काठमाडौं । आउँदो फागुन २१ गतेबाट राष्ट्रिय सभाका २० सांसद बिदा हुँदैछन् ।  चार वर्षे कार्यकाल पूरा गरेर नेकपा एमालेका आठ, नेकपा माओवादी केन्द्र र एकीकृत समाजवादीका चार/चार,  कांग्रेसका तीन र मनोनीत एक सांसद बिदा हुन लागेका हुन् । 

जसमा  प्रदेश नम्बर १ बाट निर्वाचित एमालेका अगमप्रसाद बान्तवा राई, नैनकला ओझा र परशुराम मेघी गुरुङ रहेका छन् ।

त्यस्तै प्रदेश २ बाट एमालेका सुमनराज प्याकुरेल, माओवादीकी शशीकला दाहालको समायावधि सकिन लागेको हो ।  त्यस्तै वाग्मतीमा कांग्रेसका राधेश्याम अधिकारी,  नेकपा एकीकृत समाजवादी) की उदया शर्मा पौडेल रहेका छन् । 

गण्डकीका माओवादीका दीनानाथ शर्मा र खिमकुमार विक  तथा  (एकीकृत समाजवादी) की शान्तिकुमारी अधिकारी जिसीको रिक्त हुन लागेको पदमा निर्वाचन हुनेछ । 

लुम्बिनीमा एमालेकी कोमल वली र रामलखन चमार तथा कांग्रेसका दृगनारायण पाण्डेले बिदा लिनेछन् । 

त्यस्तै कर्णाली प्रदेशतर्फ एमालेकी कविता बोगटी, माओवादीका  जीवन बुढा र (एकीकृत समाजवादी) ठगेन्द्रप्रकाश पुरी बिदा हुँदैछन् । 

सुदूरपश्चिममा एमालेका चक्रप्रसाद स्नेही , कांग्रेसकी तारादेवी भट्ट र  (एकीकृत समाजवादी)का शेरबहादुर कुँवरको पदावधी सकिन लागेको हो । माओवादीका रामनारायण बिडारी मनोनीत भएका थिए । 

रिक्त हुन लागेका यी १९ पदमा माघ १२ गते निर्वाचन हुँदैछ । मनोनीत पदमा भने सरकारको सिफारिसमा राष्ट्रपतिले मनोनीत गर्ने व्यवस्था रहेको छ । 

निर्वाचनका लागि निर्वाचन आयोगले निर्वाचन कार्यतालिका सार्वजनिक गरिसकेको छ । पद रिक्त हुनुभन्दा ३५ दिन अगावै निर्वाचन गर्नुपर्ने व्यवस्था सोहीअनुसार निर्वाचन हुन लागेको हो । 

कांग्रेस, माओवादी, जनता समाजवादी पार्टी (जसपा), नेकपा (एस) र राष्ट्रिय जनमोर्चा (राजमो) को पाँच दलीय गठबन्धनले राष्ट्रिसभा निर्वाचनमा गठबन्धन नै गरेर जाने तयारीमा छन् । 

प्रतिनिधिसभाको निर्वाचनसम्म नै गठबन्धनलाई जोगाउने प्रतिबद्धता पनि नेताहरुले व्यक्त गरिरहेका छन् । 

अघिल्लो साता राजधानीमा आयोजित एक कार्यक्रममा गठबन्धन दलका शीर्ष नेताहरुले गठबन्धनको आवश्यकता औंल्याउदै त्यसलाई निरन्तरता दिने बताएका थिए । 

पाँच दलीय गठबन्धन कायम रहे केन्द्र, प्रदेशको नेतृत्व गुमाएर प्रतिपक्षमा पुगेको एमालेलाई भने निकै नोक्सान हुने देखिन्छ । गठबन्धन भर्सेस एमालेको अवस्था आए एमालेले यसअघि निर्वाचित भएको सिट गुमाउने देखिन्छ । 

राष्ट्रिय सभा निर्वाचनमा प्रदेश सभाका सदस्य र स्थानीय तहतर्फ नगरपालिका प्रमुख/उपप्रमुख, गाउँपालिका अध्यक्ष/उपाध्यक्ष मतदानमा सहभागी हुन पाउनेछन् । 

