विराटनगर । नेपाली कांग्रेसका प्रदेशसभा सदस्यले प्रदेश नम्बर–१ सरकारले बन्द भएको कोभिड अस्पताल चलिरहेको भन्ने झुटो अभिव्यक्ति दिएर जनता र सांसदलाई गुमराहमा राख्ने काम गरेको भन्दै आपत्ति जनाएका छन् ।
कांग्रेसका प्रमुख सचेतक केदार कार्कीले बिहीबारको प्रदेशसभा बैठकमा विशेष समय लिएर बोल्दै सरकारले १० दिनमा तयार गरेको भनिएको कोसी कोभिड अस्पताल बन्द रहेको बताए ।
उनले भने, “तर, सरकारका मन्त्रीहरु अहिले पनि कोसी अस्पताल सञ्चालनमा रहेको छ भन्दै झुट प्रचार गरिरहनुभएको छ । बन्द भएको अस्पताललाई खुला छ भनेर झुट बोल्ने ? के त्यो अस्पताल खुला छ ?”
उनले हाल कोसी कोभिड अस्पताल परिसरमा विराटनगर महानगरपालिका, उद्योगी, व्यवसायी र नागरिकको सहयोगमा निर्माण भएको नागरिक केयर सेन्टर मात्र सञ्चालनमा रहेको सदनसमक्ष जानकारी गराए । सदनमा झुटो बोल्न नदिइयोस् भन्दै उनले सभामुखको ध्यानाकर्षण पनि गराए ।
कार्कीले कोसी कोभिड अस्पताल सञ्चालन नभएको बरु लामो समयदेखि बन्द रहेको बताए । मुख्यमन्त्री शेरधन राईको सम्पर्क कार्यालयको नाममा करोडौँ रकम खर्च भइरहेको बताउँदै उनले भने, “प्रदेश सरकारको पैसा काठमाडौंमा कार्यालय खोलेर खर्च गर्न पाइँदैन । संघीय सरकारले अपार्टमेन्ट दिएको भनिएको छ किन चाहियो सम्पर्क कार्यालय ?”
कार्कीले कोसी टप्पु वन्यजन्तु आरक्षको सप्तकोसी उकासको जमिन लिजमा दिने निर्णय गर्नु जनताको पक्षमा नरहेको जिकिर गरे । निलहरि काफ्लेको नाममा दिइएको लिज मान्य नहुने उनले बताए ।
