काठमाडौं । कोभिड–१९ ले फणा नफिजाएको भए यतिबेला चलचित्र ‘लक्का जवान’ प्रदर्शन भइसकेको हुने थियो । नाफा घाटाको हिसाब–किताब हलबाट आइसकेको हुने थियो । शिवहरि पौडेलले आफ्नो बाटो समातिसकेका हुने थिए । 

चलचित्रको अधिकांश काम सकिसकेको थियो । प्रि—मिक्सिङ चलिरहेको थियो । अरूका एक्सन—कटको इशारामा वर्षौं बिताए पनि फिचर फिल्ममा पहिलोपटक आफूले एक्सन कट गरेका थिए । एकमनमा एक तमासको डर थियो । मनको अर्को कुनामा उत्साह थियो । प्रतिफल कस्तो आउने हो ? मनमा कौतुहल थियो । दर्शकले हलमा मुख खुम्च्याउने हुन् कि वाह ! गरेर तारिफ गर्ने हुन्, व्यग्र प्रतीक्षा थियो । 

तर ठीक त्यहीबेला नेपालमा पनि कोरोनाको संक्रमणको जोखिम बढ्यो । सरकारले लकडाउन गर्यो । अरूको जस्तै शिवहरिको फिल्म ‘लक्का जवान’ पनि अलपत्र पर्यो । 

चलचित्र मात्रै होइन उनको टेलिफिल्म पनि अलपत्र पार्यो लकडाउनले । चैत १६ गतेबाट टेलिफिल्म ‘ब्रेक फेल’ सुरु गर्ने तयारी गरिरहेका थिए । करिब एक वर्षपछि उनी पुनः ‘ब्रेक फेल’ सुरु गर्दैै थिए । तर लकडाउन उनका लागि अवरोध बनेर आयो ।  

सधैंभरिको दौडधूपले आँटेको काम गर्न पाइरहेका थिएनन् । लकडाउने समय जुराइदियो । उनले फिचर फिल्म लेख्न थाले । “सुरुका दुई साता निकै जाँगर चल्यो । दुईटा नयाँ फिचर फिल्मको स्क्रिप्टको दिमागमा आइडिया थियो त्यही लेख्न थालेँ,” शिवहरि सुनाउँछन्, “तर जब लकडाउन थपिँदै गयो । फुर्सद हुँदैन त्यसैले यो फुर्सदमा लेख्नुपर्छ भनेर सुरु गरेको स्क्रिप्ट लेख्न मन लागेन । बिस्तारै अल्छी लाग्दै गयो ।”
० ० ०
यहीबीचमा उनले जाँगर चलाए गीत गाउने । ‘चियासँग चुरोट...’ बोलको गीत गाए । उनलाई साथ दिइन् समीक्षा अधिकारीले । सोमबार उनले यो गीत सार्वजनिक गरे । मुखमा हान्नुजस्तो उनको युट्युब च्यानल छ । यसमै केही कन्टेन्ट राख्ने क्रममा उनले गीत राखे । अब उनी सर्ट फिल्म पनि बनाएर यही च्यानलमै राख्ने शिवहरिको तयारी छ । 

सिनेमा हल बन्द छन् । उनको चलचित्र अलपत्र छ । कहिले प्रदर्शन गर्ने निश्चित छैन । पर्ख र हेरको रणनीतिमा छन् शिवहरि । सिनेमा हल खुल्दै गए । अवस्था सहज बन्दै गयो र पुराना नेपाली तथा हिन्दी चलचित्र रिलिज भएर दर्शक हलमा जान थाले भने शिवहरि पनि आफ्नो चलचित्र चलाउने सोचमा छन् । 

“अरू चलचित्र त सबै फागुन चैतमा पुगे । तर मचाहिँ अवस्था सहज बन्दै गए कात्तिकमै लगाउने सोचमा छु,” उनी भन्छन्, “तर अहिलेकै अवस्थामा भने दुई करोडमा बनेको चलचित्रमा आँखा चिम्लिन सकिँदैन ।”
दुई करोड लगानी उठाउन ६ देखि ७ करोड ग्रस कलेक्सन गर्नुपर्छ । नेपाली बक्स अफिसमा यति कलेक्सन कमै चलचित्रले मात्रै गर्ने गरेका छन् । 

उनले चलचित्र बनाउँदै गर्दा एउटा अवस्था थियो । अहिले अवस्था अर्कै भइसक्यो । चलचित्र संघ र चलचित्र विकास बोर्ड कसरी सिनेमा हल खोल्ने भन्ने छलफलमा छन् । एकतिहाइ टिकट बेच्ने कि दुईतिहाइ छलफल चलिरहेको छ । 

कोरोनाको महामारीले बजार, लगानी, वितरण र प्रदर्शनको तौरतरिकामा ठूलो फेरबदल ल्याउने शिवहरि बताउँछन् । “अब चलचित्रको निर्माण र प्रदर्शन नै फरक तरिकाले होला जस्तो छ । सानो समूहले सानो लगानीमा चलचित्र बन्छन् जस्तो छ,” उनी भन्छन्, “फरकखालका विषयमा सानो लगानीमा बन्ने चलचित्र हल र डिजिटल प्लेटफर्मममा घरघरमा रिलिज होलाजस्तो छ ।”

बजार फेरिन्छ होला, लगानीको परिमाण सानो अथवा झन् ठूलो होला । रिलिज हुने प्लेटफर्म फरक होला । विषय र प्रस्तुतिको तौरतरिकामा पनि बदलाव आउला । तर शिवहरिलाई यतिबेला एउटै चिन्ता छ मेरो ‘लक्का जवान’ कहिले बजारमा आउला र यसको प्रतिक्रिया कस्तो आउला ?