मस्कट, ओमान । नेपाली क्रिकेट अहिले पुस्तान्तरणको चरणमा छ । अर्थात् पुस्ता हस्तान्तरणको प्रक्रियामा छ । 

पारस खड्को पुस्ताबाट अब सन्दीप लामिछानेको पुस्तामा नेतृत्व जाँदैछ । पुस्तान्तरणको चरणमा कहिलेकाहीँ  टोलीको प्रदर्शन खराब हुने गर्छ । नयाँ पुस्ता प्रतिभावान खेलाडी जन्माउन सकिएन भने टोलीको प्रदर्शन लामो समयसम्म लम्बिन्छ ।

तर ओमान भ्रमणमा युवाहरुले जुन प्रदर्शन गरे, त्यसले पुस्तान्तरणको चरणले पनि नेपाली क्रिकेटमा खास असर नपर्ने संकेत दिएको छ । ओमानमा नेपालले खेलेका ६ मध्य चार खेल जित्यो भने दुई खेलमा पराजित भयो । छ वटै खेलमा युवा खेलाडीको प्रदर्शन परिपक्क रह्यो । अब हामी टिम अघि बढाउन सक्छौं भन्ने सन्देश युवाहरुले दिएका छन् ।

ओमान भ्रमणमा कप्तान ज्ञानेन्द्र मल्ल, विनोद भण्डारी र शरद भेषावकरबाहेक सबै नयाँ पुस्ताका खेलाडी थिए । ज्ञानेन्द्र र विनोदले सबै खेल खेले भने शरदले ओमानविरुद्धको अन्तिम खेलमात्र खेले । ज्ञानेन्द्रले लगातार दुई खेलमा अर्धशतक बनाए । त्यसबाहेक ओमानमा नेपालको प्रदर्शनमा युवा खेलाडी केन्द्र भागमा रहे । 

कुशल भुर्तेल, आसिफ शेख, रोहितकुमार पौडेल, सन्दीप लामिछाने र करण केसीको प्रदर्शन अब्बल रह्यो । नेपालको नतिजा यिनै खेलाडीको प्रदर्शनमा अडियो । 

‘‘हामीले जसरी विगत दुई तीन वर्षदेखी नयाँ खेलाडीलाई प्रोत्साहन गरिरहेका थियौं । अब त्यसको नतिजा देखिन थालेको छ । अब हाम्रो चाहना पनि त्यही छ यिनै खेलाडीहरुले विस्तारै टिमको नेतृत्व लिनुपर्छ । यिनै खेलाडीले राम्रो प्रदर्शन गर्नुपर्छ,’’ नेपाली क्रिकेट टोलीका कप्तान ज्ञानेन्द्र मल्लले भने, ‘‘हामीहरुले अब एक समयपछि छाड्नै पर्छ । युवा खेलाडीहरुले एउटा नभए अर्को, अर्को नभए अर्कोले खेल जिताउने गरी प्रदर्शन गरिरहेका छन् । नेपाली क्रिकेटका लागि यो राम्रो संकेत हो ।’’

सन्दीपले पीएनजीविरुद्ध पहिलो खेलमा चार र दोस्रो खेलमा ६ विकेट लिए । दोस्रो खेलमा करियरकै उत्कृष्ट प्रदर्शन गरे । उनले पीएनजीविरुद्धको उक्त खेलमा ५.१ ओभरमा ११ रन दिएर ६ विकेट लिए । आईसीसी क्रिकेट विश्वकप लिग–२ मा पनि सन्दीपले तीन खेलमा ८ विकेट लिए । ओमानविरुद्धको अन्तिम खेलमा चार विकेट लिएका सन्दीपले अघिल्लो दुई खेलमा समान दुई विकेट लिएका थिए । अमेरिकाविरुद्धको दोस्रो खेलमा भने उनीले चोटका कारण बलिङ गर्न सकेनन् । 

त्यस्तै करणले ओमान भ्रमणमा पाँच खेलमा १० विकेट लिए । पीएनजीविरुद्ध एक मात्र खेलेका करण विकेटविहीन थिए । तर आईसीसी क्रिकेट विश्वकप लिग–२ मा उनले राम्रो गरे । ओमानविरुद्धको अन्तिम खेलमा चार विकेट लिएका करणले अघिल्लो तीन खेलमा समान दुई विकेट लिए । 

बलिङमा प्रायःजसो राम्रो प्रदर्शन गर्ने नेपालको ब्याटिङ भने कमजोर मानिन्थ्यो । तर एकदिवसीय खेलमा डेब्यू गरेका आसिफ र कुशलको प्रदर्शनले नेपाली टोलीमा आशाका किरण छरेको छ । 

