काठमाडौं । नेपाली कांग्रेसका वरिष्ठ नेता रामचन्द्र पौडेलले आफू निकट जिल्ला सभापतिहरुको भेलाबाट उत्साही भएको बताएका छन् । बुधबार सम्पन्न भेलालाई सम्बोधन गर्दै वरिष्ठ नेता पौडेलले असन्तुष्ट जिल्ला सभापतिहरुले लिएको अडानबाट आफू उत्साहित भएको बताएका हुन् ।
उनले भने, "हाम्रो मागमा जिल्ला सभापतिहरुले समर्थन जनाउनु भयो । त्यसले हामी थप उत्साहित भएका छौं ।"
पौडेल समूहले पुस ११ गते पार्टीको केन्द्रीय कार्यसमिति बैठकले गरेका निर्णयहरु खारेज गर्न माग गरेको थियो । उक्त एजेण्डालाई ४३ जिल्लाका सभापतिहरुले समर्थन गर्दै पौडेलले बोलाएको भेलामा सहभागी सोमबार काठमाडौं आएका थिए ।
भेलालाई सम्बोधन गर्दै महामन्त्री शशांक कोइरालाले सभापति देउवा पुस ११ गते गरेका निर्णय सच्याउन तयार रहेको प्रतिक्रिया दिएका हुन् । सभापतिले निर्णय नसच्याए के गर्ने भन्ने सञ्चारकर्मीको प्रश्नमा उनले भने, "निर्णय नसच्याए हामी फेरि सोच्छौं र अर्को कदम चाल्छौं ।"
उनले अर्को कदम के हुने भन्ने विषयमा भने स्पष्ट पारेनन् ।
सभापति देउवाले पौडेलले बोलाएको भेलामा सहभागी जिल्ला सभापतिहरुलाई बिहीबार बिहान १० बजे बूढानिलकण्ठमा बोलाएर लन्च पार्टी दिने भएका छन् ।
यो पनि,
देउवाविरुद्ध ४३ जिल्ला सभापति काठमाडौंमा, भन्छन्- ‘केन्द्रीय समितिको निर्णय मान्दैनौं’
निर्णय सच्याउन देउवा तयार ! महत भन्छन् : नेविसंघमा ४९ र विभागमा ४० प्रतिशत पौडेललाई दिन तयार छौं
