काठमाडौं । सहिद स्मारक ‘ए’ डिभजिन लिगमा यस सिजनमा ललितपुरका क्लबहरूको वर्चस्व छ । हुन त शीर्ष डिभिजन लिग उपत्यकाबाहिर जान सकेको छैन । उपत्यकामै पनि यसअघि काठमाडौंको दबदबा हुन्थ्यो । तर, पछिल्लो समय त्यो ललितपुरमा सरेको छ । यसपटक लिगमा १४ मध्ये ६ क्लब ललितपुरकै हुन् । तिनै ६ ललितपुरे क्लबमध्येको एक हो, फ्रेन्ड्स क्लब ।

काठमाडौंसँग सीमाना जोडिएको कुपोन्डोलका युवाहरूले २०२९ सालमा स्थापना गरेको क्लब हो, फ्रेन्ड्स । ‘ए’ डिभिजन लिगमा फ्रेन्ड्सको पनि पुरानो इतिहास छ । २०३१ सालमा ‘ए’ डिभिजन लिगमा उक्लिएपछि अहिलेसम्म तल झरेको छैन । मतलब रेलिगेसनमा परेको छैन । नियमित ‘ए’ डिभिजन लिग खेल्ने थोरै क्लबमध्यको एक फ्रेन्ड्स पनि हो । 

एक समय फ्रेन्ड्स क्लब नखेल्ने चर्चित खेलाडी कमै हुन्थे । तत्कालीन समयमा नेपाली फुटबलका स्टार खेलाडी गणेश थापा, विज्ञानराज शर्मा, भक्तराज कर्णीकार, विदुर विष्ट, नरेन्द्रमान सिंह, वाईबी घले, रञ्जन विष्ट, कृष्ण थापालगायतका खेलाडीले फ्रेन्ड्सबाट खेले । 

सुरुआती समयमा ‘नकआउट’ प्रतियोगितामा फ्रेन्ड्सको दबदबा भए पनि लिगमा कहिल्यै उपाधि जित्न सकेन । फ्रेन्ड्स कहिल्यै तल झरेन । र, कहिल्यै उपाधि पनि जितेन । नेपाली फुटबलमा फ्रेन्ड्सको परिचय नै ‘मिड टेबल’ टिम बनेको छ । न तल झर्छ, न माथि जान्छ । तर, लिगमा सबैभन्दा धेरै उपाधि जित्ने मनाङ मस्र्याङ्दीका लागि फ्रेन्ड्स सधैँ टाउको दुखाइ बन्ने गर्छ । दुई क्लबबीच गजबकै प्रतिद्वन्द्विता छ ।

२०७५ सालकै कुरा गरौँ, मनाङ लिग अवधिभर सबै खेल जितेको थियो । सबै खेल जितेर उपाधि उचाल्ने कीर्तिमान नजिक थियो, मनाङ । ऐतिहासिक अवसरको नजिक पुगेको मनाङलाई अन्तिम खेलमा फ्रेन्ड्सले स्तब्ध बनाइदियो । उक्त सिजन फ्रेन्ड्सले जम्मा तीन खेल जितेको थियो । त्यसमा मनाङसँग १–० को जित पनि सामेल छ । गत वर्ष पनि फ्रेन्ड्सले मनाङलाई १–१ को बराबरीमा रोकेको थियो ।

अघिल्लो संस्करणमा फ्रेन्ड्सले ब्राजिलका मार्कोस फिलिपलाई मुख्य प्रशिक्षणको जिम्मेवारी दिएको थियो । तर, क्लबले पुछारबाट चौँथो स्थानमा रह्यो । चार खेलमात्र जित्न सक्यो । क्लबले पहिलोपटक लिग खेल्दा टोलीका सदस्य मृगेन्द्र मिश्रलाई यसपटकको जिम्मेवारी दिएको छ । उनलाई बालगोपाल महर्जनले पर्दा पछाडिबाट सघाउने छन्, प्राविधिक निर्देशकका रूपमा । ०३१ मा क्लबले पहिलोपटक ‘ए’ डिभिजन खेलेजस्तै मिश्रले पनि पहिलोपटक ‘ए’ डिभिजन खेलेका थिए ।

“मैले पहिलोपटक ‘ए’ डिभिजन लिग खेलेकै फ्रेन्ड्स क्बलबाट हो । अहिले फेरि मुख्य प्रशिक्षकका रूपमा यस क्लबमा आएको छु । मलाई पुरानो घर फर्किएको अनुभूति भएको छ,” मिश्रले थपे ।

