यान्स र वैदेशिक लगानी आउन सकेन भने १२ प्रतिशतको कर्जा बिस्तार लक्ष्य पनि पूरा हुन नसक्ने दाबी गरे । उनले गत वर्ष १९ प्रतिशत कर्जा बिस्तारको लक्ष्य राखे पनि पूरा नभएको भन्दै यो वर्ष पनि त्यही अवस्था देखिएको बताए । उनले उत्पादनशील उद्योग र अन्य उद्योगमा फरक ब्याजदर व्यवस्था गर्नु राम्रो देखिए पनि यो व्यवस्थाले बैंकलाई भार थप्ने देखिएको बताए ।
अध्यक्ष गोल्यानले मौद्रिक नीतिमा १२ प्रतिशत कर्जा विस्तारको लक्ष्य पूरा गर्न बैंकहरू राष्ट्र बैंकसँग हातेमालो गर्न तयार रहेको बताए । उनले राष्ट्र बैंकले बैंक तथा वित्तीय संस्थाहरू जोगाएर नीति ल्याउन चुकेको टिप्पणी गरे । गोल्यानले शेयर बजारका लगानीकर्ता अब सकारात्मक हुनुपर्ने बताए । उनले शेयर धितो कर्जामा लगाइएको १२ करोडको सीमा साना लगानीकर्ताका लागि राम्रो भएको बताए । उनले राष्ट्र बैंकले ल्याउने शेयरकर्जा नीति प्रोमोटर शेयर होल्डरहरूलाई बढी ताकेता भएको बताए ।
अध्यक्ष गोल्यानले घरजग्गा कारोबारका लागि कर्जामा कसिलो बनाउनु सकारात्मक रहेको धाराणा राखे । उनले घर जग्गा किनबेचका लागि बैंकहरूबाट कर्जा जान नहुने बताए । गोल्यानले मौद्रिक नीतिले निर्यातलाई प्रोत्साहन दिएर नीति ल्याए पनि सरकारको नीति निर्यात मैत्री नभएर आयात मैत्री रहेको टिप्पणी गरे ।