माघ १२ गते हुन लागेको निर्वाचनमा प्रदेशसभातर्फ ५३२ र स्थानीयतहतर्फ १४९३ गरी २०२५ मतदाताले मतदाता रहेका छन् । 

राष्ट्रिय सभा निर्वाचनमा प्रदेशसभा सदस्यको मतभार ४८ र नगरपालिका प्रमुख/ उपप्रमुख, गाउँपालिका अध्यक्ष /उपाध्यक्ष को मतभार १८ गणना हुन्छ । 

यस्तो छ अंकगणित 
प्रदेश १ : गठबन्धन भन्दा एमाले बलियो, निर्णायक अन्य 

प्रदेश १ मा स्थानीय तहतर्फ नेकपा एमालेको प्रमुख /अध्यक्ष ६३, उपप्रमुख/उपाध्यक्ष ८० गरी १४३ जना रहेका छन् ।  १४३ मतदातालाई १८ को दरले हिसाब गर्दा दुई हजार ५७४ मतभार हुन आउँछ । 

त्यस्तै प्रदेशतर्फ एमालेका ४१ सदस्य रहेका छन् । जसको मतभार ४८ को दरले एक हजार ९ सय ६८ हुन्छ । प्रदेश १ मा एमालेसँग चार हजार ५४२ मतभार रहेको छ । 

स्थानीय तहतर्फ कांग्रेसका प्रमुख/अध्यक्ष ५१ र उपप्रमुख/ उपाध्यक्ष गरी ३८ गरी ८९ जना रहेका छन् । १८ ले गणना गर्दा उनीहरुको मतभार १ हजार ६०२ हुन आउँछ । 

प्रदेश सभामा कांग्रेसका २१ सदस्य रहेका छन् । ४८ ले गणना गर्दा उनीहरुको मतभार एक हजार आठ हुन्छ ।  यसरी हेर्दा प्रदेशमा कांग्रेसको मतभार कुल दुई हजार ६१० हुन्छ । 

त्यस्तै नेकपा (माओवादी केन्द्र) का प्रमुख/अध्यक्ष ९, उपप्रमुख/ उपाध्यक्ष ७ गरी १६ जना रहेका छन् । 

उनीहरुको मतभार २८८ हुन्छ । प्रदेशमा माओवादीका १४ सदस्य छन् । उनीहरुको मतभार ६७२ हुन्छ । यसरी हेर्दा प्रदेश १ मा माओवादीको कूल मतभार ९६० हुन आउँछ । 

उता, स्थानीयतहतमा नेकपा एकीकृत समाजवादीका प्रमुख /अध्यक्ष ६, उपप्रमुख/ उपाध्यक्ष ५ गरी ११ जना रहेका छन् । उनीहरुको मतभार १९८ रहेको छ । 

प्रदेशमा उक्त पार्टीका १० सांसद छन् । उनीहरुको मतभार ४८० हुन्छ । नेकपा एकीकृत समाजवादीको कूल मतभार ६७८ रहेको छ । 

यसैगरी गठबन्धनमा रहेको दल जनता समाजवादी पार्टी (जसपा) का प्रमुख/अध्यक्ष २, उपप्रमुख/ उपाध्यक्ष २ गरी ४ जना रहेका छन् । उनीहरुको मतभार ७२ रहेको छ ।

त्यस्तै प्रदेशमा जसपाको तीन सांसद रहेका छन् । उनीहरुको मतभार १४४ हुन्छ । प्रदेश १ मा जसपाको कूल २१६ मतभार हुन्छ । 

लोकतान्त्रिक फोरमका प्रमुख/अध्यक्ष ३, उपप्रमुख/ उपाध्यक्ष ४ गरी ७ जना रहेका छन् । जसको मतभार १२६ हुन्छ । 

