कञ्चनपुर । कञ्चनपुरको भीमदत्तनगर–२ की १३ वर्षीया निर्मला पन्तको बलात्कारपछि हत्या अनुसन्धानमा ५० जनाको डीएनए परीक्षण भइसकेको छ । प्रहरी स्रोतका अनुसार अझै केहीको नमुना संकलन गर्ने तयारी छ । 

जिल्ला प्रहरी कार्यालय कञ्चनपुरका डीएसपी कृष्णराज ओझालाई अनुसन्धान अधिकृत बनाएर जारी अनुसन्धान सकारात्मक पाटोमा अघि बढेको प्रहरी बताउँछ । दैनिक २–३ शंकास्पदलाई ल्याएर सोधपुछ गर्ने काम भइरहेको बताइएको छ । बलात्कारपछि हत्या भएको ६ महिना बितिसक्दा पनि हत्यारा सार्वजनिक गर्न नसक्दा प्रहरी आलोचनाको तारो बनेको छ । 

कञ्चनपुर प्रहरीका एसपी कुवेरसिंह कडायत अनुसन्धान सकारात्मक पाटोमा अघि बढेको र ढिलोचाँडो परिणाम आउने बताउँछन् । कडायतले भने, ‘‘पछिल्लो समय स्थानीय पनि प्रहरीलाई सूचना संकलनमा सहयोग गरिरहेका छन् । विगतभन्दा प्रहरीप्रति स्थानीयको विश्वास बढ्दै गएको छ । यसले अनुसन्धान सहज हुँदै गएको छ ।’’ 

उनले थपे, ‘‘विभिन्न कोणबाट अनुसन्धान जारी छ । घटना उखुबारीमै भएको यकिन गरेका छौं । सूचना संकलन तिव्र बनाएका छौं । समय त तोक्न सकिन्न, तर हत्यारालाई उम्किन दिँदैनौ ।’’ अनुसन्धानमा लापरवाही गरेको भन्दै तत्कालीन कञ्चनपुर प्रहरीका एसपी दिल्लीराज विष्टलाई जिम्मेवारीबाट हटाइएपछि एसपी कडायतले कञ्चनपुरको नेतृत्व सम्हालेका हुन् । कडायतको बुझाइमा निर्मला बलात्कार र हत्या योजनाबद्ध नभएर आकस्मिक रुपमा घटेको घटना हो । उनले भने, ‘‘घटनास्थल, साउन १० गतेको अवस्था सबैलाई अध्ययन गर्दा बाटोमा ढुकेर कसैले घटना गरेको हो जस्तो देखिन्न ।’’

अनुसन्धान साँघुरिँदै गएको प्रहरी अधिकारीले बताउँदै आएका छन् । केन्द्रीय अनुसन्धान व्युरो (सिआईबी) र कञ्चनपुर प्रहरीको टोलीले घटनाको अनुसन्धान गरिरहेको छ । अनुसन्धानमा संलग्न एक प्रहरी अधिकारीले भने, ‘‘अनुसन्धान त पेचिलो छ नै । तथ्य केलाउने प्रयास गर्दैछौं तर अनुसन्धान विगतको तुलनमा केही सहज हुँदै गएको छ ।’’ 

सेनामाथिको निगरानी कायमै
प्रहरीले साउन १० गते बाहिर निस्किएका सेनाका व्यक्तिमाथि समेत निगरानी कायमै राखेको छ । एक अधिकारीका अनुसार सेनामाथि अनुसन्धान गर्न जटिलताहरु भने छन् । उनले भने, ‘‘उनीहरुले नै घटना गराएका हुन् भन्ने कुनै आधार त छैनन् । तर केहीमाथि निगरानी बढाएका छौं ।’’

स्रोतका अनुसार कतिपयले सेनामाथि समेत अनुसन्धान गरिनुपर्ने बताएपछि साउन १० गते ब्यारेकबाट बाहिरिएका सेनाको विवरण मागिएको थियो । योबाहेक प्रहरीले घटनापछि शंकास्पद व्यवहार देखाउँदै आएका, गायब भएकाहरु र आन्दोलन चर्किंदै गएपछि नदेखिएका शंकास्पद व्यक्तिहरुमाथि पनि निगरानी बढाएको छ । ‘‘घटनाक्रम केलाउँदै लगेका छौं । अनुसन्धानमा कुनै कसर बाँकी राखेका छैनौं । हजारौंबाट केलाउँदा केलाउँदै १०–१२ जनासम्म पुगेका छौं,’’ अनुसन्धानमा संलग्न एक अधिकारीले भने । 

घटना एकजनाबाटै ?
प्रहरी अधिकारीका अनुसार निर्मलाको बलात्कार र हत्यामा एकजनाको मात्रै संलग्नता हुनसक्ने सम्भावना छ । अनुसन्धानमा संलग्न प्रहरी अधिकारीको बुझाइमा एकजनाबाट मात्रै भएको घटनामा प्रमाणको अभाव रहेको अवस्थामा अभियुक्तको पहिचान गर्न निकै गाह्रो हुन्छ ।

‘‘निर्मलाले सामाजिक सञ्जाल, मोबाइल प्रयोग गर्थिनन् । प्रयोग गर्ने गरेको भए अनुसन्धान निकै सहज हुन्थ्यो । तरपनि हामीले भ्याएसम्मका प्रविधिको प्रयोग गरेका छौं । अचूक प्रमाणको अभावमा म्यानुअल अनुसन्धानमै हाम्रो जोड छ,’’ प्रहरीको भनाइ छ, “एकभन्दा बढी व्यक्तिको संलग्नता भएको भए केही न केही कुरा पक्कै निस्किन्छ । त्यसैले यो घटनामा एकजनाको मात्रै संलग्नता हो कि भन्ने लागेको छ ।’’