अझ ओपनिङ जोडीमा देखिने सधैको समस्यालाई जो जोडीको आगमनले समाधान गर्ने अपेक्षा गरिएको छ ।

एकदिवसीय अन्तर्राष्ट्रिय क्रिकेटमा पहिलो विकेटका लागि सबैभन्दा ठुलो रनको साझेदारी गर्ने कीर्तिमान पनि यिनै दुईको नाममा छ । अमेरिकाविरुद्ध पहिलो खेलमा कुशल र आसिफले पहिलो विकेटका लागि ६६ रनको साझेदारी गरेका थिए । 

उक्त खेलमा ८४ रन बनाएका थिए । कुशलले ६ एकदिवसीय अन्तर्राष्ट्रिय खेलमा एक अर्धशतकसहित १४४ रन बनाइसकेका छन् । त्यस्तै आसिफले पनि एक अर्धशतकसहित १८९ रन बनाइसकेका छन् । नेपालका लागि सबभन्दा ठूलो साझेदारी गर्ने कीर्तिमान पनि आसिफको नाममा बनेको छ । उनले कप्तान ज्ञानेन्द्र मल्लसँग ओमानविरुद्ध दोस्रो विकेटका लागि ९५ रनको साझेदारी गरेका थिए । पारस खड्कापछि नेपालबाट एकदिवसीय अन्तर्राष्ट्रिय क्रिकेटमा व्यक्तिगत उच्च स्कोर पनि आसिफले आफ्नो नाममा लेखाएका छन् । उनले ओमानविरुद्ध ९० रन बनाएका थिए ।

‘‘पारस दाईले सन्यास लिनुभयो । शरद दाईले पनि धेरै गेम खेल्नभएको थिएन । दुर्भाग्य दीपेन्द्रसिंह पनि घाइते भयो । उहाँहरु नहुँदा त्यो स्थानलाई पूर्ति गर्नु जसरी थियो । यस्तो अवस्थामा नयाँ खेलाडीका लागि आफुलाई प्रमाणित गर्ने एउटा अवसर थियो । त्यसमा सफल भएका छन्,’’ नयाँ पुस्ताको प्रदर्शनबारे सन्दीपले भन्छन्, ‘‘खेलाडीहरुले म पनि केही गर्न सक्छु भन्ने भावनाका साथ खेल्नुभयो । यो राम्रो सुरुआत भएको छ । जुन भविष्यका लागि राम्रो संकेत हो ।’’

ओमानमा भ्रमणमा अर्का युवा खेलाडी रोहितले पनि शानदार पुनरागमन गरे । चाहे पीएनजीविरुद्धको खेल होस् वा आईसीसी क्रिकेट विश्वकप लिग–२ होस् नेपालको जितमा रोहितले महत्वपूर्ण इनिङ्स खेलेका छन् । पीएनजीविरुद्ध रोहितले पहिलो खलमा ४१ तथा दोस्रो खेलमा ८६ रन बनाए । मध्यक्रमका ब्याट्सम्यान अमेरिकाविरुद्धको पहिलो खेलमा अविजित ६२ रन बनाए । 

नेपालबाट सबभन्दा कम उमेरमा एकदिवसीय अन्तर्राष्ट्रिय क्रिकेटमा डेब्यू गर्ने खेलाडी बनेका गुल्सन झाले पनि सम्भावना देखाएका छन् । भलै उनले खेलेका एक मात्र खेलमा राम्रो प्रदर्शन गर्न सकेनन् । बलिङमा विकेट लिन नसके पनि ब्याटिङमा उनले ५३ बलमा दुई चौका र एक छक्कासहित २८ रन जोडेका थिए । यसबाट उनले राम्रो अलराउन्डर बन्न सक्ने संकेत दिएका छन् । 

‘‘युथहरुले यो भ्रमणमा जुन प्रदर्शन गरे त्यो खुसीको कुरा हो । ओपनिङ ब्याट्सम्यानहरुले राम्रो गरेका छन् । रोहितले त्यस्तै राम्रो पुनरागमन गरेका छन् । गुल्सन त्यसैगरी आएका छन्,’’ कप्तान ज्ञानेन्द्रले थपे, ‘‘उनीहरुको वर्क इथिक्सहरु हेर्ने हो भने हामीले यो स्तरमा क्रिकेट खेल्दा खेलाडीबाट जुन कुरा चाहेका थियौं । जुन क्यारेक्टर खोजेका थियौं । त्यो विस्तारै विल्डअफ भइराखेको छ । यसलाई मिलाएर अघि बढाउन सक्यौं भने भविष्यमा धेरै राम्रो हुन्छ ।”