राष्ट्रिय प्रजातन्त्र पार्टी (राप्रपा) प्रमुख/अध्यक्ष ३, उपप्रमुख/ उपाध्यक्ष १ गरी ४ जना रहेका छन् । जसको मतभार ७२ हुन आउँछ । त्यस्तै राप्रपाका १ प्रदेश सांसद गरी कूल १२० मतभार रहेको छ । 

त्यस्तै प्रदेशमा १ स्वतन्त्र सांसद् रहेका छन् । उनको मतभार ४८ हुन्छ ।  त्यस्तै यहाँ संघीय लोकतान्त्रिक राष्ट्रिय मोर्चाको १ सांसद रहेका छन् । जसको मतभार ४८ हुन्छ । 

कांग्रेसको दुई हजार ६१०, माओवादीको ९६०, एकीकृत समाजवादीकोे ६७८ र जसपाको २१६ गरी कूल ४ हजार ३२० मतभार हुन्छ । यसरी हेर्दा चार हजार ४६४ मतभार हुन्छ । 

यहाँ गठबन्धन भन्दा एमालेको मत धेरै छ ।  यसरी हेर्दा एमाले र गठबन्धन बाहेकको अन्यको मतभार ३४२ रहेको छ । यहाँ अन्यसँग रहेको मत निर्णायक हुने देखिन्छ ।

प्रदेश २ / फराकिलो अन्तर 

प्रदेश २ मा स्थानीय तहतर्फ एमालेका प्रमुख/अध्यक्ष १७,उपप्रमुख/उपाध्यक्ष १४ गरी ३१ मतदाता छन् । जसको मतभार ५५८ रहेको छ । 

प्रदेशमा एमालेका ८ सांसद छन् । प्रदेशतर्फ एमालेसँग ३८४ मतभार रहेको छ । स्थानीय तह र प्रदेशमा गरी एमालेसँग कूल ९४२ मतभार रहेको छ । 

कांग्रेसका प्रमुख/अध्यक्ष ४० ,उपप्रमुख/उपाध्यक्ष ३५ गरी ७५ ले मतदाता छन् । जसको मतभार एक हजार ३ सय ५० हुन्छ ।

प्रदेशतर्फ कांग्रेसका १९ सदस्य रहेका छन् । जसको मतभार ९१२ छ । स्थानीय तह र प्रदेशमा गरी कांग्रेसको कूल मतभार दुई हजार २६२ हुन्छ । 

त्यसैगरी माओवादीका प्रमुख/अध्यक्ष २१,उपप्रमुख/उपाध्यक्ष २४ गरी ४५ मतदाता छन् । स्थानीय तहतर्फ माओवादी मतभार ८१० छ । 

प्रदेशमा ८ सांसद छन् । उनीहरुको मतभार ३८४ मतभार हुन्छ । माओवादीको कूल मतभार एक हजार १९४ हुन्छ ।  नेकपा (एस) का प्रमुख/अध्यक्ष २, उपप्रमुख/उपाध्यक्ष ५ गरी ७  मतदाता छन् । जसको मतभार १२६ हुन आउँछ । 

नेकपा एसका प्रदेशमा १३ सांसद छन् । उनीहरुको मतभार ६२४ रहेको छ ।  जसको कूल मतभार ७५० छ । 

उता, जसपाका प्रमुख/अध्यक्ष ३१, उपप्रमुख/उपाध्यक्ष ३१ गरी ६२ मतदाता छन् । जसको मतभार एक हजार ११६ छ । 

प्रदेशमा जसपाका ३९ सांसद छन् । जसपासँग एक हजार ८७२ मतभार छ । जसपाको कूल मतभार दुई हजार ९ सय ८८ हुन्छ ।

त्यस्तै प्रदेश २ मा लोकतान्त्रिक समाजवादी (लोसपा) का  प्रमुख/अध्यक्ष २०, उपप्रमुख/उपाध्यक्ष २४ गरी ४४ मतदाता छन् । स्थानीय तहतर्फ लोसपाको ७९२ मतभार छ । 

प्रदेशतर्फ उक्त दलको १६ सांसद छन् । उनीहरुको मतभार ७६८ हुन आउँछ । स्थानीय तह र प्रदेश गरी लोसपासँग कूल १ हजार ५६० मतभार रहेको छ । 

