काठमाडौं । हतारोमा गरिएको प्रधानमन्त्री कप पुरुष राष्ट्रिय क्रिकेट प्रतियोगिताको उपाधिका लागि आज दुई विभागीय टोली सशस्त्र प्रहरी बल (एपीएफ) र नेपाल पुलिस क्लबले प्रतिस्पर्धा गर्दैछन् ।
नेपाल पुलिस क्लबले यसअघि दुई पटक प्रतियोगिताको उपाधि उचालिसकेको छ । यसपटक पनि पुलिस क्लबले उत्कृष्ट नतिजा निकाल्दै फाइनलसम्मको यात्रा तय गरेको छ । समूहमा अपराजित रहेको नेपाल पुलिसले साविक विजेता त्रिभुवन आर्मीलाई हराएको थियो ।
समूह ‘ए’को शीर्ष स्थानमा रहेर सेमिफाइनलमा स्थान बनाएको नेपाल पुलिसले वाग्मती प्रदेशलाई ५० रनले हराउँदै उपाधि भिडन्त पक्का गरेको हो ।
दुई पटक उपाधि जितिसकेको नेपाल पुलिसका कुशल भुर्तेल र पवन सर्राफले उत्कृष्ट ब्याटिङ गरेका छन् । तथापि, कुशल कोभिड–१९ संक्रमित भएको बुझिएको छ । कुशलले चार इनिङ्समा १८२ रन बनाइसकेका छन् । पवनले १०५ रन बनाएका छन् ।
त्यस्तै ब्याटिङमा नचलेका दीपेन्द्र सिंहले बलिङमा राम्रो गरेका छन् । दीपेन्द्र सिंहले ११ विकेट लिइसकेका छन् । त्यस्तै आरिफ शेखले पनि बलिङमा प्रभाव जमाएका छन् । आरिफले ८ विकेट लिइसकेका छन् ।
एपीएफ लगातार दोस्रो पटक फाइनलमा स्थान बनाउन सफल भएको हो । गत सिजन एपीएफ फाइनलमा त्रिभुवन आर्मीसँग पराजित भएको थियो । एपीएफले एक पटक प्रतियोगिताको उपाधि जितिसकेको छ ।
एपीएफ पनि समूह ‘बी’मा अपराजित रहेको थियो । एपीएफले सेमिफाइनलमा गत वर्षको विजेता त्रिभुवन आर्मी क्लबलाई हराउँदै फाइनलमा स्थान बनाएको हो । सेमिफाइनलमा एपीएफका आसिफ शेख, प्रदीप ऐरी र लोकेश बमले उत्कृष्ट ब्याटिङ प्रदर्शन गरेको थियो । आज पनि त्यही प्रदर्शन दोहर्यायो भने पुलिसलाई कठिन पर्न सक्छ ।
आसिफले पाँच खेलमा २१८ रन बनाइसकेका छन् । प्रदीप ऐरीले २०६ रन जोडिसकेका छन् । कमलसिंह ऐरी र अबिनाष बोहराले राम्रो प्रदर्शन गरेका छन् । अबिनाषले ११ विकेट लिइसकेका छन् भने कमलसिंहले ९ विकेट लिइसकेका छन् ।
ओमानमा आयोजना हुने आईसीसी ट्वान्टी–२० विश्वकपको ग्लोबल छनोटलाई बाहना बनाउँदै नेपाल क्रिकेट संघ (क्यान)ले यसपटकप्रतियोगितालाई ट्वान्टी–२० स्वरुपमा खेलाएको हो । प्रतियोगिताको विजेताले पाँच लाख र उपविजेताले तीन लाख रुपैयाँ जित्नेछन् ।
राष्ट्रि खेलकुद परिषद् (राखेप)को सहयोगमा हुने प्रतियोगिता यसअघि एकदिवसीय स्वरुपमा खेलाइँदै आएको थियो । प्रतियोगितामा १० टोलीको सहभागिता थियो ।
