काठमाडौं । नेपाली क्रिकेट टोलीका कप्तान सन्दीप लामिछानेले क्यान र खेलाडीबीचको विवाद छलफलबाटै समाधान हुनु राम्रो पक्ष भएको बताएका छन् । शुक्रबार राति अस्ट्रेलियाबाट त्रिभुवन अन्तर्राष्ट्रिय विमानस्थल अवतरण गरेपछि सञ्चारकर्मीसँगको कुराकानीमा उनले अब नेपाली क्रिकेटमा समस्या नरहेको पनि बताए ।

"परिवारको कुरा परिवारमै सल्टियो राम्रो पक्ष हो । अहिले सबै कुरामा सबैजना खुसी हुनुहुन्छ । यो एउटा टिम हो, एउटा परिवार हो । नेपालको झण्डाभन्दा ठूलो केही पनि छैन," उनले भने ।

उनले अब सबैजना मिलेर अगाडि बढ्नुपर्ने बताए ।

अस्ट्रेलिया रहँदा आफूले प्रधानमन्त्री कप नछुटाएर हेरेको पनि उनले बताए । 

सन्दीपले प्रशिक्षक पुबुदु दासानायकेले आफूलाई 'पिक' गरेकाले उनीसँग सहकार्य गर्न कुनै अप्ठेरो नहुने बताए । बरू यो राम्रो मौका भएको उनले बताए ।

सन्दीपको कप्तानीमा नेपालले यही फेब्रुअरीमा ओमानमा हुने आईसीसी ट्वान्टी–२० विश्वकपको ग्लोबल छनोटका लागि १६ सदस्सीय टोलीको घोषणा गरेको छ । नेपालले सन्दीपको कप्तानीमा खेल्न लागेको यो पहिलो प्रतियोगिता हो ।

सुरुमा ३० खेलाडीलाई बन्द प्रशिक्षणमा बोलाइएको थियो । क्यानले माघ ६ गते अन्तिम १६ खेलाडीको नाम सार्वजनिक गरिसकेको छ । अन्तिम १६ मा सोमपाल कामी, विनोद भण्डारी, गुल्शन झा टिमबाट बाहिरिएका छन् । लोकेश बम, विवेक यादवले पहिलोपटक राष्ट्रिय टोलीमा स्थान बनाएका छन् । जितेन्द्र मुखिया र प्रदीप ऐरीले पुनरागमन गरेका छन् ।
 
क्यानले सन्दीपलाई कप्तानमा नियुक्त गर्नुका साथै तत्कालीन कप्तान ज्ञानेन्द्र मल्ल, उपकप्तान दीपेन्द्रसिंह ऐरी, सोमपाल कामी र कमलसिंह ऐरीलाई २०२२ मा सुरुको ६ महिना सेन्ट्रल कन्ट्रयाक्टमा नराख्ने निर्णय गरेको थियो । त्यसपछि खेलाडी र क्यानबीच लामो समय विवाद चलेको थियो ।

अन्ततः क्यान कारवाही फिर्ता लिन तयार भएको थियो भने खेलाडीहरू सन्दीपलाई कप्तान मान्न तयार भएका थिए । यी सबै घटना हुँदा सन्दीप अस्ट्रेलियामा थिए ।