मुम्बई । बलिउड अभिनेता आमिर खानका छोरा जुनेद खानको डेब्यु रहने चलचित्रको छायांकन सुरु भएको छ । महाराष्ट्र सरकारले लकडाउन प्रतिबन्धलाई सहज बनाउन थालेसँगै मुम्बईमा चलचित्र र टेलिभिजन सुटहरू विस्तारै सुरु हुन थालेको छ । दोस्रो लहरको लकडाउन खुलेसँगै छायांकनमा जाने पहिलो चलचित्र जुनेदको अभिनय रहने चलचित्र ‘महाराजा’ भएको इन्डियन एक्सप्रेसले दाबी गरको छ । 

जुनेदले मंगलबारबाट छायांकन सुरु गरेका छन् । इन्डियन एक्सप्रेसका अनुसार चलचित्रको छायांकन चलचित्रको प्राथमिक कास्ट र २५ जना जुनियर कलाकार र केही कु्र सदस्यहरुको उपस्थितिमा सुरु भएको हो । 

आइतबार १०० बढी कास्ट र क्रु का सदस्यहरूको कोरोना परिक्षण गराइएकोमा नेगेटिभ आएकाहरूलाई मात्रै छायांकनमा उपस्थित गराएको छ । 

महाराजाको कथा सन् १८६२ को कथित कुख्यात महाराजाको लाइबल केसमा आधारित छ । जुनेद खानका साथै यस चलचित्रमा शालिनी पाण्डे, शर्वरी वाघ, जयदीप अहलावात मुख्य भूमिकामा देखिने छन् ।
 
आइतबार महाराष्ट्रका मुख्यमन्त्री उद्धव ठाकरेले चलचित्र र टेलिभिजन सिरिजको छायांकन सुरु गर्न अनुमति दिएको थियो । यद्यपि उनीहरूले कोभिड–१९ विरुद्धको सबै सुरक्षाका प्रोटोकलहरू भने पालना गर्नुपर्ने पनि बताइएको छ ।