यहाँ लोकतान्त्रिक फोरम प्रमुख/अध्यक्ष ३, उपप्रमुख/उपाध्यक्ष ३ गरी ६ मतदाता छन् । जसको मतभार १०८ रहेको छ ।

त्यस्तै स्थानीय तहतर्फ स्वतन्त्रका दुई जनाको मतभार ३६ छ ।  प्रदेशमा २ मा नेपाल संघीय  समाजवादीका सांसद छन् । जसको मतभार ४८/४८ हुन्छ ।

प्रदेश २ मा गठबन्धनका दल कांग्रेस, माओवादी, नेकपा एस र जसपाको गरी कूल मतभार सात हजार १ सय ९४ मतभार रहेको छ । अरुको १७५२ ।

अन्यसँग मिल्दा पनि गठबन्धन दलको अन्तर फराकिलो छ । 

वाग्मती : यस्तो छ अवस्था 

वाग्मती प्रदेशमा एमाले प्रमुख/अध्यक्ष ५७,उपप्रमुख/उपाध्यक्ष ५९ गरी ११६ मतदाता छन् ।  जसको मतभार दुई हजार ८८ रहेको छ । 

प्रदेशतर्फ एमालेका ४३ सांसद छन् उनीहरुको मतभार दुई हजार ६४ हुन्छ ।  एमालेसँग स्थानीय तह र प्रदेश गरी चार हजार १५२ मतभार छ । 

कांग्रेस प्रमुख/अध्यक्ष ३५, उपप्रमुख/उपाध्यक्ष ३२ गरी ६७ मतदाता छन् । स्थानीय तहतर्फ कांग्रेसको मतभार एक हजार २०६ हुन्छ । 

प्रदेश सभामा २२ जना सदस्य छन् । मतभार एक हजार ५६ हुन्छ । स्थानीय तह र प्रदेशमा गरी कांग्रेसको मतभार दुई हजार २६२ रहेको छ । 

माओवादीका प्रमुख/अध्यक्ष १७, उपप्रमुख/उपाध्यक्ष १६ गरी ३३ मतदाता छन् । जसको मतभार ५९४ हुन्छ । 

प्रदेशसभामा माओवादीका २३ सदस्य छन् । जसको मतभार एक १०४ हुन्छ । यसरी हेर्दा कूल मतभार एक हजार ६९८ छ । 

नेकपा (एस) का स्थानीय तहका प्रमुख/अध्यक्ष ७, उपप्रमुख/उपाध्यक्ष १० गरी १७ मतदाता छन् । जसको मतभार ३०६ हुन आउँछ । प्रदेशतर्फ एसका १३ जना सांसद रहेका छन् । जसको ६२४ मतभार हुन्छ । नेकपा एसको स्थानीय तह र प्रदेश गरी कूल मतभार ९३० हुन आउँछ । 

स्थानीयतह तर्फ जसपाका १ मतदाता छन् । जसको मतभार १८ हुन आउँछ । 

त्यसैगरी राष्ट्रिय प्रजातन्त्र पार्टीका प्रमुख/अध्यक्ष १,उपप्रमुख/उपाध्यक्ष १ गरी २ जना छन् । स्थानीय तहतर्फको मतभार ३६ हुन्छ । 

प्रदेशसभामा पनि राप्रपाका दुई सांसद छन् । उनीहरुको मतभार ९६ हुन्छ । यसरी राप्रपासँग कूल १३२ मतभार रहेको छ । 

स्थानीय तहमा नेपाल मजदूर किसान पार्टीका स्थानीय तहमा २ जना छन् । प्रदेशमा पनि २ सांसद रहेका छन् । उनीहरुको मतभार ९६ हुन आउँछ । नेमकिपाको कूल मतभार १३२ छ । 

विवेकशील साझा पार्टीका ३ सांसद छन् । यहाँ विवेकशीलसँग १४४ मतभार छ । यहाँ एक स्वतन्त्र सांसदको ४८ मतभार रहेको छ । 

