काठमाडौं । रीना महर्जन सुतीको कपडा काट्दै छन्। कोही महिलाहरु लुगा सिलाउने मेसिनबाट मास्क सिलाउँदै छन् भने कोही सिलाइ सकेको मास्कमा आइरन लगाउँदै प्याकिङ गर्नमा व्यस्त छन् । यो दृश्य हो, ललितपुर महानगरपालिका समाज कल्याण महाशाखाको ।

ललितपुर महानगरका  ६० जना भन्दा धेरै महिलाहरु मास्क बनाउने तालिममा लिइसकेका छन् । उनीहरुले आआफ्नो वडामा गएर कपडाबाट बनाउन सिकाउने छन् । विश्वभर महामारीको रुपमा फैलिएको नोबल कोरोनाभाइरस अर्थात कोभिड–१९ को त्राससँगै बजारमा उपभोक्ताहरुलाई मास्क पाउन मुस्किल भएपछि महानगरले तालिम दिन थालेको हो ।

केही समयअघि १० रुपैयाँमा किन्दै आएको ‘सर्जीकल मास्क’ मास्क अहिले ५० रुपैयाँमा किन्नुपर्ने र कतिपय अवस्थामा त्यो पनि पाउन छाडेको उपभोक्ताहरुको गुनासो छ । नेपालमा करिब ७५ प्रतिशत मास्क चीनबाट आयात हुने गरेको छ ।  तर चीनमा कोरोनाभाइरसको संक्रमणले गर्दा नेपालमा मास्क आयात हुन सकेको छैन ।

“कोरोनाबाट बच्न पूर्वसावधानीस्वरुप प्रयोग गरिने मास्क र स्यानिटाइजरको अभाव नहोस् भनेर ललितपुर महानगरपालिकाको नेतृत्वमा मास्क र स्यानिटाइजर उत्पादन तालिम दिइएको हो,” महानगरका प्रवक्ता राजु महर्जनले बताए ।  

ललितपुर महानगरले प्रत्येक वर्ष महिलाहरुलाई सिलाइ-बुनाइको तालिम दिँदै आएको छ ।

नारी दिवसको दिन देखी सुरु भएको उक्त तालिम आइतबार सकिएको छ । प्रत्येक वडाबाट दुइ-दुइ जनाले लिएका र उनीहरु महानगररको २९ वटै वडामा गएर मास्क बनाउन सिकाउने छन् । एकजना महिलाले एक घण्टामा १० वटाभन्दा बढी मास्क बनाउन सक्ने र अझ सिलाइ मेसिन इलेक्ट्रिक हुने हो भने एक घण्टामा १० वटाभन्दा बढी बनाउन सक्ने मुख्य प्रशिक्षक कल्पना शाक्यले बताइन् ।