काठमाडौं । साविक विजेता म्यानचेस्टर युनाइटेड र लिभरपुल दुबैले शनिबारको खेल जितेपछि इङ्लिस प्रिमियर लिगको उपाधि होड अझै रोमाञ्चक बन्दै गएको छ । लिगमा अब १२ अंकको खेल बाँकी छ । सिटी र लिभरपुलको दुरी एक अंकको मात्र छ ।
शनिबार राति लिभरपुलले न्युक्यासलाई १–० ले हरायो । च्याम्पियन्स लिग सेमिफाइनल दोस्रो लेगमा भियारियालविरुद्ध खेल्न लागेको लिभरपुलले केही खेलाडीलाई आराम दिएको थियो । तर, महत्त्पूर्ण तीन अंक जोड्न सफल भयो । र शीर्ष स्थानमा उक्लियो । लिभरपुल चार घन्टामात्र शीर्ष स्थानमा रहन सक्यो ।
लगत्तै भएको अर्को खेलमा सिटीले लिड्सलाई ४–० ले हराउँदै पुनः शीर्ष स्थानमा उक्लियो । सिटीले लिभरपुललाई एक अंकले पछाडि पार्यो । सिटीले ३४ खेलबाट ८३ अंक जोडेको छ भने लिभरपुलले समान खेलबाट ८२ अंक जोडेको छ ।
‘‘हामीले आज गोल अन्तर पनि बढाएका छौं,’’ सिटीका प्रशिक्षक पेप ग्वार्डिओलाले भने, ‘‘मलाई थाहा छैन यसको फाइदा हुन्छ की हँुदैन । तर, यसमा पनि हामी अगाडि हुनुपर्छ । अब न्युक्यासल, उल्भरह्याम्पटन, वेष्ट ह्याम र एष्टन भिल्ला बाँकी छन् । हामीलाई थाहा छ की अब के गर्नुपर्छ भनेर । हामीसँग एकमात्र विकल्प छ । त्यो हो जित्ने र च्याम्पियन बन्ने । बराबरी खेल्यौं भने लिभरपुल च्याम्पियन हुनेछ ।’’
सिटीले १३औं मिनेटमै रोड्रीको गोलबाट अग्रता लिएको थियो । ५४औं मिनेटमा नाथन एकेले अग्रता दोब्बर बनाए । ७८औं मिनेटमा गाब्रियल जिससले तेस्रो गोल गरे भने इन्जुरी समयमा फर्नान्डिन्होले चौथो गोल थपे ।
सिटी र लिभरपुल दुबै च्याम्पियन्स लिग सेमीफाइनल दोस्रो लेग खेल्नका लागि स्पेनको भ्रमणमा निस्कदैछन् । सिटीले स्पेनिस ला लिगा विजेता रियाल मड्रिडविरुद्ध खेल्नेछ । लिभरपुलले भियारियालविरुद्ध खेल्नेछ । सिटीले पहिलो लेग ४–३ ले जितेको थियो भने लिभरपुल २–० ले विजयी भएको थियो ।
न्युक्यासलविरुद्ध लिभरपुललाई जिताउन १९औं मिनेटमा नाबी केइटाले गरेको गोल निर्णायक बन्यो ।
अन्य खेलमा एष्टन भिल्लाले नर्विच सिटीलाई २–० ले हरायो । हारसँगै नर्विच रेलिगेशनमा परेको छ । क्रिष्टल प्यालेसलले साउथह्याम्पटनलाई २–१ ले हरायो । बर्नलीले वाटफोर्डलाई २–१ ले हरायो भने ब्राइटनले उल्भरह्याम्पटनलाई ३–० ले पराजित गर्यो ।