गठबन्धनका दलहरुको कूल मतभार चार हजार ९०८ हुन आउँछ । जुन एमालेभन्दा दुई हजार ८४४ मतभारले बढी हो ।

वाग्मतीमा यसअघि भएको राष्ट्रिय सभा निर्वाचनमा नेमकिपाले आफ्नै सांसद् उठाउँदै आएको थियो । राप्रपाले भने एमालेलाई मत दिएको थियो ।

विवेकशील साझा तटस्थ बसेको थियो । अन्य दलहरुले एमालेलाई सहयोग गरे पनि मत अन्तर फराकिलै छ । 

गण्डकी प्रदेश

गण्डकीमा एमाले प्रमुख/अध्यक्ष ३४, उपप्रमुख/उपाध्यक्ष ३५ गरी ६९ मतदाता रहेका छन् । जसको मतभार एक हजार १२४२ हुन्छ । 

प्रदेशसभामा एमालेका २७ सांसद छन् । उनीहरुको मतभार १२ सय ९६ हुन आउँछ । स्थानीय तह र प्रदेशमा गरी कूल २५३८ मतभार रहेको छ । 

यहाँ कांग्रेसका प्रमुख/अध्यक्ष ४४, उपप्रमुख/उपाध्यक्ष ३७ गरी ८१ मतदाता छन् । जसको मतभार १४५८ हुन्छ । 

प्रदेशमा १५ सांसद् रहेका छन् । उनीहरुको मतभार ७२० हुन्छ । कांग्रेसको कूल मतभार  दुई हजार १७८ हुन आउँछ । 

त्यस्तै माओवादीका प्रमुख/अध्यक्ष ५, उपप्रमुख/उपाध्यक्ष ७ गरी १२ जना रहेका छन् । स्थानीय तहमा माओवादीको मतभार २१६ हुन आउँछ । प्रदेशमा १२ सांसद रहेका छन् । उनीहरुको मतभार ५७६ हुन्छ । स्थानीय तह र प्रदेशमा गरी माओवादीको मतभार ७९२ हुन्छ । 

गण्डकीमा जसपाका २ सांसद छन् । उनीहरुको मतभार ९६ हुन्छ ।  उता, एकीकृत समाजवादीका स्थानीय तहमा १ जना छन् । जसको मतभार १८ हुन्छ । 

राष्ट्रिय जनमोर्चा (राजमो) प्रमुख/अध्यक्ष १, उपप्रमुख/उपाध्यक्ष २ गरी ३ जना छन् । स्थानीय तहमा उसको मतभार ५४ रहेको छ ।  

प्रदेशमा राजमोको २ सांसद छन् । जसको मतभार ९६ हुन्छ ।  दुवै गरी राजमोसँग १५० मतभार रहेको छ ।   राप्रपाको स्थानीय तहमा २ जना  रहेका छन् । जसको मतभार ३६ रहेको छ । 

यहाँ स्वतन्त्रको स्थानीय तहमा २ जना छन् । जसको मतभार ३६ रहेको छ । प्रदेशसभामा १ स्वतन्त्र सांसद छन् । उनको मतभार ४८ गणना हुन्छ । 

गण्डकीमा गठबन्धनका दलसँग कूल तीन हजार १३८ मतभार रहेको छ । जुन एमालेको भन्दा ६१८ ले बढी हो । यहाँका स्वतन्त्र सांसद गठबन्धनको सरकारमा सामेल छन् । उनको मत गठबन्धनले पाए गठबन्धनको मतभार ६६६ हुनेछ । 

गठबन्धन र एमालेबाहेक अन्यको मतभार कूल १२० हुन्छ । सबैले एमालेलाई मत दिए पनि उसको जितको सम्भावना छैन । 

लुम्बिनी प्रदेश 

लुम्बिनी प्रदेशमा एमालेसँग स्थानीय तहका प्रमुख/अध्यक्ष ४३, उपप्रमुख/उपाध्यक्ष ४३ गरी ८६ मतदाता रहेका छन् । जसको मतभार एक हजार ५४८ हुन्छ । 

