म्याग्दी । म्याग्दीको अन्नपूर्ण गाउँपालिकाले बाढीपहिरोले अस्तब्यस्त भएका सुन्दर झरना र तातोपानी कुण्डमा पूर्वाधार निर्माणका लागि विस्तृत परियोजना प्रतिवेदन (डिपिआर) तयार गर्ने कार्य अगाडि बढाइएको छ ।
पर्यटक अनुकूलका पूर्वाधारको अभावमा ओझेल परेका रुप्से, नारच्याङ र महभीर झरनाका साथै भुरुङ तातोपानी, पाउद्धार तातोपानी, दोवाको सेकार र रातोपानी कुण्डको डिपिआरको काम सुरु गरिएको अन्नपूर्ण गाउँपालिकाका अध्यक्ष डम बहादुर पुनले बताए । “मुख्य झरना र कुण्डमा पूर्वाधारको आवश्यकता छ, डिपिआर तयार भएपछि स्रोतको खोजीमा लाग्छौ”, उनले भने । डीपीआर तयार गर्न लागिएका तीन वटा झरना र तीन वटा तातोपानी कुण्ड बेनी–जोमसोम सडकखण्ड आसपासमा पर्छन् ।
पर्यटकको चाप बढ्दै गइरहेको अवस्थामा आवश्यक पूर्वाधारको अभावमा नारच्याङ र महभीर झरना समेत ओझेलमा परेको थियो भने बाढीपहिरोले अस्तब्यस्त भएको रुप्से झरनाको करिब ९० प्रतिशत संरचनामा क्षति पुगेको अध्यक्ष पुनले बताए । विश्वकै उत्कृष्ट झरना र कुण्ड समेत बाढीपहिरो र नदीको कटानले छियाछिया भएको अवस्थामा पर्यटन क्षेत्रमा काम गर्ने सङ्घसंस्थालाई समेत सहयोग गर्न आह्वान गरिएको अध्यक्ष पुनको भनाइ छ ।
उनका अनुसार पाउद्धारको कुण्डमा रु २० लाख, रातोपानी कुण्डको संरक्षणमा यस अगाडि नै रु २५ लाख विनियोजन भइसकेको छ भने नारच्याङ झरनाको संरक्षण गर्ने प्रस्ताव पर्यटन मन्त्रालयमा पेश गरिएको छ ।
पुरानो स्वरुपलाई यथावत राखेर रुप्से र नारच्याङ झरनाका साथै कालिगण्डकीको कटानबाट तातोपानी र रातोपानीलाई जोगाउन सकेमा मुस्ताङ जाने पर्यटकलाई रोक्न सकिने पर्यटन व्यवसायीको भनाइ छ ।
यसैबीच गाउँपालिकाले नदीजन्य वस्तुको उत्खनन्का लागि वातावरणीय प्रभाव मूल्यांकन (ईआइए) प्रतिवेदनको तयारीमा छ । डिपिआर र ईआइएका लागि रु १० लाख वजेट विनियोजन गरेको अन्नपूर्ण गाउँपालिकाले जनाएको छ । - रासस
