मस्कट, ओमान । आईसीसी क्रिकेट विश्वकप लिग–२ अन्तर्गत ओमानमा जारी त्रिदेशीय शृंखलामा अमेरिकाविरुद्धको दोस्रो खेलमा युवा खेलाडी गुल्सन झाले डेब्यू गरेका छन् । 

ओमानको अल अमारतस्थित ओमान क्रिकेट एकेडेमीको मैदानमा अर्का तीव्र गतिका बलर सोमपाल कामीले गुल्सनलाई क्याप दिएका थिए । सोमपालले क्याप दिँदै भनेका थिए, ‘‘राष्ट्रिय टोलीसम्मको यात्रा गर्न र निरन्तरता दिन सजिलो पक्कै छैन । कहिलेकाहीँ प्रदर्शन बिग्रन सक्छ । त्यस्तो बेला पीडा हुन्छ । त्यसबाट आत्तिनु हुँदैन । सफल यात्राको लाग शुभकामना ।’’

नेपालविरुद्ध अमेरिकाका कप्तान सौरभ नेत्रभाल्करले टस जितेर बलिङ गर्ने निर्णय गरेको थियो । 

को हुन् गुल्सन ?

६ महिनाअघि कीर्तिपुरस्थित त्रिवि क्रिकेट मैदानमा सम्पन्न मेयर्स कपको फाइनल खेलमा सशस्त्र प्रहरी बल (एपीएफ) क्लब र नेपाल पुलिस क्लबबीच कडा प्रतिस्पर्धा हुने अनुमान गरिएको थियो । तर, सबैले अपेक्षा गरेको भन्दा नतिजा भिन्न आयो । पुलिस क्लबले एकतर्फी खेल आफ्नो पक्षमा पार्यो । 

कारण थियो, १७ वर्षीय तीव्र गतिका बलर गुल्सन झा । गुल्सन झाले उक्त खेलमा सात ओभरमा ३६ रन दिएर चार विकेट लिए । त्यही खेलमा गरेको प्रदर्शनबाट गुल्सनले सबैको नजर आफूमा केन्द्रित गरे । 

गुल्सनले एपिएफको सुरुवाती चारमध्ये तीन ब्याट्सम्यानलाई पवेलियनको बाटो देखाएका थिए । ओपनर शंकर राना ४, कप्तान शरद भेषवाकर र भुवन कार्की शून्य तथा कमलसिंह ऐरीलाई १ रन बनाएर आउट भएका थिए । पुलिस क्लबबाट गुल्सनको त्यो दोस्रो खेल थियो । पहिलो खेलमा भने उनी विकेटविहीन बनेका थिए ।

फाइनलपछिको प्रतिक्रियामा एपीएफका कप्तान शरदले गुल्सनलाई ‘सरप्राइज प्याकेज’ भनेका थिए । शरदले भनेजस्तै गुल्सन अहिले ओमान भ्रमणमा पनि अन्य टिमका लागि ‘सरप्राइज प्याकेज’ बनेका छन् । गुल्सनको बलिङ गर्ने तरिकाबारे अन्य टिम बेखबर छ । भएपनि राम्रोसँग अध्ययन गर्न पाएका छैनन् । त्यसैले पनि आज अमेरिकाका लागि उनी ‘सरप्राइज प्याकेज’ हुन सक्छन् ।

पुलिस क्लबको यात्रा
सर्लाही मलंगवाका ६ फिटभन्दा अग्ला गुल्सनले प्रधानमन्त्री कपका लागि प्रदेश २ बाट छनोट प्रतियोगिता खेलेका थिए । प्रदेशले पनि गुल्सनलाई वैकल्पिक खेलाडीका रूपमा राखेको थियो । प्रधानमन्त्री कपअघि ललितसिंह भण्डारी दुर्घटनामा परेर घाइते भएपछि पुलिस क्लबले उनको विकल्प खोजिरहेको थियो । त्यहीबेला पुलिस क्लबका प्रशिक्षक मनोज कटवालले गुल्सनको बारेमा थाहा पाए । ट्रायलका लागि बोलाए । गुल्सनले मनोजको विश्वास जित्न सफल भए । पुलिस क्लबले गुल्सनलाई आवद्ध गर्यो । 

तर, मेयर कपको सुरुमै उनको ढाडमा समस्या आयो । त्यसकारण सुरुआती खेल गुमाए । सेमिफाइनलमा काठमाडौं मेयर–११ विरुद्ध गुल्सनले मौका पाए । तर उनी विकेटविहीन बने । तर, दोस्रो खेलमा उनले आफ्नो जादु देखाउन सफल भए । 

संयोग नेपाली राष्ट्रिय टोलीमा पहिलो पटक पर्दा पनि उनको खुट्टामा चोट लाग्यो । आईसीसी क्रिकेट विश्वकप लिग–२ का ओमान भ्रमणमा हुँदा चोटकै कारण उनले सुरुआती खेल गुमाए । अहिले फिट भइसकेका छन् । शुक्रबार अमेरिकाविरुद्ध खेल्दैछन् ।

सुरुआती क्रिकेट यात्रा
घरेलु प्रतियोगिता खेलेको छोटो समयमै राष्ट्रिय टोलीमा पर्न सफल गुल्सन एकाएक उदाएका भने पक्कै होइनन् । गुल्सनले पछिल्लो चार वर्षदेखि भारतको राँचीस्थित अरूणोदय क्रिकेट एकेडेमीमा प्रशिक्षण गरिरहेका थिए । क्रिकेटमा लगाव भएका गुल्सनका बुबाले उनलाई त्यहाँ भर्ना गरिदिएका थिए । 

त्यहाँ उनको सम्भावना बलिङमा देखियो । गुल्सनले आफूलाई बलिङमै निखारे । भारतमै पनि एकेडेमी स्थानीय प्रतियोगिताहरु खेलेका थिए । गुल्सनले प्रशिक्षण गरेकै एकेडेमीमा हुर्किएकाहरू भारतको रणजी ट्रफी खेलिरहेका छन् । गुल्सनको यात्रा भने नेपाली राष्ट्रिय टोलीतर्फ मोडियो । त्यसका लागि खुड्किलो बन्यो– काठमाडौं मेयर कप ।