बर्लिन । जर्मनी ब्रुअरीहरूले उत्पादन मूल्य बढ्नु र लरी चालकको कमी हुँदा आगामी गर्मी याममा बियरको बोतल अभाव हुनसक्ने चेतावनी दिएका छन् । 

जर्मन ब्रुअरी महासंघका कार्यकारी अध्यक्ष होल्गर इचेलेले जर्मन अखबार बिल्डलाई भने, “अवस्था निकै तनावपूर्ण छ । ट्रक ड्राइभरहरूको अभावको कारण बियर बोतल आपुर्ति गर्न पनि निकै गाह्रो हुनेछ ।”

एकजना उद्योग विज्ञले काँचको बोतलको अभावले विशेष गरी साना तथा मझौला ब्रुअरीहरू प्रभावित हुने बताएका छन् । ब्रुअरीहरूले गत वर्षको तुलनामा अहिले नयाँ काँचको बोतलका लागि ८० प्रतिशत बढी पैसा तिरिरहेका छन् । साथै, बियरको मूल्य पनि बढिरहेको छ । 

“बियरको बोतल अभाव हुनुको कारणहरूमध्ये एक उर्जाको मूल्यवृद्धि हो । यसले काँचको बोतल उत्पादन खर्च बढाइदिएको छ । गतवर्षको तुलनामा बोटलको मूल्य दोब्बर भएको छ,” काँच उद्योगका एकजना प्रवक्ताले बिल्डलाई भने । 

उर्जाको मूल्य वृद्धि भएकाले बियरको मूल्य चाँडै तीस प्रतिशतले वृद्धि हुनसक्ने अनुमान गरिएको छ । 
बोतल उद्योगहरूले सबैभन्दा पहिले आफ्नो उत्पादन ठूला बियर कम्पनीहरूलाई उपलब्ध गराउने भएकाले साना कम्पनीहरू मारमा पर्ने बताइएको छ । जर्मनीमा ग्लास बियर बोतल निकै चलनचल्तीमा छ । यस्ता बोतल थोरै पैसा ‘डिपोजिट’ राखरे बेचिन्छन् । जसले गर्दा अर्को पटक किन्न आउँदा ग्राहकहरूले बोतल फर्काउने अपेक्षा गरिएको हुन्छ ।

बीबीसीबाट ।