जनकपुरधाम । मधेस प्रदेशमा गत आर्थिक वर्षमै सम्पन्न भएका याेजनाकाे पौने दुई अर्ब रकम भुक्तानी हुन बाँकी छ ।

आर्थिक वर्ष ०७८/७९ मा सम्पन्न भएका याेजना तथा कार्यक्रमकाे एक अर्ब ७५ करोड तीन लाख ६ हजार ५३८ रुपैयाँ भुक्तानी हुन बाँकी रहेको अर्थ मन्त्रालयले जनाएको छ । कर्मचारी अभाव र सर्भर डाउनका कारण सो रकम भुक्तानी हुन नसकेको प्रदेश सरकारको भनाइ छ ।

भुक्तानी हुन नसकेको रकम सरकारले चालु आर्थिक वर्षको बजेटबाट दिने गृहकार्य सुरु गरेको अर्थ सचिव गजेन्द्र कुमार ठाकुरले जानकारी दिए । उनका अनुसार सरकारले चालु आर्थिक वर्षको बजेटमा विविध शीर्षकबाट भुक्तानी दिइनेछ ।

असार ३२ गते संसदमा भुक्तानीबारे सांसदहरूले अवाज उठाएपछि सभामुख सरोजकुमार यादवले भुक्तानी हुन बाँकी रहेको रकम बारे विवरण प्रदेशसभामा बुझाउन अर्थमन्त्री शैलेन्द्र प्रसाद यादवलाई निर्देशन दिएका थिए । 

मन्त्रालयले भुक्तानी हुन बाँकी रहेका सबै निकायबाट विवरण मगाएर मंगलबार सभामा पेस गरेकाे हाे ।

संसदले अनुमोदन गरेपछि अर्थ मन्त्रालय र प्रदेश कोष तथा लेखा नियन्त्रण कार्यालयलाई अनुमोदन भएको आदेश पठाएपछि भुक्तानी हुने ठाकुरले बताए । उनका अनुसार संसदबाट अनुमोदन भएको आदेश आउने बित्तिकै भुक्तानी दिन थालिनेछ । 

चालु महिनाको अन्तिम साता वा भदौ पहिलो साता सम्म सबै भुक्तानी भइसक्ने उनको दाबी छ । "यसमा कानुनी जटिलता नआउनु पर्ने हो, किनभने संसदबाट पारित भएर आएको हुन्छ," उनले भने, "संसदले नै भुक्तानी दिनुपर्ने कुरा उठान गरेको छ । संसद सर्वभाैम हुन्छ, त्यसकारण पारित भएपछि समस्या नआउन सक्छ ।"

आएकै बजेटबाट भुक्तानी दिइने भएकाले समस्या नआउने उनको तर्क छ ।