प्रदेश सभामा ३७ सांसद छन् । उनीहरुको मतभार १७ सय २८ हुन्छ । एमालेसँग कूल मतभार तीन हजार २७६ छ । 

गठबन्धनको घटक कांग्रेसका प्रमुख/अध्यक्ष ३३, उपप्रमुख/उपाध्यक्ष ३१ गरी ६४ मतदाता छन् । स्थानीय तहमा उसको मतभार एक हजार १५२ हुन आउँछ । 

त्यस्तै प्रदेशमा कांग्रेसका १९ सांसद छन् । जसको मतभार ९१२ छ । यसरी कांग्रेससँग लुम्बिनीमा कूल दुई हजार ४६४ मतभार छ । 

त्यस्तै माओवादीसँग प्रमुख/अध्यक्ष १९, उपप्रमुख/उपाध्यक्ष २२ गरी ४१ रहेका छन् । मतभार ७३८ हुन्छ । प्रदेशसभामा १९ सांसद छन् । जसको मतभार ९१२  छ ।  माओवादीको कूल मतभार एक हजार ६५० हुन्छ । 

जसपाको स्थानीय तहका प्रमुख/अध्यक्ष ५, उपप्रमुख/उपाध्यक्ष ५ गरी १० मतदाता छन् । जसको मतभार १८० छ । त्यस्तै जसपाका ३ प्रदेश सदस्य छन् । जसको मतभार १४४ हुन्छ । जसपासँग कूल ३२४ मतभार हुन  आउँछ । 

नेकपा (एस) उपप्रमुख/उपाध्यक्ष ४ जना रहेका छन् । जसको मतभार ७२ हुन्छ । त्यस्तै प्रदेश सभामा एक सांसद छन् । नेकपा एसको मतभार १२० मतभार रहेको छ । 

राजमोका प्रमुख/अध्यक्ष २ , उपप्रमुख/उपाध्यक्ष २ गरी ४ जना मतदाता छन् । जसको मतभार ७२ हुन्छ ।  त्यस्तै प्रदेशसभामा १ सांसद छन् । जसको मतभार ४८ हुन्छ । यहाँ राजमोको कूल मतभार १२० छ । 

लुम्बिनीमा सूर्य चिन्ह्बाट निर्वाचित एक सांसद् छन् । जसको मतभार ४८ हुन आउँछ । त्यस्तै स्थानीय तहमा स्वतन्त्र ३ जना प्रतिनिधि छन् । जसको मतभार ५४ हुन आउँछ । 

लोसपाका स्थानीय तहमा २ मतदाता छन् । जसको मतभार ३६ छ । राप्रपाको पनि २ मतदाता रहेका छन् । जसको मतभार ३६ हुन आउँछ । 

स्थानीय तहमा लोकतान्त्रिक फोरमबाट निर्वाचित भएका दुई जना रहेका छन् । उनीहरुको मतभार ३६ हुन आउँछ ।  यहाँ गठबन्धनका दलको मतभार ४ हजार २७८  हुन आउँछ । जुन एमालेको भन्दा १००२ मतभार बढी हो । 

यहाँ एमाले र गठबन्धन बाहेक दलसँग २१० मतभार रहेको छ । यहाँ गठबन्धन बाहेकले एमालेलाई सहयोग गरे पनि उसको जितको सम्भावना छैन । 

कर्णाली प्रदेश 

कर्णाली प्रदेशमा स्थानीय तहतर्फ एमालेको प्रमुख/अध्यक्ष २१, उपप्रमुख/उपाध्यक्ष २४ गरी ४५  जना छन् ।  उनीहरुको मतभार ८१० हुन आउँछ ।

प्रदेशतर्फ १३ सांसद छन् । उनीहरुको मतभार ६२४ हुन आउँछ । एमालेसँग कूल एक हजार ४३४ मतभार रहेको छ । 

