काठमाडौं । सामाजिक परोपकारी काममा बितेको २१ वर्षदेखि क्रियाशील संस्था हेल्प नेपाल नेटवर्कले वर्तमान विषम परिस्थितिमा पनि विभिन्न क्षेत्रमा सहयोग गर्दै आएको छ ।

कोभिड–१९ को महामारीबाट सिंगो मुलुक मात्र नभएर विश्व नै आक्रान्त छ । यो असहज परिस्थितिमा हेल्प नेपालले पनि स्वास्थ्यका लागि अति आवश्यक सरसामानको उपलब्धतामा विशेष जोड दिएको छ ।

गत वर्ष ‘लकडाउन’को समयमा अस्पतालहरुका लागि जरुरी पीपीईलगायत सामग्री सहयोग गरेको नेटवर्कले पछिल्ला दिनमा राष्ट्रिय अविष्कार केन्द्रसँग हातेमालो गर्दै सेवा कार्यलाई अगाडि बढाएको छ । नेटवर्कले सबै ग्लोबल च्याप्टरहरुसँग सहयोग जुटाउँदै अक्सिजन, पीपीईलगायत सामग्रीहरुको उत्पादनमा सहयोग गर्दै आइरहेको छ ।

प्राकृतिक विपद्को समयमा हेल्प नेपालको सामाजिक कार्यकर्ताको समूह आफैँ राहत र सेवा कार्यमा जुट्दै आएको हो । तर, आजको समयमा परिस्थिति केही फरक रहेको हुँदा कोभिडका बिरामीहरुका लागि आवश्यक अक्सिजन सिलिन्डरको व्यवस्थापन तथा पीपीईको उत्पादनसहितका काममा राष्ट्रिय अविष्कार केन्द्रलाई सहयोग गर्दै सामाजिक कार्य गर्दै आएको छ ।

जुझारु समाजसेवीहरुको संस्था हेल्प नेपाल नेटवर्कले हालैका दिनमा ५० लाख रुपैयाँ सहयोग उठाउने लक्ष्यसहित सहयोग अभियान थालेको छ । यस अभियानमा नेटवर्कका अष्ट्रेलिया, बेलायत, अमेरिकालगायत अन्य च्याप्टरहरु सक्रिय रहेका छन् । नेटवर्कका नेपाल अध्यक्ष अरुणसिंह बस्नेतले यसबीचमा ३० लाख बढीको सहयोग रकम जुटेको र त्यसमध्ये केही रकम आविष्कार केन्द्रलाई हस्तान्तरण पनि गरिसकेको फेसबुक वालमार्फत् जानकारी गराएका छन् ।

अहिलेको विकराल परिस्थितिमा सहर मात्रै नभएर गाउँगाउँमा कोरोनाभाइरसको संक्रमण तीव्र हुँदै गएको अवस्थामा हेल्प नेपालले गाउँगाउँमा पनि सेवा सुचारु गरेको छ । हालै नेटवर्कले नेपाल रेडक्रस सोसाइटी नवलपुर उपशाखा तथा सिन्धुपाल्चोकको इन्द्रावती गाउँपालिकासँग सहकार्य गर्दै रोग प्रतिरोधात्मक सामग्री वितरण गरेको छ कोभिडविरुद्धको सचेतनामूलक कार्य पनि सञ्चालन गर्दै आएको छ । यसका साथै दोलखा, अछाम, तनहुँ र काभ्रेलगायत स्थानमा पनि नेटवर्कले स्वास्थ्य सेवा तथा सचेतनामूलक काम गर्न सुरु गरेको संस्थाका अध्यक्ष बस्नेतले बताएका छन् ।