काठमाडौं । गौतमबुद्ध अन्तर्राष्ट्रिय विमानस्थलमा आउँदो जेठ २ गते कुवेती वायुसेवा कम्पनी जजिरा एयरवेजले पहिलो उडान गर्ने भएको छ । बुद्धजयन्ती अर्थात् जेठ २ गते विमानस्थलको उद्घाटन गर्ने नेपाल नागरिक उड्डयन प्राधिकरणको तयारी छ ।

सोही दिन जजिरा एयरवेजले पहिलो र नियमित उडान थाल्ने प्राधिकरणका महानिर्देशक प्रदीप अधिकारीले बताए । जजिराले पहिलो चरणमा सातामा तीन दिन उडान गर्ने गरी अनुमति पाएको हो । जजिराले सातामा सोमबार, बुधबार र शुक्रबार उडान गर्ने अधिकारीले जानकारी दिए ।

यो विमानस्थलमा विदेशी हवाई सेवा कम्पनीले उडान सुरु गर्ने निश्चित भए पनि स्वदेशी ध्वजावहाक नेपाल एयरलाइन्स भने अझै अध्ययनमै छ ।

यस्तै, नेपालबाट अन्तर्राष्ट्रिय उडान गरिरहेको हिमालय एयरलाइन्सले पनि यो विमानस्थलबाट उडान गर्ने विषयमा निर्णय गरिसकेको छैन । तर, अध्ययनको काम गरिरहेको एयरलाइन्सका उपाध्यक्ष विजय श्रेष्ठले बताए । बजार अध्ययनमै लागिरहेको र अध्ययनपछि मात्रै निर्णय लिइने उनले जानकारी दिए ।

प्राधिकरणका अनुसार जजिराबाहेक अरू वायुसेवा कम्पनीले भने अहिलेसम्म निवेदन दिइसकेका छैनन् । धेरै विमान कम्पनीहरूले इच्छा भने देखाइरहेको बताइएको छ ।

नयाँ धावनमार्गबाट सुरु भयो आन्तरिक उडान
गौतमबुद्ध अन्तर्राष्ट्रिय विमानस्थलको धावनमार्गमा आन्तरिक जहाजले उडान÷अवतरण सुरु गरिसकेका छन् । बिहीबारदेखि नयाँ विमानस्थलको धावनमार्गबाट आन्तरिक हवाई सेवा कम्पनीहरूले उडान सुरु गरेको महानिर्देशक अधिकारीले जानकारी दिए । यो धावनमार्गमा यती एयरलाइन्सले पहिलो अवतरण गरेको थियो ।

सन् २०१४ मा निर्माण सुरु भएको यो विमानस्थल त्रिभुवन अन्तर्राष्ट्रिय विमानस्थल निर्माण भएको ७४ वर्षपछि बनेको अन्तर्राष्ट्रिय विमानस्थल हो ।

पश्चिम नेपालका यात्रुलाई सहज
यो विमानस्थल सञ्चालनबाट पश्चिम नेपालका यात्रुहरू लाभान्वित हुने महानिर्देशक अधिकारीले बताए । छिमेकी भारतबाट समेत यात्रुहरू आउन सक्ने उनले बताए ।

गौतमबुद्धको जन्मभूमि रहेको क्षेत्रमा अवस्थित यो विमानस्थल सञ्चालनमा आएपछि बौद्ध धर्मावलम्बीहरू भएका देशका तीर्थालु बढी आउने अपेक्षा सरकारी अधिकारीको छ । यस्तै, लुम्बिनी, चितवन, पोखरालगायत पर्यटकीय गन्तव्यस्थल नजिक पर्ने भएकाले भारतीय पर्यटकहरूलाई बढी सहज हुने पनि बताइएको छ । त्यसले नेपालको पर्यटन क्षेत्रमा सहयोग पु¥याउने विश्वास पर्यटन व्यवसायीहरूको छ ।

यो विमानस्थलको यात्रु क्षमता वार्षिक करिब चार लाख रहेको छ । विमानस्थलबाट एक घण्टामा ‘पिक आवर’मा ४०० यात्रु ‘ह्यान्डलिङ’ गर्न सकिने गौतमबुद्ध अन्तर्राष्ट्रिय विमानस्थल आयोजनाले जनाएको छ ।