कांग्रेसको प्रमुख/अध्यक्ष  २५, उपप्रमुख/उपाध्यक्ष १५ गरी ४० मतदाता छन् । स्थानीय तहमा कांग्रेसको ७२० मतभार छ ।  प्रदेशमा सभामा कांग्रेसका ६ सांसद छन् । उनीहरुको मतभार २८८ हुन आउँछ । यहाँ कांग्रेससँग कूल १००८ मतभार छ । 

माओवादीसँग प्रमुख/अध्यक्ष २५ , उपप्रमुख/उपाध्यक्ष २६ गरी ५१ मतदाता छन् । उनीहरुको मतभार ९१८ हुन्छ । 

प्रदेशमा माओवादीका १२ सांसद छन् । उनीहरुको मतभार ५७६ हुन्छ । स्थानीय तह र प्रदेशमा गरी माओवादीसँग कूल एक हजार ४९४ मतभार छ । 

नेकपा एसको स्थानीय तहमा प्रमुख/अध्यक्ष ६ , उपप्रमुख/उपाध्यक्ष ८ गरी १४ जना छन् । उनीहरुको मतभार २५२ हुन्छ ।  प्रदेशमा तीन ३ सांसद छन् ।

स्थानीय तहको २५२ र प्रदेशको १४४ गरी कूल  ३९६ मतभार हुन आउँछ ।  

राप्रपाका उपप्रमुख/उपाध्यक्ष २ जनाको मतभार ३६ हुन आउँछ । त्यस्तै यहाँ राप्रपाका १ सांसद छन् । यहाँ राप्रपाको कूल  ८४ मतभार रहेको छ । 

त्यस्तै यहाँ स्थानीय तहमा स्वतन्त्र ६ जना मतदाता  रहेका छन् । जसको मतभार १०८ हुन्छ । लुम्बिनीमा गठबन्धनसँग २ हजार ८९८ मतभार छ । अन्य १९२ मतभार रहेको छ ।

सुदूरपश्चिम 

सुदूरपश्चिमको स्थानीय तहमा एमालेका प्रमुख/अध्यक्ष ३४, उपप्रमुख/उपाध्यक्ष ३६ गरी ७० जना रहेका छन् । जसको मतभार एक हजार २६० हुन आउँछ ।   प्रदेशसभामा एमालेका ११ सांसद छन् । उनीहरुको मतभार ५२८  छ । सूदूरपश्चिमा एमालेसँग कूल १ हजार ७८८ मतभार छ । 

कांग्रेसको स्थानीय तहका प्रमुख/अध्यक्ष ३८, उपप्रमुख/उपाध्यक्ष ३४ गरी ७२ जना छन् । उनीहरुको मभार एक हजार २९६ हुन्छ । 

प्रदेश सभामा १२ सदस्य छन् । जसको मतभार ५७६ हुन आउँछ ।  कूल मतभार १८७२ हुन आउँछ । माओवादीका प्रमुख/अध्यक्ष १०, उपप्रमुख/उपाध्यक्ष ९ गरी १९ जना रहेका छन् । जसको मतभार ३४२ हुन्छ । 

माओवादीका १३ सांसद छन् ।  उनीहरुको मतभार ६२४ हुन्छ । कूल ९६६ मतभार हुन आउँछ ।  नेकपा एस प्रमुख/अध्यक्ष ५ , उपप्रमुख/उपाध्यक्ष ८ गरी १३ जना रहेका छन् ।  मतभार २३४ हुन्छ । 

प्रदेशतर्फ १४ सांसद छन् ।  जसको मतभार ६७२ हुन्छ । कूल ९०६ मतभार हुन आउँछ ।  त्यस्तै प्रदेशतर्फ जसपाका १ सांसदको मतभार ४८ हुन्छ । 

यहाँ लोसपाका पनि १ सांसद रहेका छन् ।  जसको मतभार ४८ हुन्छ ।  स्थानीय तहमा लोकतान्त्रिक फोरमका दुई जना मतदाता रहेका छन् । जसको मतभार ३६ हुन्छ । 

सूदूरपश्चिम प्रदेशमा गठबन्धनसँग ३ हजार ७ सय ९२ मतभार रहेको छ । एमालेको उपस्थिति कमजोर हुने देखिन्छ ।