काठमाडौं । शनिबारबाट पोखरामा सुरु भएको नेपाली कांग्रेसको भ्रातृ संगठन तरुण दलको चौथो महाधिवेशनमा नेतृत्व चयन सर्वसम्मत गर्ने प्रयास सोमबार तेस्रो दिन पनि जारी छ । आइतबार अबेरसम्म नेतृत्व सर्वसम्मत गर्ने प्रयास भए पनि नेतृत्वमा कुनै सहमति हुन नसकेपछि सोमबार पनि नेतृत्व सर्वसम्मत गर्ने प्रयास भइरेको तरुण दलका एक नेताले बताए । 

तरुण दलको अध्यक्षमा पार्टी सभापति शेरबहादुर देउवा पक्षका जितजंग बस्नेतबारेमा सबै पक्ष सहमत भए पनि उपाध्यक्ष र महामन्त्रीमा अझै सहमति जुट्न नसकेको ती नेताले बताए । तरुण दलको उपाध्यक्ष सिद्वार्थ कोइराला र महामन्त्रीमा भूपेन्द्र जंग शाहीलाई बनाउन पार्टी नेता रामचन्द्र पौडेल पक्षको लबिङ रहँदै आएको छ । पार्टी नेता कृष्ण सिटौला पक्षले भने उत्तम चापागाईंलाई महामन्त्री बनाउनुपर्ने भन्दै आएको छ । 

रामचन्द्र पौडेल निकट एक तरुण दल नेताले सिटौला निकटका उत्तम चापागाईंलाई उपाध्यक्ष बनाउन सहमत हुन सकिने बताए । सिटौला पक्षका नारायण भट्टराईले बाह्रखरीसँग कुरा गर्दै जसरी पनि निर्वाचनमा जानुपर्ने बताए । सिटौला पक्षले आइतबार साँझ पत्रकार सम्मेलन गर्दै उत्तम चापागाईंको नेतृत्वमा निर्वाचनमा जाने जानकारी गराइसकेको छ । देउवा पक्षले यसअघि नै जितजंग बस्नेतको नेतृत्वमा निर्वाचनमा जाने घोषणा गरिसकेको छ । नेता पौडेल पक्षले अहिलेसम्म अध्यक्षको उम्मेदवारको घोषणा गरेको छैन ।