काठमाडौं । हङकङमा सन् २०१९मा हुने भनिएको ‘एभेरेष्ट इन्टरनेशनल फिल्म अवार्ड’ केही समयलाई सरेको छ । एभरेष्ट इन्टरटेन्मेन्ट प्राइभेट लिमिटेडको आयोजनामा हुन लागेको अवार्ड हङकङमा पछिल्लो समय भइरहेको आन्दोलनका कारण सर्ने भएको हो । 

अवार्ड आयोजक संस्था एभरेष्ट इन्टरटेन्मेन्टका प्रमुख लोकराज लिम्बुले हङकङमा चलिरहेको आन्दोलनका कारण अवार्डको लागि हल र मिति तय गरेपनि स्थगित गर्नुपरेको बताए । उनले भने, “हामीले बारम्बार अवार्डका लागि मिति तय गरेका थियौं । तर हङकङमा भैरहेको आन्दोलन रोकिने छनक देखिएको छैन । यहीकारणले पनि हामीले अर्को वर्ष अवार्ड गर्ने निधो गरेका हौं ।”

सन् २०१९ मा आयोजना हुने भनिएको ‘एभरेष्ट इन्टरनेशनल नेपाली फिल्म अवार्ड’ सन् २०२० का लागि सरेको छ । अब यो अवार्ड सन् २०२० मे २४ तारिखमा आयोजना हुने भएको छ । 

तीन हजार पाच सय दर्शक क्षमता भएको हङकङको वानचाई स्थित ‘क्विन एलिजावेथ स्टेडियम हल’मा यो अवार्ड आयोजना हुनेछ ।