काठमाडौं । पर्साको विन्दवासिनी गाउँपालिकाको प्रसौनीभाठामा ६ कात्तिकमा नेकपाका दुई गुटबीचको झडपमा मुकेश चौरसियाको ज्यान गएपछि जिल्ला अशान्त भएको छ । हत्यारालाई कारबाहीको माग गर्दै दैनिक प्रदर्शन जारी छ ।

प्रहरीले हत्यामा संलग्‍न आरोपमा हनिफ अन्सारी र देवा सहनीलाई पक्राउ गरेको छ । प्रदेश २ प्रहरी कार्यालयका प्रमुख (डीआईजी) धीरजप्रताप सिंहका अनुसार घटनामा संलग्‍न अन्य चारजनाको खोजी जारी छ । तर नेकपाकै नेताहरुले भने प्रहरीले घटनाको अनुसन्धान निष्पक्ष नगरेको आरोप लगाउँदै आएका छन् ।

कात्तिक ६ गते गाउँपालिका कमिटीका पदाधिकारीको शपथ कार्यक्रम थियो । सोही कार्यक्रममा पूर्वसांसद एवं नेकपाका केन्द्रीय सदस्य राजकुमार गुप्ता पक्षले आफ्नो गुटलाई नबोलाएको भन्दै कार्यक्रम बिथोल्न खोजेको र सोही समूहले आक्रमण गरेको भन्दै प्रहरीमा किटानी जाहेरी दिइए पनि प्रहरीले त्यसलाई दर्ता गरेको छैन ।

डीआईजी सिंह भन्छन्, “हामीले घटनास्थलको भिडियो हेरेका छौं । जसमा ६ जनाले आक्रमण गरेको देखिन्छ । भिडियोमा आफन्तले आरोपित गरेका राजकुमार गुप्ता छैनन् । यस्तोमा घटनास्थलमा नदेखिएका व्यक्तिका नाममा कसरी उजुरी लिनु । अनुसन्धानमा क्रममा उनको नाम पोलियो भने हामी गुप्ताविरुद्ध पनि अगाडि बढिहाल्छौं ।”

डीआईजी सिंहका अनुसार प्रारम्भिक अनुसन्धानका क्रममा घटनाको दिन गुप्ता कार्यक्रमस्थलभन्दा १० किलोमिटर टाढा देखिएका छन् । आफूहरु गहन अनुसन्धानमा रहेको डीआइजी सिंहको दाबी छ ।

प्रहरीले दुई पक्षबीच झडप भएकै दिन आठ जनालाई नियन्त्रणमा लिएको थियो । पछि उनीहरुलाई सोही राति छाडिएको थियो ।

देवा सहनी, हनिफ अन्सारीलाई गुप्ताकै घरबाट पक्राउ गरिएको हो । त्यसैले पनि पीडित पक्षले गुप्ताकै योजनामा हत्या भएको दाबी गरिरहेका छन् । पक्राउ परेका दुईजनाले आक्रमणमा आफूहरु संलग्न रहेको स्वीकारसमेत गरेको र प्रारम्भिक अनुसन्धानमा गुप्ताको संलग्‍नता नपाइएको प्रहरी दाबी छ ।

‘चौरसियाको हत्यारा जोगाउन संघीय सरकार नै सक्रिय छ’

यस्तै विन्दवासिनी गाउँपालिका पार्टी कमिटीका सचिव मुकेश चौरसियाको हत्यारालाई कारबाही गर्न नेकपाका ३७ केन्द्रीय सदस्यले माग गरेका छन् ।

स्थायी कमिटी सदस्य मातृका यादवसहित प्रदेश २ बाट प्रतिनिधित्व गर्ने ३७ केन्द्रीय सदस्यले हस्ताक्षर गर्दै वक्तव्य निकालेका हुन् । वक्तव्यमा ओली पक्षका कुनै पनि केन्द्रीय सदस्यले हस्ताक्षर गरेका छैनन् ।

‘मुकेश चौरसियाको हत्यारालाई माथिबाटै संरक्षण भयो, प्रहरीले जाहेरी लिनै मानेन’