काठमाडौं । यही मंसिर ६ गते सम्पन्न नेपाली कांग्रेसको प्रतिनिधिसभा क्षेत्रीय अधिवेशनपश्चात् देशैभर पार्टीको कुन समूह बलियो भन्ने चर्चा छ ।

दुईवटा निर्वाचन क्षेत्र रहेको ‘कम्युनिस्ट किल्ला’ सुदूरपूर्वको इलाममा पनि कांग्रेसमा कुन समूह बलियो भन्ने बहस छ । मंसिर ७ मा प्राप्त नतिजाले अझ यो बहसलाई मलजल गरेको छ । किनभने, जिल्लामा सभापति लड्नका लागि नेताहरू महाधिवेशन प्रतिनिधि पनि बनिसकेका छन् ।

वडा तहदेखि क्षेत्रीय अधिवेशन सम्पन्न भइसक्दा जिल्लामा रामचन्द्र पौडेल समूह बलियो देखिएको छ । १४औँ अधिवेशनबाट पनि शेरबहादुर देउवा समूहको प्रभावमा भने उल्लेख्य उपलब्धि देखिएन ।

जिल्लामा दुवै समूहका दुई दुईवटा गुट छन् । देउवा समूहबाट केशव थापा र डम्बर खड्काले आ–आफ्नो गुट सञ्चालन गरिरहेका छन् ।

यस्तै, संस्थापनइतर भनिएको पौडेल समूहबाट वर्तमान सभापति हिमालय कर्माचार्य र भेषराज आचार्यले आ–आफ्नो गुट सञ्चालन गरिरहेका छन् । कर्माचार्य केन्द्रमा प्रकाशमान सिंहनिकट मानिन्छन् । यी चारैजना १४औँ महाधिवेशनका लागि सभापतिका आकांक्षी हुन् ।

महाधिवेशन प्रतिनिधिमा कसको कति मत ?
चारैजना अघिल्लो महाधिवेशनमा पनि सभापतिमा भिडेका थिए । तर, दोस्रो चरणमा आचार्यलाई पराजित गर्दै कर्माचार्यले जित हासिल गरेका हुन् ।

जिल्लामा अहिले परिस्थिति बदलिएको छ । साढे पाँच वर्षको अवधिमा आचार्यले स्थिति सुधार गरेका छन् । क्षेत्रीय अधिवेशनबाट खुलातर्फ आचार्य महाधिवेशन प्रतिनिधि चुनिँदा एक नम्बरमा मत ल्याउँदै चुनिए । तर, वर्तमान सभापति कर्माचार्यले भने १० नम्बरमा महाधिवेशन प्रतिनिधि जितेका हुन् ।

कर्मचार्य, आचार्य र केशव थापा एउटै क्षेत्रबाट प्रतिनिधित्व गर्छन् । उनीहरूको क्रियाशील जिल्लाको निर्वाचन क्षेत्र नम्बर–२ बाट छ ।

आचार्यले ६६५ मत ल्याउँदै खुलातर्फ पहिलो स्थान हासिल गर्दा वर्तमान सभापति कर्माचार्यले ५०३ मत ल्याउँदै १०औँ स्थानमा रहे । संस्थापन पक्षका केशव थापाले भने ५७१ मत ल्याउँदै पाँचौँ स्थानमा रहे ।

संस्थापननिकट डम्बर खड्काले भने क्षेत्र नम्बर–१ बाट सर्वाधिक मत ल्याउँदै महाधिवेशन प्रतिनिधि जितेका छन् । पहिलो नम्बरमा मत ल्याएका खड्काले ४४९ मत ल्याएका छन् ।

जिल्लाका नेताहरू खड्काले अघिल्लो महाधिवेशनको तुलनामा राम्रो मत ल्याएको विश्लेषण गर्छन् । “उहाँले धेरै मिहिनेत गर्नुभएको छ र यो मत आएको हो,” निकट एक नेताले भने ।

भेषराजको पक्षमा नतिजा, बलियो बन्दै खड्का  
असोजमा ९ सम्पन्न पालिका अधिवेशनले उमेदवारहरूको ‘पोजिसन’बारे बहस तताएको थियो । चार नगरपालिका र छ गाउँपालिकासहित १० स्थानीय तह रहेको जिल्लामा आ–आफ्नो समूह बलियो भएको दाबा सबै नेताहरूले गरे ।

पालिका अधिवेशनबाट दुई स्थानीय तहमा मात्र वर्तमान सभापति कर्माचार्यनिकट पालिका सभापति बने । इलाम नगरपालिकामा तीर्थ गुरुङ र सूर्योदय नगरपालिकामा जीवन नेपाल विजयी भए ।

यता, भेषराज समूहबाट माङ्सेवुङ गाउँपालिकामा चन्द्र साम्वा सभापति बने । देउमाई नगरपालिकामा आचार्यनिकट दिलीप कार्कीले सभापति जिते । चुलाचुली गाउँपालिकामा राजेन्द्र केरुङ, माइजोगमाई गाउँपालिकामा नरेन्द्र देवान तथा रोङ गाउँपालिकामा हरि बुढाथोकी सभापति बन्न सफल भए ।

केशव थापा समूहबाट फाकफोकथुम गाउँपालिकामा डिकबहादुर थापाले सभापति जिते । डम्बर खड्काको समूहबाट माई नगरपालिकामा हेमबहादुर लिम्बू र सन्दकपुर गाउँपालिकामा तुलाराम गुरुङ सभापति बने ।

मंसिर ३ मा सम्पन्न प्रदेशसभा क्षेत्रीय अधिवेशनको नतिजा पनि भेषराज आचार्यको पक्षमा देखियो । चार प्रदेशसभा क्षेत्रीय अधिवेशनमध्ये तीन सभापति भेषराज पक्षका बने । एकजना भने डम्बर खड्कानिकटले जितेका छन् ।

निर्वाचन क्षेत्र नम्बर–१ को प्रदेश निर्वाचन क्षेत्र ‘क’मा डम्बर खड्कानिकट मैया लिम्बूले जित हासिल गरिन् । यस्तै, ‘ख’मा भने आचार्यनिकट निस्कल राईले जित हासिल गरे ।

यस्तै, निर्वाचन क्षेत्र नम्बर–२ प्रदेश निर्वाचन क्षेत्र ‘क’मा गोपाल चौहान र ‘ख’मा खगेन्द्र लिम्बू निर्वाचित भए । उनीहरू दुवै आचार्यनिकट मानिन्छन् ।

मंसिर ६ गते सम्पन्न क्षेत्रीय सभा निर्वाचनमा आचार्य समूह नै बलियो देखिएको छ । क्षेत्र नम्बर–१ मा आचार्य समूहबाट रोङ गाउँपालिकाका अध्यक्ष समेत रहेका शमशेर राई र क्षेत्र नम्बर–२ मा माङ्सेवुङ गाउँपालिकाका अध्यक्ष डिकेन्द्र इदिङ्गो विजयी भए ।

महाधिवेशन प्रतिनिधिमा पनि १ नम्बर क्षेत्रमा पौडेल समूहका २७ जनामध्ये भेषराज पक्षका १७ जना आएको बताइन्छ । यस्तै, बाँकी संस्थापन पक्षका प्रतिनिधि आएका छन् । क्षेत्र नम्बर–२ मा २० जनाभन्दा बढी पौडेल समूहले महाधिवेशन प्रतिनिधि जितेको दाबी समूहको छ ।