मिश्र पछिल्लो समय गोलकिपर प्रशिक्षकका रूपमा व्यस्त थिए । अहिले आफ्नो पुरानो क्लब सम्हाल्न आइपुगेका छन् । हुन त यसअघि पनि फ्रेन्ड्स क्लबको प्रशिक्षण सम्हालिसकेका छन् । २०६५ मा । त्यसपछि राष्ट्रिय टोलीमा गोलकिपर प्रशिक्षणमा व्यस्त बनेका उनी लामो योजनासहित पुनः फ्रेन्ड्समा फर्किएका छन् । उनले २०६२ मा ललितपुरकै थ्री स्टार क्लब पनि सम्हालेका थिए । त्यतिबेला थ्री स्टार लिगमा दोस्रो भएको थियो ।

मिश्रले असोज पहिलो साताबाट फ्रेन्ड्समा प्रशिक्षण सुरु गरेका थिए । टिममा ठुलो नाम गरेका खेलाडी छैनन् । तर, पनि मंसिर ३ गतेबाट सुरु हुने लिगमा जुनसकै ठुला भनिएका टोलीलाई ‘सबक’ सिकाउने लक्ष्यमा मिश्र तल्लिन छन् । त्यसकै लागि मिहिनेत गरेका छन् । 

“लामो समयपछि आफ्नो पुरानो क्लबमा फर्किएको छु । त्यसकारण  पनि यस क्लबलाई जसरी हुन्छ राम्रो गर्ने लक्ष्यमा छौैँ । ठुलो नाम गरेका खेलाडी छैनन् । तर, सन्तुलित टोली बनेको छ,” पुल्चोक इन्जिनियरिङ कजेलको मैदानमा प्रशिक्षण गराइरहेका मिश्रले भने, “हामी कमजोर छैनौँ । हामी सबैलाई सम्मान गर्छौं । तर, ठुला भनिएका क्लबलाई हामी सबक सिकाउन तयार छौँ ।”

क्लबले राष्ट्रिय टोलीका पूर्व खेलाडी प्रकाश बुढाथोकीलाई कप्तानको जिम्मेवारी दिएको छ । प्रिजेन तामाङ, निराजन महर्जन, असिम भुसाल नाम चलेका खेलाडी हुन् । गोल पोस्टको जिम्मेवारी भारतका खेलाडी राहुल यादवले सम्हाल्नेछन् । ट्रिडिनान एन्ड टोबागोका तीन खेलाडी छन् । यिनै खेलाडीको भरमा फ्रेन्ड्स यसपटक पनि ‘मिड टेबल’ मै बस्ने लक्ष्यमा छ । तर, यसपटक तल होइन, शीर्ष ६ भित्र बस्ने योजनामा छ ।

सिजनअघि फ्रेन्ड्सले तीन मैत्रीपूर्ण फुटबल खेलेको छ । त्यसमध्ये दुई खेल हारेको फ्रेन्ड्सले एक खेल जितेको छ । फ्रेन्ड्स पहिलो खेलमा त्रिभुवन आर्मीसँग ५–१ ले हारेको थियो । दोस्रो खेलमा थ्री स्टारसँग १–० ले पराजित फ्रेन्ड्सले तेस्रो खेलमा न्युरोड टिम (एनआरटी)विरुद्ध ४–१ को विजय हासिल गरेको थियो । 

“हामीले दिन प्रतिदिन सुधार गर्दै गएका छौँ । क्लबमा नयाँ खेलाडीको वर्चश्स्व छ । तर, लिग लामो समय चल्ने भएकाले सहज छैन । अझ सिङ्गल राउन्ड रोबिन लिग भएकाले अझ चुनौती छ,” मुख्य प्रशिक्षक मिश्रले भने, “त्यसकारण हरेक खेल हामीलाई चुनौतीपूर्ण हुनेछ । फुटबलमा गोल गर्नुपर्छ । हामी डराएर खेल्दैनौँ । गत सिजनको भन्दा राम्रो नतिजा ल्याउछौँ ।”

फ्रेन्ड्सले उद्घाटन खेलमै ललितपुरकै सातदोबाटो युथसँग प्रतिस्पर्धा गर्नेछ । सातदोबाटो नवप्रवेशी क्बल हो । यसै सिजन ‘बी’ डिभिजन लिग च्याम्पियन बनेर ‘ए’ डिभिजन उक्लिएको हो । दोस्रो खेल संकटाविरुद्ध खेल्नेछ । 

“पहिलो खेल हाम्रा लागि महत्वपूर्ण छ । हाम्रा लागि मात्र सबैलाई पहिलो खेल महत्वपूर्ण हुनेछ,” प्रशिक्षक मिश्रले भने, “हामी पहिलो खेल जसरी पनि जित्ने लक्ष्यमा छौँ । किनभने यसले खेलाडीको मनोविज्ञानमा पनि असर पार्छ । सुरुआत राम्रो हुनुपर्छ भन्ने हाम्रो मान्यता छ । त्यसैले हामी सुखद सुरुआत गर्ने लक्ष्यमा हुन्छौँ ।”