बीबीसी । क्याम्ब्रिज युनिभर्सिटीले गरेको एक विश्लेषणपछि चर्चित डिजिटल मुद्रा ‘बिटकोइन’ले पूरै अर्जेन्टिनाले उपभोग गर्नेभन्दा धेरै बिजुली खपत गर्ने गरेको पत्ता लागेको छ । ‘क्रिप्टोकरेन्सी’को कारोबारमा भुक्तानी सुनिश्चित गर्न कम्प्युटरमा बढी भार पर्ने हुनाले पनि अत्यधिक बिजुली खपत गर्ने गर्दछ ।

अनुसन्धानकर्ताहरुका अनुसार यसले एक वर्षमा झन्डै १२१ं३६ ‘टेट्रावाट’ प्रतिघण्टा बिजुली खपत गर्दछ र मुद्राको मूल्य नघटेसम्म बिजुली खपत कम हुने सम्भावना छैन । यस्तोमा विद्युतीय कार कम्पनी टेस्लाले बिटकोइनमा भारी लगानी गर्ने निर्णय गर्नुले यसको वातावरणअनुकूल छविलाई अर्थहीन बनाइदिएको बताइएको छ ।

टेस्लाले १.५ अर्ब डलरको बिटकोइन खरिद गरेको घोषणा गरेपछि यस हप्ता मात्र बिटकोइन मुद्राले नयाँ रेकर्ड राख्दै प्रतिकरेन्सी ४८ हजार डलरको भएको हो । यस प्रकारले मूल्य बढ्दै जाँदा बिटकोइनको व्यापार गर्नेहरुले अझ धेरै मेसिन प्रयोग गर्नेछन् । जति धेरै मूल्य बढ्यो, त्यति नै धेरै ऊर्जा पनि खपत हुने खोजकर्ता मिसेल रोस बताउँछन् । उनले भनेका छन्, “यसको मूल्य नघट्ने हो भने भविष्यमा पनि यसमा कुनै परिवर्तन आउने छैन र ऊर्जा खपत अनावश्यक रुपमा बढ्दै मात्र जानेछ ।”

यदि, बिटकोइन कुनै देश भएको भए, विश्वव्यापी रुपमा धेरै ऊर्जा खपत गर्नेको सूचीमा यो शीर्ष ३० मा पर्ने थियो । अनलाइन टुलले यसको बिजुली खपत अर्जेन्टिना, यूएई, नेदरल्यान्ड्सभन्दा माथि सूचीकृत गरेको छ । यसले प्रयोग गर्ने ऊर्जाले बेलायतभरिका कित्लीलाई २७ वर्षसम्म पावर दिन सक्ने पनि यसमा उल्लेख छ । यसको अर्थ बिटकोइनले उत्पन्न गर्ने कार्बन डाइअक्साइड बढ्दै मात्र जानेछ ।

बिटकोइनको कारोबार गर्न विशेष किसिमका कम्प्युटरको प्रयोग हुन्छ । जुन क्रिप्टोकरेन्सी नेटवर्कसँग जोडिएको हुन्छ । यसमार्फत बिटकोइन पठाउने र पाउनेबारे भुक्तानी सुनिश्चित गरिन्छ ।