काठमाडौँ । सरकारले धीरजप्रताप सिंहलाई आईजीपी नियुक्त गरेपछि आफूमाथि अन्याय भएको भन्दै सर्वोच्च अदालत पुगेका एआईजी विश्वराज पोखरेल काममा फर्किएलान् कि नफर्किएलान् भन्ने चासो बढेर गएको छ ।

सिंहलाई आईजीपी नियुक्त गरेपछि उनी एक महिना लामो बिदामा बसेका छन् । आफूलाई आईजीपी नियुक्त गर्नुपर्ने मागसहित उनले सर्वोच्च अदालतमा रिट दायर गरेका थिए । उनको मुद्दाको किनारा लागेको छैन ।

तर, उनले लिएको एकमहिने बिदा यही जेठ २४ गते सकिँदै छ । यस्तोमा उनले थप बिदा लिनुपर्ने हुन्छ । त्यो स्वीकृत गर्ने/नगर्ने अधिकार आईजीपीलाई हुन्छ । थप बिदा स्वीकृत नभए उनले बाध्य भएर काममा फर्किनुपर्ने हुन्छ ।

तर, आफूभन्दा जुनियरलाई आईजीपी बनाएको भन्दै सर्वोच्च गएका पोखरेललाई काममा फर्कन पनि नैतिक रूपमा गाह्रो हुने प्रहरीका उच्च अधिकारीहरू बताउँछन् ।

कतिपयले उनको बिदा थप नभए उनी काममा फर्कन सक्ने अनुमान पनि गरेका छन् । प्रहरी प्रधान कार्यालयका एक उच्च अधिकारी भन्छन्, “बिदा थप नभए उनी कार्यालयमा हाजिर हुनसक्छन् । आईजीपीसँग समन्वय नगर्न सक्छन् । किनभने, एआईजीलाई हटाउने वा कारबाही गर्ने अधिकार आईजीपीलाई छैन । विवाद थप नलम्ब्याउने हो भने बिदा थप पनि हुनसक्छ ।”

पोखरेल हाल मानवस्रोत विभागको एआईजी छन् । प्रहरी सरुवा–बढुवामा यो विभागको महत्त्वपूर्ण भूमिका हुन्छ । प्रहरीमा नयाँ एआईजी बढुवा सिफारिस भएकाले अबको केही दिनमै एआईजीको पदस्थापन र सरुवा समेत हुनेछ । पोखरेललाई पनि नयाँ कार्यालयमा सरुवा गरिनेछ ।

बिदा सकिएपछि के गर्नुहुन्छ भन्ने बाह्रखरीको प्रश्नमा एआईजी पोखरेलले भने, “बिदा सकिएपछि फेरि थपेर बस्छु ।”

पोखरेलको मुद्दाको टुंगो कहिले लाग्छ यकिन छैन । प्रहरीमा हाल ३० वर्षे सेवा अवधि कायम छ । प्रहरीमा अहिलेकै व्यवस्थाअनुसार एआईजीको उमेर हद ५६ वर्ष छ । आईजीपीको उमेर हद ५८ वर्ष छ । पोखरेल आउँदो साउन २० गते ५७ वर्ष लाग्छन् । साउन २० अघि मुद्दाको किनारा नलागे उनले स्वतः एआईजीबाटै अवकाश पाउनेछन् । त्यसैले उनले साउन २० अघि नै आफ्नो मुद्दाको टुंगो लागोस् भन्ने चाहेका छन् ।

पोखरेल र हालका आईजीपी सिंह प्रहरी निरीक्षक पदमा एकै मितिमा भर्ना भएका थिए । एआईजी बढुवामा भने पोखरेल १८ महिना सिनयर हुन् । सोही आधारमा पोखरेल आफू आईजीपी हुनुपर्ने भन्दै अदालत पुगेका हुन् ।