पोखराको पर्यटनको कुरा गर्दा विश्व पर्यटनको कुरा पनि आउँछ । कोभिडका कारणले हिजोको जस्तो छैन, पर्यटन क्षेत्र अस्तव्यस्त नै रहेको छ ।  तर पनि दसैंदेखिको अवधिलाई हेर्दा आन्तरिक पर्यटकले गर्दा आशा पलाएको छ । आन्तरिक पर्यटन प्रबर्द्धनको कुरा गर्दा सबैभन्दा पहिले त घुम्न मान्छेको इच्छा हुनुपर्छ । 
पोखरा प्रकृतिमा आधारित पर्यटकीय क्षेत्र हो । पोखरा भन्नेबित्तिकै मान्छेहरुको प्रकृतिका कुराहरु आउँछन् । 

यी प्राकृतिक क्षेत्रहरुलाई नबिगारी अगाडि बढाउनुपर्छ । विकासका लागि भौतिक पूर्वाधारहरु पनि बन्दै जान्छन् तर पनि हिमालजस्ता विषय हाम्रो पर्यटनको स्रोत हो । यसैबाट हामीले पर्यटकलाई लोभ्याउने हो ।  पर्यटन क्षेत्रलाई पुनरउत्थान गर्न व्यवसायीलाई करमा सहुलियत दिनुपर्छ । कर भनेको आय हुँदा दिने हो । अर्को प्रमोसन गर्न आवश्यक छ । धेरै मान्छेले भ्रमण वर्ष सन् २०२० भनेर धेरै लगानी गरे । त्यसले उत्साही बनाएको थियो । उनीहरुले ऋण लिएर पर्यटन क्षेत्रमा लगानी गरेका छन् । सरकारलाई सहयोग गर्नका लागि व्यवसायीहरुले लगानी गरेका थिए । उनीहरुको ऋणलाई कसरी व्यवस्थापन गर्न पछि नाफा भएमा तिर्नेगरी दुई–चार वर्षका लागि ब्याज छुट दिने व्यवस्था गर्नुपर्छ । 

आन्तरिक पर्यटन प्रबर्द्धन गर्न सरकारी कर्मचारीहरुलाई प्रोत्साहन गर्नुपर्छ ।  सरकारी कर्मचारीलाई पैसा दिएरै भए पनि सरकारले प्रोत्साहन गर्नुपर्छ । 

कतिपय व्यवसायीहरु व्यवसाय नै छोड्नुपर्ने स्थितिमा पुगेका छन् । उनीहरुलाई सरकारले हेर्नुपर्छ, सहयोग गर्नुपर्छ । उनीहरुको मुख्य समस्या के हो ? के ग¥यो भने उनीहरु यहि व्यवसायमा बस्न सक्छन् भन्ने विषयमा वार्ता, छलफल गर्नुपर्छ ।  आन्तरिक पर्यटन प्रबर्द्धन गर्न सडक महोत्सव जस्ता गतिविधि पनि आवश्यक छ । 
मान्छेहरु यात्रा गर्न, मनोरञ्जन गर्न खोजिरहेका छन् । एनसेल बाह्रखरी गल्फ पनि पर्यटन गतिविधि नै भयो । यो कार्यक्रमको बेलामा तपाइले विभिन्न कार्यक्रम गर्नुहुन्छ, त्यसले पनि पोखरा सुरक्षित रहेछ भन्ने सकारात्मक सन्देश जाँदा आन्तरिक वा बाह्य पर्यटकहरु आउने सम्भावना हुन्छ । 

मान्छेले सूचना नपाउँदा नै यात्रा गर्न नसकिरहेको हुन सक्छ ।  यस्ता गतिविधिले राम्रो सन्देश दिन्छ, यो प्रमोसनको ठूलो ‘टूल’ हो । यो कार्यक्रम विदेशमा बसेका नेपालीले पनि हेर्ने गरेका हुन्छन् । जब यहाँ पर्यटकीय गतिविधि हुन्छन्, तब मिडियाबाट धेरै छिटो सूचना प्रवाह हुन्छ । त्यसले गर्दा विदेशीलाई पनि यहाँको सुरक्षाको बारेमा जानकारी हुन्छ र नेपाल आउनको लागि पनि प्रोत्साहन गर्छ । 

कुनै पनि व्यवसाय गर्दा शतप्रतिशत सफल हुन्छ भन्ने आशा राख्नु हुँदैन । त्यसैले व्यवसाय सुरु गर्दा संकट व्यवस्थापनका लागि कोष बनाउनुपर्छ ।  त्यसमाथि पनि पर्यटन व्यवसाय भनेको ‘डेलिकेट’ हो । ‘डेलिकेट’ चिजहरु त्यति नै मूल्यवान हुन्छ । जब पर्यटन राम्रो हुन्छ, हाम्रो आम्दानी पनि निकै राम्रो हुन्छ ।  त्यसैले निश्चित रकम संकट व्यवस्थापनका लागि राख्नुपर्छ । 

यसरी काम गर्दा व्यवसाय दीर्घकालीन पनि हुन्छ । कुनै पनि संकट लामो समयसम्म हुँदैन ।  अहिलेको संकट पनि अस्थायी हो । हामी उच्च मनोबल राखेर धानिन सक्नुपर्छ ।  यस्तो संकट सधैँ रहँदैन । केही समयपछि अवस्था राम्रै हुन्छ । त्यसैले हामी आत्तिनु हुँदैन ।  तर, यही बेला कतिपय व्यवसाय भर्खर सुरु भएका पनि थिए । त्यस्ता लगानीकर्ताले लगानी गरिसके । 

लगानी गरेपछि केही पनि आम्दानी नहुँदा आत्तिनु स्वाभाविक पनि हो ।  त्यस्ता व्यवसायीले ऋण लिएर लगानी गरेका छन् भने उनीहरुको समस्या बैंकले पनि बुझिदिनुपर्छ, व्यवसायीलाई निरुत्साहित बनाउनुहुँदैन ।  कोभिड १९ को असरबाट पर्यटनलाई उकास्ने प्रयासस्वरुप बाह्रखरी मिडियाले एनसेल–बाह्रखरी पहलअन्तर्गत पोखराका उद्योगी व्यवसायीसँग जारी राखेको कुराकानीमा कार्कीको यस्तो धारणा आएको हो ।

सुस्ताएको पर्यटन क्षेत्रलाई पुनर्जिवित गर्न एनसेललगायतका कर्पोरेट क्षेत्रको सहयोगमा बाह्रखरीले शनिबार पोखरामा आमन्त्रण गल्फ आयोजना गर्न लागेको छ । एनसेल प्रमुख प्रायोजक रहेको बाह्रखरी गल्फको यो प्रतियोगितामा नेपाल टुरिजम बोर्ड, गण्डकी प्रदेश सरकार तथा पोखरा महानगरपालिकाको पनि सहकार्य रहेको छ । 
अन्य प्रायोजकमा डिसहोम, भाटभटेनी सुपरमार्केटस्, नेपाल इन्भेष्टमेन्ट बैंक लिमिटेड, काल्र्सबर्ग, सिभास रिगल, हुन्ड्याई मोटर्स र आईएमई रहेका छन् ।