काठमाडौं । लेखक तथा उपन्यासकार नयनराज पाण्डेको उपन्यास ‘सल्लीपिर’मा आधारित चलचित्र ‘सपना साङ्ग्रीलाको’ बन्ने भएको छ । चलचित्रलाई अशोक थापाले निर्देशन गर्दैछन् ।

अन्तरराष्ट्रिय फिल्म फेस्टिवलमार्फत् वर्ल्ड प्रिमियरमा समावेश हुने गरी चलचित्र बनाउन लागिएको उनले बताए । “चलचित्र उपन्यासमा आधारित भएपनि ४० प्रतिशत उपन्यासबाट लिइन्छ भने बाँकी ६० प्रतिशत आफ्नै कथा हुने छ,” उनले भने ।

घरपरिवार र सामाजिक वातावरणले सानो बालकको मनोविज्ञानमा पर्ने असर र त्यसले निम्त्याउने परिणामको बारेमा चलचित्र बन्ने बताइएको छ । चलचित्र आगामी मंसिरको मध्यतिर छायांकनमा जाने थापाले बताए । चलचित्रको लगानी करिब ३ करोड हुने निर्देशक थापाले बताएका छन् ।

एम मिडिया प्रालिको ब्यानरमा बन्न लागेको चलचित्रका लागि अहिले कलाकारको अडिसनको आवेदन खुला गरिएको छ ।