इन्साइडर । अमेरिकाको न्याय विभागले कम्तीमा २३ जनाविरुद्ध नियोजित रूपमा कार दुर्घटना गराएको अभियोगमा मुद्दा चलाउने भएको छ । सन् २०१७ देखि २०२० सम्ममा उनीहरूले योजना बनाएरै आफ्नो कार दुर्घटना गराएर विमा कम्पनीबाट झण्डै दस लाख अमेरिकी डलर ठगेका छन् । अभियोग लगाइएकामध्ये चारजना अझै फरार छन् । 

संघीय जाँचबुझ ब्युरो (एफबीआई)ले ती २३ जनाले गराएका १०० भन्दा बढी कार दुर्घटनामध्ये झण्डै १४ वटा पूर्व नियोजित भएको दाबी गरेको छ ।

वासिङटन इस्टर्न जिल्ला अदालतका अनुसार उनीहरूविरुद्ध कुल १३८ वटा अभियोग लगाइने भएको छ । यदि अभियोग प्रमाणित भएको खण्डमा उनीहरूलाई जनही ५५ वर्ष लामो कैद सजाय हुनसक्छ । मेल र वायर जालसाजीका लागि २०, सरकारी कारबाहीमा व्यवधानका लागि २०, स्वास्थ्य स्याहार जालसाजीका लागि १० र एफबीआईसमक्ष झुठो वयान पेस गरे बापत ५ वर्ष कैद हुने बताइएको छ ।

उनीहरूले आफूहरूलेबाहेक अरूले नदेख्ने सडकमा त्यसरी जानीजानी दुर्घटना गराउने गरेका थिए । गत महिना उनीहरूविरुद्ध ८१ पृष्ठ लामो अभियोग दर्ता गरिएको हो । 

अनुसन्धानबाट उनीहरूले गराएका केही दुर्घटनामा कारहरू भित्र ड्राइभर नरहेको, कारको एयरब्याग प्रयोग भएको देखाउन कुनै तौलयुक्त वस्तु प्रयोग गरेको, घनले झ्यालहरू फुटाएको तथा बनावटी शारीरीक चोटपटक देखाउने गरेको पत्ता लागेको छ । अभियोग लगाइएकाहरूमा वासिङटन, क्यालिफोर्निया, मिचिगन, नेभाडा, ब्रिटिस कोलम्विया र क्यानाका २० देखि ५१ वर्ष उमेर समूहका मानिसहरू रहेका छन् ।