बीबीसी । फेसबुक र गुगलले दक्षिणपूर्वी एसिया र उत्तर अमेरिकालाई जोड्न समुद्रमुनि दुई नयाँ इन्टरनेट केबल विस्तार गर्ने भएका छन् । क्षेत्रीय दूरसञ्चार कम्पनीसँग मिलेर अघि बढाउन लागिएको यो परियोजनाले सिंगापुर र इन्डोनेसियामा तीव्र रुपमा इन्टरनेट आपूर्ति बढाउने बताइएको छ ।
यसअघि, जासुसी गरेको आरोपछि अमेरिका र हङकङलाई जोड्ने यस्तै योजनाबाट फेसबुक पछि हटेको थियो । “नयाँ र विविध मार्ग हुँदै जावा सागर पार गर्ने यी दुई नै पहिलो केबल हुनेछन् । इको र बाइफ्रस्ट नाम दिइएको केबल नेटवर्कले ट्रान्स–प्यासिफिकमा कुल सामुद्रिक क्षमता करिब ७० प्रतिशतले वृद्धि गर्नेछ,” फेसबुकको नेटवर्क इन्भेस्टमेन्टका उपाध्यक्ष केभिन सल्वादोरीले बताए ।
उत्तर अमेरिका र इन्डोनेसिया जोड्ने यो नै पहिले केबल हुने पनि फेसबुकले उल्लेख गरेको छ । इको सन् २०२३ सम्ममा र बाइफ्रस्ट त्यसको एक वर्षपछि सक्ने लक्ष्य रहेको छ । इन्डोनेसियाका ७३ प्रतिशतभन्दा धेरै जनसंख्याले इन्टरनेट चलाउने भए पनि अधिकांशले मोबाइल डाटाको प्रयोग गर्ने गरेका छन् ।
यसअघि, फेसबुक र गुगलको पार्टनर कम्पनी अल्फाबेटले अमेरिका, ताइवान, हङकङ र फिलिपिन्स जोड्ने गरी केबल विस्तार गर्ने योजना बनाएको थियो । तर, यसलाई राष्ट्रपति डोनाल्ड ट्रम्प प्रशासनले राष्ट्रिय सुरक्षाको विषयसँग जोडेपछि फेसबुक उक्त योजनाबाट पछि हटेको थियो ।