काठमाडौं । पहिलो खेलमा १–० को जित निकालेपछि हौसिएको नेपाली राष्ट्रिय फुटबल टोलीले आज अफ्रिकी मुलुक मोरिससविरुद्धको दोस्रो मैत्रीपूर्ण अन्तर्राष्ट्रिय खेल्दै छ । 

दशरथ रंगशालामा हुने दोस्रो खेलका लागि नेपालका मुख्य प्रशिक्षक अब्दुल्लाह अल्मुताइरीले पहिलो खेलको टिममा ११ जना परिवर्तन गर्दै नयाँ टिम घोषणा गरेका थिए । तर, आइतबार साँझ दोस्रो टिममा भएका अनन्त तामाङ र प्रशान्त अवस्थी टिमबाट बाहिरिएका छन् । अल्मुताइरी र अखिल नेपाल फुटबल संघ (एन्फा)ले दुई खेलाडी परिवर्तनको कारण स्पष्ट पारेका छैनन् ।

दर्शन गुरुङ र मनीष डाँगीलाई टिममा बोलाइएको छ । अब पहिलो खेलमा भएका १४ खेलाडी दोस्रो टोलीमा पनि भएका छन् । टिममा नौ खेलाडी मात्र नयाँ थपिएका छन् ।

घरेलु मैदानमा पहिलो खेल जितेका कारण दोस्रो खेल कम्तीमा नहार्नका लागि नेपाली टोलीमाथि दबाब छ । तर, मोरिससको पनि दोस्रो खेलमा टिम परिवर्तन हुने सम्भावना छ । किनभने, नेपाल आउनेबित्तिकै कोरोना संक्रमित भएका चार खेलाडी आजको खेलमा फर्किनेछन् । त्यसले पाहुना टोलीको प्रदर्शनमा पक्कै सुधार आउने अपेक्षा गर्न सकिन्छ । 

‘‘संक्रमित भएका चार खेलाडी दोस्रो खेल्नका लागि तयार हुनेछन् । उनीहरू हाम्रा महत्त्वपूर्ण खेलाडी थिए । उनीहरूको आगमनपछि हाम्रो प्रदर्शनमा सुधार हुने अपेक्षा गर्न सकिन्छ,’’ पहिलो खेलपछिको पत्रकार सम्मेलनमा मोरिससका मुख्य प्रशिक्षक टोनी मारीइ पास्कलले भनेका थिए ।

साढे दुई वर्षपछि अन्तर्राष्ट्रिय फुटबल खेलेको मोरिसस नेपालबाट सकारात्मक नतिजा लिएर फर्कने पक्षमा छ । किनभने, मोरिससले अफ्रिकन कप अफ नेसन्सको छनोट खेल खेल्दै छ । त्यसैको तयारीका लागि उनीहरू नेपाल भ्रमणमा निस्किएका थिए ।

नेपाल उत्रिएपछि मोरिससका मुख्य प्रशिक्षक पास्कलको भनाइ पनि त्यही थियो । उनले भनेका थिए, ‘‘हामी अफ्रिकन कप अफ नेसन्सको तयारीमा छौँ । त्यसको तयारीका लागि हामीलाई नेपालविरुद्धको दुई खेल महत्त्वपूर्ण हुनेछ ।’’

त्यसकारण मोरिसस सकारात्मक ऊर्जासहित घर फर्कन पनि आजको खेल कम्तीमा हार्न चाहँदैन । दुवै टिम हार्न नचाहने भएकाले आजको खेल बराबरी नतिजामा टुंगिने सम्भावना पनि उत्तिकै हुन्छ ।

नेपाल पनि एएफसी एसियन कप छनोटको तयारीमा जुटेको छ । प्रशिक्षक अल्मुताइरी उक्त प्रतियोगिताका लागि बलियो टोली बनाउने योजनामा छन् । त्यसैले उनले बन्द प्रशिक्षणमा बोलाएका सबै खेलाडीलाई दुई खेलका लागि दुई टोलीमा विभाजन गरेका थिए ।

अल्मुताइरीले आज दशरथ रंगशालामा ४ः४५ बजे हुने दोस्रो खेलमा केही प्रयोग गर्ने सम्भावना भने छ । तर, उनलाई नतिजा निकालेर घरेलु दर्शकलाई खुसी पार्नुपर्ने दबाब पनि छ । त्यसो त अल्मुताइरी समर्थकलाई खुसी बनाउन जेसुकै पनि गर्न तम्तयार हुन्छन् । यद्यपि, अल्मुताइरीले खेलाडीले गल्ती नगर्दासम्म आफ्नो टिमबाट नबाहिरिने बताएका छन् ।

अल्मुताइरीले पहिलो खेलमा ४–३–३ को फर्मेसनमा खेलाएका थिए । उनले आजको खेलमा पनि आफ्नो फर्मेसन परिवर्तन गर्ने सम्भावना कम छ । यदि, गरेमा उनी ४–२–३–१ को फर्मेसनमा जान सक्छन् ।

त्यसकारण दोस्रो खेलमा पनि नेपालको कप्तान तथा गोलकिपर किरण चेम्जोङ परिवर्तन हुने सम्भावना न्यून छ । जोखिम मोलेको खण्डमा विशाल श्रेष्ठले मौका पाउन सक्छन् । त्यस्तै, रक्षापंक्तिमा परिवर्तनको सम्भावना कम छ । अनुभवी अनन्त तामाङले स्थान बनाउने सम्भावना हुन्थ्यो । तर, तर अब त्यो सम्भावना पनि सकिएको छ ।

मिडफिल्डमा भने केही परिवर्तन हुनसक्छ । पहिलो खेलमा पहिलो रोजाइमा स्थान बनाएका सुरजज्यू ठकुरीको स्थानमा पुजन उपरकोटीले मौका पाउने सम्भावना छ । सुमन लामा र तेज तामाङ यथावत् रहन सक्छन् । अथवा, कुनै एकको स्थानमा सन्तोष तामाङ वा एरिक विष्टले मौका पाउने सम्भावना पनि हुन्छ ।

पहिलो खेलमा अञ्जन विष्ट, विमल घर्तीमगर र सुनील बलले नेपालको अक्रमणपंक्ति सम्हालेका थिए । सुनील दोस्रो टोलीमा छैनन् । उनको स्थान मनीष डाँगी वा सुजल श्रेष्ठले लिने सम्भावना छ । तथापि, नयाँ खेलाडीलाई मौका दिए भने दर्शन गुरुङको सम्भावना हुन्छ ।

४–२–३–१ को फर्मेसनमा खेले आशिष लामाको सम्भावना पनि छ । यस फर्मेसनमा गए मिडफिल्डमा व्यापक परिवर्तन हुनसक्छ । अल्मुताइरी ४–१–४–१ को फर्मेसनमा पनि जान सक्छन् । 

नेपालको सम्भावित टिम 

गोलकिपर : किरण चेम्जोङ
रक्षापंक्ति : गौतम श्रेष्ठ, दिनेश राजवंशी, देवेन्द्र तामाङ र सुमन अर्याल
मिडफिल्ड : पुजन उपरकोटी/सुरजज्यू ठकुरी, तेज तामाङ/सन्तोष तामाङ र सुमन लामा
फरवार्ड : अञ्जन विष्ट, विमल घतीमगर र मनीष डाँगी/सुजल श्रेष्ठ

वैकल्पिक खेलाडी : विशाल श्रेष्ठ, सत्रुघन चौधरी, नवीन गुरुङ, सुवास गुरुङ, आशिस राई, एरिक विष्ट, सुशील राई, दर्शन गुरुङ र आशिष लामा ।