काठमाडौं । अखिल नेपाल फुटबल संघ (एन्फा) ले हरेक जिल्ला फुटबल संघमा प्रशिक्षक पठाएको छ । हरेक जिल्लामा खेलाडीको खेल क्षमता वृद्धि र खेलाडी उत्पादन गर्न एन्फा मातहातमा रहेका जिल्ला फुटबल संघहरूमा प्रशिक्षकहरू छन् । त्यसमध्ये केही जिल्ला फुटबल संघका प्रशिक्षकहरूले एन्फाबाट तलब लिन्छन् तर प्रशिक्षण भने गराउँदैनन् ।

एन्फा जुम्लामा पनि हाल एकजना प्रशिक्षक कार्यरत छन् । जुम्लामा कार्यरत प्रशिक्षक अर्जुन महतले २०७० सालमा एन्फाबाट नियुक्ति लिए पनि उनले हालसम्म प्रशिक्षण भने गराएका छैनन् । अझ भनौं जुम्ला जिल्ला फुटबल संघमा कार्यरत उनी अहिले आफ्नो जागिरको सिलसिलामा जिल्लाबाहिर छन् । उनी एक निजी बैंकमा कार्यरत छन् ।

नियुक्ति लिएको वर्षदेखि नै प्रशिक्षण नगराएका उनले एन्फाबाट मासिक रुपमा तलब भने लिइरहेका छन् । ‘ग्रासरुट लेभल’ बाट खेलाडी उत्पादन गर्ने लक्ष्यमा हरेक वर्ष एन्फाले जिल्ला फुटबल संघहरूलाई रकम पठाउन्छ । केही जिल्ला फुटबल संघहरूले वार्षिक रुपमा एक-दुईवटा खेल प्रतियोगिता गरेर रकम सक्छन् ।

त्यही खेल प्रतियोगितामा कहिले-काहीं प्रशिक्षक महत देखापर्छन् । तर, खेलाडी उत्पादनका लागि कुनै पनि प्रशिक्षण दिनका लागि उनी जिल्ला पुग्दैनन् । खेलाडी उत्पादनका हिसाबमा प्रचुर सम्भावना रहेको जिल्लामा एक त फुटबल प्रतियोगिता नहुने र एन्फाले खटाएका प्रशिक्षकले काम नगर्दा दिँदा खेलाडी उत्पादनमा असहज हुने एन्फा जुम्लाका अध्यक्ष भरत बुडथापाले भने ।

“जिल्लामा महिला तथा पुरुष खेलाडी उत्पादनका लागि राम्रो सम्भावना छ । महिला खेलाडी पनि लामो समयदेखि प्रशिक्षणका लागि तयारी गरिरहेका छन् । पुरुष टिम पनि प्रशिक्षणको लागि पर्खाइमा छ । तर, कुनै पनि प्रकारको प्रशिक्षण भने हुन सकेको छैन । विशेष गरी ‘ग्रासरुट लेभल’ मा प्रशिक्षणको आवश्यकता छ । एन्फा जुम्लबाट ७ वर्षअघि प्रशिक्षणका लागि नियुक्ति लिएका उनी हाल जिल्लाबाहिर जागिरे छन् । तर, एन्फाबाट तलब पनि खाइरहेका छन्,” अध्यक्ष बुडथापाले बाह्रखरीसँगको कुराकानीमा भने ।

एन्फाबाट जिल्लाका प्रशिक्षकको विषयमा लामो समयपछि छलफल गर्दा भने एन्फा जुम्लाले गत साउनमा लिखित जवाफ दिन निर्देशनसहितको पत्र पठाएको थियो । तर, महतले हालसम्म कुनै पनि जवाफ दिएका छैनन् । उनी अध्यक्ष बुडथापाको फोन पनि उठाउँदैनन् । कुनैबेला महतले एन्फा जुम्ला अध्यक्षलाई फोन गर्दै पुनः फर्कन चाहेको बताए पनि हालसम्म अत्तोपत्तो नभएको बुडथापा बताउँछन् ।

“हामीले पटक-पटक प्रशिक्षणका लागि दबाब दिँदै आएका छौं । प्रशिक्षकको तलब सीधैं बैंक खातामा आउने भएकाले हामीले रोक्न सकिने अवस्था पनि छैन । प्रशिक्षक महतलाई हामीले हालसम्म प्रशिक्षण नगराउनुको कारण लिखित रुपमा जवाफ दिन पत्र पठाएका छौं तर जवाफ आएको छैन,” उनले भने ।

यता जुम्लामा रहेको घोगेसिम फुटबल क्लबका खेलाडी अक्कल हमालले हालसम्म कुनै प्रशिक्षण नभएको बताए । उनले खेलाडीलाई प्रशिक्षणको आवश्यकता छ भन्दा पनि एन्फा जुम्लाले हालसम्म कुनै किसिमको जवाफ नदिएको र प्रशिक्षक पनि सहभागी नभएको उनले बताए ।

“एक त जिल्लामा कमै फुटबल गतिविधि हुन्छन् । त्यसमाथि न कुनै प्रशिक्षण हुन्छ खेल सामग्री छन् । आफ्नै लगानीले क्लबका तर्फबाट खेल खेल्छौं,’’ हमालले भने, ‘‘खेल सामग्री पनि स्वयंले व्यवस्था गर्नुपर्ने हुन्छ । यस्तो अवस्थामा राम्रो खेलाडी उत्पादन गर्ने योजना सफल हुँदैन ।”

यता प्रशिक्षक महत आफूले मासिक रुपमा तलब पाइरहेको स्वीकार्छन् । जिल्लाका खेलाडी, जिल्ला फुटबल संघले प्रशिक्षण नगराएको भने पनि आफूले सुरुवाती समयमा प्रशिक्षण गराएको उनको दाबी छ । जिल्लाबाहिर बैंकको जागिरको सिलसिलामा आए पनि पुनः आफ्नो पेसामा फर्कने उनले बताए ।

“मैले मासिक रुपमा तलब खाएको छु । खेलाडीलाई केही समय प्रशिक्षण पनि दिएको छु । अहिले जिल्लाबाहिर आएको हुनाले प्रशिक्षण रोकिएको हो,” उनले भने ।