काठमाडौं । प्रमुख प्रतिपक्षी दल नेपाली कांग्रेसको महासमिति बैठक सम्पन्न भएको एक साता नपुग्दै पार्टीभित्र तेस्रो धारका रुपमा चित्रित हुँदै आएको कृष्ण सिटौला समूह फेरि गुटगत राजनीतिमा सक्रिय हुन थालेको छ । १३ औं महाधिवेशनबाट तेस्रो धारको नेतृत्व गर्दै आएका नेता सिटौलाले बिहीबार आफू निकटका नेताहरुको उपस्थितिमा पत्रकार सम्मेलन गरेर कांग्रेसमा तेस्रो धार यथावत् रहेको सन्देश दिएका छन् । 

युवा नेता गगन थापा र उमाकान्त चौधरी दायाँ–बायाँ राखेर गरिएको पत्रकार सम्मेलनमा उनले सभापति शेरबहादुर देउवा र वरिष्ठ नेता रामचन्द्र पौडेलबीच महासमिति बैठकमा एकता भए पनि आफूले दुवै जनालाई नेतृत्वका रुपमा स्वीकार गर्न नसक्ने दोहोर्याए । 

‘‘कुर्सीलाई नमान्ने भन्ने कुरा होइन, उहाँहरुलाई सभापति र वरिष्ठ नेता मानेकै छु । नेतृत्वको बारेमा मेरो आफ्नो परिभाषा छ । त्यो परिभाषा भित्र उहाँहरु दुवैजना पर्नुहुन्न,’’ उनले भने, ‘‘दुवै जनालाई नेतृत्वका रुपमा नदेखेपछि यसअघि सभापतिमा उमेदवारी दिएको हुँ । अब १४ औं महाधिवेशनको मिति तय भएपछि यो बारेमा फेरि बोल्छु ।’’

महासमिति बैठकको समापनमा देखिएको एकतातर्फ लक्षित गरेर नेता सिटौलालले अनुहार हेरेर एकता नहुने टिप्पणी गरे । उनले पार्टीमा एकता कायम हुन पार्टी एकता सिद्धान्त, नीति, आचरण, व्यवहारमा परिवर्तन हुन जरुरी रहेको जिकिर गरे । ‘‘अनुहार हेरेर एकता हुन्न नि, सिद्धान्तले एकता हुनुपर्यो, भावनाले एकता हुनुपर्यो । व्यवहारमा सबैका भावना बटुल्न सक्नुपर्यो । आचरणमा एकता हुनुपर्यो । तब न एकता हुन्छ,’’ सिटौलाले भने । 

महासमितिको समापन समारोहमा सभापति देउवा र वरिष्ठ नेता पौडेलबीचको ‘डिप लभ’ कस्तो हो भन्ने सञ्चारकर्मीको जिज्ञासामा उनले त्यसका बारेमा आफूलाई प्रश्न नगर्न आग्रह गरे । ‘‘लभमा लस्ट भयो भने त्यो सकियो । उहाँहरुको लभमा लस्ट जोडिएको छ कि के, उहाँहरुलाई सोध्नु नि एक ताल,’’ उनले थपे, ‘‘लभ पर्छ उहाँहरुका बीचमा, सोध्नु हुन्छ हामीलाई !’’   
उनले महासमिति बैठकले ल्याएको पार्टीको विधान आफैंमा उपलब्धि भएको दाबी गरे । आगामी महाधिवशेनबाट निर्वाचित हुने नयाँ कार्यसमितिपछि कांग्रेसले नयाँ ढंगबाट गति लिने सिटौलाको भनाइ थियो । 

सरकार अधिनायकवादतर्फ उन्मुख भएको दाबी गर्दै उनले ने क पाका अध्यक्ष पुष्पकमल दाहाल ‘प्रचण्ड’ ले लोकतानित्रक सीमा नाघ्न खोजेको आरोप लगाए । प्रचण्डले बुधबार संघीय संसद्को हिउँदे अधिवेशनमा राखेको मन्तव्य स्मरण गर्दै सिटौलाले भने, ‘‘सरकार अधिनायकवादको बाटोमा जाँदैछ भन्ने सन्देश हिजो प्रचण्डले संसद्मा राखेको धारणा हो । प्रचण्डले लोकतान्त्रिक सीमा मिचे । यो उनको ठूलो गल्ती हो ।’’ 

ने क पाका अध्यक्ष प्रचण्डले संघीय संसद्मा डेमोक्रेटिक सरकार भएकाले छिटो विकास गर्न नसकिएको दाबी गर्दै कम्युनिस्ट सरकार भए ‘ड्याम–ड्याम’ निर्णय गरेर विकास गर्न सकिने आशय व्यक्त गरेका थिए । सरकारले लोकतान्त्रिक सीमा नाघ्न खोजे कांग्रेसले त्यसका विरुद्ध संसद र संसदबाहिर जनमत सिर्जना गर्ने कांग्रेस नेता सिटौलाको भनाइ थियो । 

पत्रकार सम्मेलनमा केन्द्रीय सदस्य गगन थापाले गुटबिनाको पार्टीको कल्पना नै गर्न नसकिने बताए । गुटबिनाको पार्टीको कल्पना ‘हावादारी गफ’ मात्रै भएको टिप्पणी उनले गरे । 

सभापति शेरबहादुर देउवाले महासमिति बैठकको समापनमा पार्टीीभत्र गुट–उपगुट नभएको दाबी गरेको सन्दर्भ स्मरण गर्दै उनले भने, “द्वन्द्व नभएको कुनै पार्टी हुन्छ र ? द्वन्द्व भइसकेपछि गुट नभएको, समूह नभएको पार्टी हुन्छ र ? हुँदै हुँदैन । गुट निरपेक्ष पार्टी, गुटबाट मुक्त पार्टी, समूहहरु नभएको पार्टी भन्ने कुरा हवादारी कुरा हो ।’’