काठमाडौं । गैरआवासीय नेपाली संघको आगामी महाधिवेशन थप पेचिलो बन्दै गएको छ । एनआरएनएका पूर्वअध्यक्ष शेष घलेले संघको निर्वाचन समिति पुर्नगठन गरी छुट्टै सम्मेलनको आयोजना गर्न लागेको भन्दै अध्यक्ष कुमार पन्तले आपत्ति जनाएका छन् ।
पन्तले विज्ञप्ति जारी गर्दै संघका पूर्वअध्यक्ष शेष घलेले संघको निर्वाचन समिति पुर्नगठन गरिएको र छुट्टै सम्मेलन आयोजना गर्ने भनिएको कदमप्रति संघको गम्भीर ध्यानाकर्षण भएको जनाए ।
गैरआवासीय नेपाली संघको निर्वाचन यही मार्च २४–२५ तारिख हुने तय भइसकेको अवस्थामा आपसी सहमतिबाट अहिलेको समस्या समाधान गर्न सकारात्मक पहल भइरहेको उनले विज्ञप्तिमा उल्लेख गरेका छन् ।
संघले विज्ञप्तिमार्फत् अन्तर्राष्ट्रिय समन्वय परिषद्को ८२ औँ बैठकले संरक्षक परिषद् र उच्चस्तरीय समिति भंग गरिसकेको र संघको विधानले पूर्वअध्यक्षलाई कुनै पनि कार्यकारी अधिकार नदिएको अवस्थामा पूर्वअध्यक्ष शेष घलेबाट चालिएका कदम विधान र संघको परम्पराविपरीत भएको जनाएको छ ।
